Welcome to Knot ~ Season 2: #152. 啫喱

我好清楚，有時有啲事，真係唔到我去理。
唔通我開到口，叫Sky俾我同佢去台灣咩？
佢都話咗想同路比去，唔通我話唔准呀﹗？
 
呢幾日我真係好掛住同擔心佢。
路比係有打過電話返嚟，提過下佢哋宜家點。但有時有啲事，你唔親眼見過，係唔會放心得落。
 
前幾日King搵我，話同Winnie散咗。
我冇覺得突然。
講真，有時兩個人嘅事，真係唔到外人去評價。


緣份…當緣真係盡咗，就要放手架啦，再去強求，其實都只係苦了人哋苦了自己。
「明白放過你，是放過自己」
歌咁唱，但又有幾多人係真正明白呢？
 
都唔記得係同King劈嘅第幾晚。
佢飲飲下，佢突然好清醒咁同我講：「啫喱，飲埋今晚我唔飲喇。都係時候好好咁做人。」
「吓？﹗咁都好你識諗就最好啦。」我乾埋手上個少少啤酒「講真，女死女還在。亞King你咁好咁型，實會遇到個更好嘅。」
「嗯~」King望一望手倆手中冇酒嘅杯「好女一定有，問題係我鐘唔鐘意之餘，佢又愛唔愛我啫。」
「兄弟﹗」我拍一拍呢個同我由細玩到大嘅兄弟膊頭「隨緣啦﹗」
「哈哈哈…」King呢一笑，真係嚇咗我一跳「隨緣。好﹗我哋為隨緣嚟多一round﹗」


 
又對咗半杯啤酒，係King先開口：「其實啫喱，雖然話隨緣啫，但係有啲事都要自己盡下力，咁先無悔架。」
「你指咩先？」
「我講你同亞Sky呀。」無啦啦，點解又要提起佢？「話就話佢過台灣搞掂個心結啫，你放心咩？」
「咁佢都開聲話唔需要我陪，唔通我死纏爛打呀？」我好悔氣咁講完，又對咗一大啖啤酒。
「佢唔需要你陪你就唔去呀？大佬，你自己買張機票，自己過台灣唔得嘅？你去旅行唔得？你去嗰間民宿住唔得？你去搵路比得喇啩﹗﹗」King一口氣咁講，又真係俾佢一言驚醒夢中人咁。
 
就係因為King嘅呢番說話，我宜家就坐咗係去台灣嘅飛機到。
我聯絡咗路比，話俾佢知我今日會到。
唔知點解，係電話到我覺得路比係有啲嘢瞞住咗我，講嘢吞吞吐吐咁。


我真係好擔心Sky出咗啲咩事…
 
千祈…唔好有事呀。