Welcome to Knot ~ Season 2: #158. 樂少

點啫宜家?! 我係扮型呀! 要分手已經慘，俾人玩重傷，咁唔係宜家連攤牌都唔可以型番次呀?
咩…咩喎! 我係喊緊呀，咁又點喎! 宜家有邊個話no label 偏B唔可以喊先?
人唔傷心唔會流眼淚，咁宜家我咁傷，流多少少都唔俾咩?! 哼!
 
突然有人輕輕咁拍咗落我膊頭到。抬頭一望，都估都係佢：「嗚…King…King哥…嗚…」
「喊啦。」King哥只係坐咗係我旁邊，左手輕輕咁攬住咗我「我知係好hurt架啦，喊咗出嚟，會舒服啲。喊啦。」
「嗚嗚…King哥…嗚…我…我覺得…嗚…好痛呀。我個心…好痛呀。」
「明白架，唔好唔記得我早排先失戀咋。」King哥嘅俊臉，唔知點解好似多咗層灰係上面咁，一啲光彩都冇。
「嗚…咁其實…其實點解你同…同佢會散…嗚…唔係話結婚咩?」再痛，我個好奇心都係不死架。
「咪就係話結婚，佢屋企人反對，話女同女無保障無前途喎。佢日日夜夜俾屋企人洗腦，我哋見到面又嘈，佢咪唔開心又大壓力。」King哥停咗一停，眼光好似唔知放咗去邊到咁，隔咗一陣，先繼續講。「咁啱，都唔知係咪個天整定，佢學校有個男仔殺咗出嚟，咁佢就同咗嗰條仔一齊。唉~ 算啦，做得les，重要係TB，都預咗。」


「King哥，聽落，你好似重傷過我咁。」唔知係咪有人重傷過自己，我開始覺得自己其實唔係好大件事。
「傻仔，十個tbg，九個都會變直，但十個，睇下你好唔好遇到啦。其實，每個人為咗每段感情都有付出過，到分開個時，邊個會唔傷。就算連亞青，佢都一定有個原因，佢都有一定程度嘅傷，問題係你唔再care啫。」我好似突然見到King哥頭頂有光環咁，好有智慧，好man呀。
「樂少，戀邊個冇失過。強到好似你哋Oppa，都俾森木hurt得透啦，當年佢點慘，我同你都知架。戀唔怕失，最緊要識得好返。」
「我…」唉~ King哥呢啲大智慧，我真係要啲時間去消化下。
「女死女還在，冇咗囉，咪抖下先。到自己ready，咪再去識過囉。再講，你同亞青都唔係好耐啫，應該好快冇事。」
「唔係時間長短嘅問題，係我俾人呃嘛。好瘀，好燸呀。」我終於，忍唔住講出最痛的位置。
「吓…痛係因為瘀同燸?」King哥碌大對眼望住我，我真係有啲驚驚哋。
「咁…咁如果俾人知道咗，我重點出嚟搵食呀。」我怯住咁講。
「妖~」King哥一手拍咗落我頭到。
 


唔知係咪掛住同 King哥傾計，我開始唔係好記得要喊。
「喂衰仔。」又係King大師發言時間「你唔喊，不如出去啦，好焗呀呢到。」
「吓?!」有種被坤嘅感覺添「但係…佢…唔知走咗未喎。」
「未走咁你諗住留係到一世呀?你肯靖都唔俾你咁做啦。要面對嘅始終要面對，行啦。」King哥一手拉咗我起身，半拉半扯咁推咗我出office。