Welcome to Knot ~ Season 2: #153. 路比

其實我好清楚自己嘅角色同位置。
只要能夠留係Sky身邊默默咁守護佢，我就已經心滿意足。
 
所以當啫喱同我講話要過嚟台灣，我都唔會話「唔好」。
老實講，都唔到我話「唔好」。
失望同唔開心，點都會有架喇。但係見住Sky呢短短幾日，成個人好似冇咗靈魂咁，點會話唔心痛呀。
問題係我咩都做唔到；勸又勸過，氹又氹過，鬧都鬧過，咁我重可以做啲咩?
所以啫喱過嚟，可能未嘗都唔係一件好事。
 
我好清楚咁知道，如果啫喱可以幫到Sky過到呢關，佢哋嘅感情一定會更進一步。


而我呢，就只可以繼續做Sky嘅閨蜜。
閨蜜…都好呀! 呢個位置唔係人人都handle到架。
 
我唔情唔願咁上咗樓上搵Sky。
唔情唔願係因為…一來我真心唔多想Sky見到啫喱；二來，我唔想見到Sky宜家咁頺、咁唔開心、日日以淚洗面嘅樣。每次見到，我個心都痛到無以覆加嘅地步。
 
但幾唔情願，樓梯都係會有行完嘅一日。
嚟到Sky門口，我深深咁吸咗啖氣，先敢去叩門。
點知我隻手先啱啱掂到道門，門就已經自己打開咗。
「Sky?!」我唔敢冒冒然咁行入去，唯有伸長條頸，係門口偷偷地咁望。


房入面冇人應。
「Sky?!我係路比呀。」我決定行入房睇下。
「Sky!!!」房入面一個人都冇。
「仆街!!」忍唔住口，都係大大聲咁爆咗句粗。
 
係樓下傳嚟拉凳撞枱嘅聲音同時，我利用我當差咁耐嘅技能，環視咗間房一次。
啫喱係第一個衝咗入房嘅：「路比! 咩事呀?」
我抬望一望嗰堆企咗係房門口嘅人，亦好識趣咁轉返普通話：「Sky不見了!」
「不見了?」小淇好焦急咁推開比佢高成個頭嘅啫喱，行咗嚟我身邊「你說什麼不見了?Sky不見?! 她去了哪兒?」
 


我再望一望見前嘅壁畫，突然明白咗一啲嘢。
「你們知道這兒附近有什麼地方，能看到這個景色的嗎?」我指住壁畫問。
Cyan也恍然大悟咁：「有呀! 我知道是在哪兒。離這兒不遠的。」
「走!」我跳咗起身，開始發施號領「Cyan、啫喱，我們走。小淇，你和兩位帥哥留在這兒等我們回來。」
話口未完，我同Cyan、啫喱就已經衝咗落樓梯啦。
 
「Cyan! 快把車子開動。」一啲唔好嘅念頭，一路係我腦入面盤繞不去「快一點，我有不好的感覺。」
「發生了什麼事? 有人可以告訴我嗎?」坐係後座嘅啫喱，終於都忍唔住問咗出嚟。
「啫喱…」我嘗試用我最冷靜嘅音調同佢講：「你要有心理準備…我估，Sky係想去壁畫所劃嘅地方，去同Ocean一齊。」
「同Ocean一齊?!」啫喱呢喃咗一陣，突然有所醒悟「你意思係，Sky想自殺?!」