Welcome to Knot ~ Season 2: #189. 路比

「喂！諗緊咩啫？粒聲唔出咁。」TB獨有嘅低沉女聲係我耳邊響起。
我將視線由車窗外，改為投放到身邊嘅啫喱。
「嗯？！無呀，諗緊啲嘢啫！」
「咁諗緊啲咩？講唔講得？」
「…」我重考慮緊好唔好問佢。
「咁唔講得就算囉。」哼！好一招以退為進。
「咁又冇話唔講得…不過你可唔可以先答我一條問題先？」好，我決定打蛇隨棍上。
啫喱望咗我一陣，先肯輕輕點一點頭。
我吸咗口氣，先夠膽去問:「你…同Sky宜家係點？」
啫喱又靜靜咁望咗我一陣，就係我俾佢望到周身唔自然之時，佢先開口回答:「我估Sky應該已經講咗俾你聽架？」


「我想聽你嘅版本。」我好堅決咁講明我嘅意願。
「哈哈哈！」啫喱突然係到笑，唏~嚇死人咩？！「乜你覺得我嘅版本同Sky嘅會有分別咩？定你覺得Sky會呃你？」
「…」我無嘢好講，因為啫喱呢句話，正中紅心。
可能見我又唔講嘢，啫喱決定主動答我:「我同Sky之間，除咗timing，就係重差少少嘢。可能係大家一早就當咗對方係家人，反而少咗啲愛情。我唔知嗰啲係咩，只係當大家都想行前一步嘅時候，都體會到差啲嘢。所以點做都好，都係work唔到，勉強無幸福嘛。我同佢以後呢…都係家人、係兄妹。」

我嘗試好好咁理解下啫喱嘅說話。
少咗啲愛情…我同佢都係好朋友多年，咁會唔會都…少咗啲愛情？
咁究竟差啲咩呢？以我咁精明嘅偵探頭腦，無理由諗唔到架？！

「咪諗啦！」被人一手拍落個膊頭到，真係嚇到個心離一離呀。「諗我嘅死因無意思架，諗下你自己點好過啦！」


我望住眼前嘅啫喱，佢幾時變得咁精靈架？
「你鐘意Sky，我點會察覺到呀？話晒都叫做情敵喎。」
「我…我已經收得好好…」
「但係我同靖都知。不過個傻妹太多嘢要煩喇，所以佢根本無心思去知。」
「嗯！其實宜家咁…唔好咩？」
「你滿足咩？！你唔去馬，咪自然有其他人去，蘇州過後無艇搭呀！」

唉～ 呢句說話，我記得曾經有個師兄…sorry，師姐講過。
我同佢同一個環頭，雖然警察間嘅TB有時都幾競爭激烈，但Key係少數可以傾到計嘅。
嗰次係喺警局個canteen，傾開感情事，佢知道咗我嘅環境，就只係講咗句:「我只係知有句說話叫"蘇州過後無艇搭"，既然搞清自己個心，而佢身邊一直有你呢個無論咩事都保護自己疼惜自己嘅人，咁點解唔幫自己解決埋對佢嗰個感覺啫？！」



唔通…連個天都俾緊機會我?
「嗚~Oppa！」我苦埋口面伏咗係啫喱隻強臂彎之上。「我點好呀？」
同一時間，我眼角渺到車入面塊倒後鏡，反映住司機個副既驚訝，又帶點厭惡嘅表情。
佢…佢唔係以為我同Oppa…BBL嘛？！