Welcome to Knot ~ Season 2: #159. 樂少

要嚟嘅始終要嚟，要走嘅始終要走。
而要面對嘅，我知道我始終都要面對。
老實講，我唔想好似Sky咁，俾嗰個乜鬼Ocean搞到咁慘；我唔會想有咩心結跟足我一世，令自己一世都辛苦。
所以當King哥死都要我出去嗰時，我都係半推半就咁出咗去。
 
剛失戀嘅我，真係冇咩mood留係人多嘅地方。所以我本能咁一支箭走返入VIP房。
推門入去，我竟然見到……
青! 重有Taz同靖坐咗係到。
 
「樂!」青見到我推門入嚟，好開心咁向我撲埋嚟。


喂，我呢啲型架嘛，點會咁易俾佢得手?
所以一個閃身，我就避開咗佢，令佢撲咗個空。
「樂，你聽我講先啦。」哼! 呢啲苦苦痴纏嘅技倆，我點會咁容易上當呀?!
「得! 你唔駛講，我唔理你咩原因都好，其實我哋都已經玩完。由你瞞住我個一刻，你就已經背叛咗我同佢。再落去，對大家都唔fair。我唔鐘意爭嚟爭去，我哋以後都唔好再見喇。」我好瀟洒咁揮一揮手，講出我嘅結案陳詞。
「樂…唔好咁，你聽我講，樂呀~ 樂少…樂少!!」
 
樂少??
青從來都唔會叫我樂少架喎!
「樂少…樂少!」
我定一定神，回頭望向聲音嘅來源…


咦?!
「靖?!」我驚叫。
「係呀!」靖雙手抱住個酒桶，企咗係我身後望住我。
「靖點解你係我身後架?」我問。
「你講咩呀? 我啱啱想問你，你企係門口塞住晒做咩呀?!」靖冇我咁好氣咁問。
「我?!」我再環顧四週，只係見到Taz坐咗係VIP房係面，陰陰咀笑咁望住我哋「咦?! 青呢?」
 
「青?!」Taz行咗過嚟一手推開咗我，就幫靖拎咗個酒桶入房「係你好型咁衝咗出去無耐，佢都起身走咗喇。」
走…咗?!
「佢…佢走咗???」唔通頭先…係幻覺?????


「係喎。」Taz開咗支啤酒就開始隊「嗯! 係呀，佢有嘢要我話你知呀。」
哼~ 我都話佢唔捨得我架啦。
「咩呀?! 佢想復合呀? 我唔會囉。」我好囂張咁講。
「唔係囉。」Taz又飲多啖「佢話佢唔會再學潛水，叫你幫佢退學。」
「退學?!就係咁多??」
「嗯。冇喇。」
「佢重有冇講啲咩?」
「都話冇囉。」
「你諗清楚啲? 係咪呢到嘈得制你聽唔到呀?」
「你都痴線。」靖拉開我扯住Taz衫領嘅手，啤咗我一嘢「我呢到叫Silence，點會嘈呀?!你咪抽我baby水呀!」
 
點解…點解要我受一個咁大嘅情傷?????