Welcome to Knot ~ Season 2: #157. 樂少

Oppa過咗台灣都成日，電話都冇個返嚟，唔知點解，個心好唔舒服，成日都覺得好似有啲嘢會發生咁。
唔會係Sky啩?! 唉~
 
係咪呢幾日發生咗太多事呢，我感覺好似過咗好耐咁。但最大嘅問題，係所有事情一啲都未解決過。
點解唔可以俾我過一個開開心心、甜甜蜜蜜嘅暑假呢???
我真係好唔鍾意宜家咁。
 
就係因為我唔可以俾呢啲咁唔開心嘅事留係我呢個暑假到，我決定唔去逃避問題。
首先，就同青講清楚。
我send咗個whatsapp俾佢，約佢今晚點都要講清楚。結果佢依依哦哦、推三推四咗一輪，先好無奈咁覆我話好。


 
我決定約青去靖嘅Silence，因為我知道如果我真係好唔開心，想劈酒，呢到都會係一個安全嘅地方。
冇咗Oppa同Buddy，好彩都重有兩個由細玩到大嘅死黨係到陪我。
Taz同King哥一早就到咗。
唔知係咪夾定，佢哋竟然一句說話都冇囉嗦我。我知，佢哋想我自己多啲自主，去解決呢件事嘛。我明白，佢哋係真心為我好。
 
「樂!」等咗成晚，青最後係10點幾到「Sorry呀，咁遲先嚟到，不過我坐陣就要走。」
望住一臉歉意，但又好似唔準備同我有咩解釋嘅青，我開始有啲睇唔透件事：「你知點解我要搵你架。」
青無出聲，只係拎起枱上嘅啤酒，一飲而盡。。
「你冇打算解釋下件事？」我唯有再迫佢。


「Sorry…」又開始飲另一支。
「…無喇?! 你無其他嘢同我講?」我啲火，真係無咩可能可以熄到囉。
 
眼見青飲完一支又一支，根本冇望過我，亦好似冇打算同我解釋任何事，我真係好嬲。
我一手搶咗佢手上支酒，好大力咁放係枱上面，發出咗「嘭!」一聲。
坐離我無幾遠嘅King哥同Taz立刻走咗過嚟。
「講嘢啦~」我好大聲咁同青講「你唔係諗住出到嚟就係咁隊酒呀?!」
「樂少，冷靜啲先。入房先傾!」Taz將我同青拉咗入VIP房。
「青，有咩不如好好咁講清楚佢啦。」King哥都開口。
青企咗係我面前，兩行淚開始係咁流落嚟。


妖~ 我最憎女人嘅眼淚。
 
「對唔住呀樂。」青佢終於肯開口「我…係我唔啱，但係…但係我對你係真架。」
「你慳啲啦。」我已經火燒心，咩都唔會再去理「邊個腳踏兩船嘅人唔係咁講呀? 唔通話『sorry呀，我玩你架咋』咁呀?!」
青再一次無言，不過就加咗啲抽泣聲。
「咁…」King哥見個氣氛咁尷尬，忍唔住開口問「青你打算點?」
「有咩打算點?」我都忍唔住口，搶先咁講「我唔打算去爭喎。你既然開波都係諗住玩玩下，咁我咪做個好人，配合下你囉。要玩嘛，咁你同我聽清楚：我同你玩完!! Game Over!!」
一口氣講完，都冇理在場人士有咩反應，我就拉門出咗去，重走入埋office。
 
因為…
我真係好唔想俾人見到我喊…