Welcome to Knot ~ Season 2: #153. 啫喱

係機場見返路比，雖然只係短短幾日，但係個感覺好似好遠咁。可能係因為我有太多問題想問喇。
 
路比身邊企咗個同我差唔多高嘅TB，直覺話我知，呢個就係Sky係台灣嘅好朋友 - Cyan。
用我唔太流利嘅國語同Cyan寒暄咗幾句，佢就負責開車送我哋返OC去。
 
由出機場開始，路比就已經開始慢慢咁講俾我知呢個星期所發生嘅所有事。
愈聽，我就覺得愈心寒…
點解件事會發展到咁？
當初Sky同我講有關佢之前係台灣嘅事時，我都重係覺得好多事好遙遠。
我知，Sky同我講時係有好多情節係冇同我講到，我明白，亦尊重佢。


但係宜家由路比口中知道得更多更仔細，個感覺就係愈擔心…
我真係好擔心Sky!
 
就係路比講到琴日Sky點失控嘅時候，我哋已嚟到OC嘅正門前。
推門，一望，無論裝璜、擺設，到氣氛、感覺，一切一切，都係香港的Knot。
或者應該調返轉，當初Sky係將整個OC，都搬咗去香港。
 
門後嘅小撞鐘發出清脆嘅叮噹聲，店入面就有三個人，好自然咁對入嚟嘅人係出回應：「Welcome to OC~」
三個人當中，最先係一個係舖面嘅TB抬頭望向門口：「噢~ 原來是你們回來啊。」
TB走向我：「你一定是路比說的啫喱哥吧。歡迎光臨，我是Jazz。」


都嚟唔切反應，Jazz身後就跳出咗一個女仔：「你好啊，我是…」
「小淇!」我即時接住講「Sky常常提起你和Cyan的。謝謝你們對他的照顧。」
「哈哈~別客氣。」小淇展示佢真誠嘅笑容，又好好客咁拉住我行到去吧枱前坐低「來，這是Kay，我們的咖啡師。」
「Kay你好。」我向眼前呢個cool到震嘅TB示好。
點知…佢只係好cool咁用眼角望一望我，又揚一揚咀角，就繼續沖佢嘅咖啡。
 
「請問…Sky呢？」我啱啱坐定，就已經忍唔住問咗條我想問好耐嘅問題。
「我上去叫佢啦。」路比示意佢上去搵Sky，就同Jazz一齊拎埋我啲行李上咗樓上。
呢個時候，Cyan都泊好車，返咗嚟坐咗係我附近。同一時間，Kay亦都將兩杯咖啡放咗係我同Cyan嘅面前。
 


呷咗一啖…
哼~個傻妹，唔單止個舖頭同氣氛，就連呢種咖啡香，都一次過搬咗去香港。
 
合埋眼正想享受多一啖咖啡時，樓上傳嚟一下大叫：「仆街!!!!」