[誤墜]係獅隧口落車 就出左事: ６６

小白嘗試調整呼吸，但此時此刻既我係到諗…… 

係一邊轆大對眼望住我地接吻既依貓、同埋我……點解會乜事都冇、只有小白出現呼吸困難。 

或者係因為，我同依貓都唔係長時間係『界』內呼吸－－ 
我就入左去無耐，依貓就應該係四圍去唔同既地方、不論『界』的內外。 

至於我體內既空氣應該係未完全係『界』內既空氣，亦有部份『界』外、佢地所謂污濁既空氣。 

兩者混為一體、不是純『界』內或者純『界』外，成為中間的灰色地帶，所以先可以勉強頂住檔先。 





咁既話……我望住眼前仍然大口大口喘息既番茄小白。 

可能打後既日子我都要繼續咁樣比佢借我身體換氣，原理好似美沙酮咁、慢慢戒除『界』內氧既必需性。 

「喵！」（白姊！） 

突然，小白身體一軟、作勢昏倒地上。 

我一個小搶向前扶起小白。 





「我好暈……」小白掩住自己塊面。 

「我扶你返我到先啦！」話畢，我就提起佢一隻手跨係我膊上，扶佢落樓梯。 

 

樓梯落到一半，小白又再次表示呼吸不過來。 

不用多想，我馬上再次成為小白用呼吸機。 





接吻後，小白身體開始放鬆－－ 

原來唔係放鬆，係直情暈左！ 

我換左個姿勢公主抱起小白，跑返我屋企，我感覺到佢身體好熱。 

沿途有啲阿姨、阿伯係到望，問洗唔洗幫手。 

但送去醫院既話根本都唔會有用，而且比人見到小白對眼……都唔知會唔會係第朝生果日報上頭版 

－－《宅男窩藏外星女、一飽色慾後被捕》 

所以一路上見到有人話想幫手、我都只笑笑口話同女朋友玩緊、冇事，就敷衍過去。 





一路跑到大廈大堂，見到看更權叔、令我感覺到一切都變返哂正常。 

雖然焦急，但一邊公主抱住個女仔等電梯，一邊同有隻貓係我身邊擺尾陪我等既場景都咪話唔逗趣。 

我同望住依貓、依貓又用黑靈大眼望住我。 

頭先係樓梯落黎、依貓就一直跟住我跑，活似一個懂事既人。 

哩隻貓真係呢…… 

升降機門開，我抱住小白入門、依貓當然亦都跟上。 

『叮噹！叮噹！』我猛按門鐘。 

聽到裡頭既腳步聲急步走黎，大門打開、一個男人見狀亦神情焦急地說：「哇！搞邊科？」 





我無太多心思答會佢，鐵閘一開、我就抱住小白返我房扶佢訓低，依貓就跳左上床俯臥係小白身邊。 

然後我就跑入廁所開盤水，扭條手巾比小白降溫…… 

頂！個花哂仲開住既？！幾日都冇人理？ 

「阿爸－－娘親阿妹佢地呢？」我叫出廳外。 

「返哂大陸丫嘛，你唔記得喇咩？」男人叫返過黎咁應我。