[誤墜]係獅隧口落車 就出左事: ６７

我無理我阿爸，講左句唔洗幫手、佢就返左入房。 

開左盤暖水，我返入房幫小白拭刷額、臉、頸、手、腳。 

見到佢好似發燒咁，身體隨住大口既呼吸起伏，額角滴下汗珠、呼息燥熱。 

我唯有不斷幫小白換水抹，有望可以幫佢降下溫。 

羊脂般雪白嬌嫩既肌膚在我手上拭抹、可以見到不同位置都有深淺不一既傷痕。 





白素妮……辛苦妳了。 

過左一陣，小白呼吸開始緩和起黎，身體各處出現既發熱亦都開始消退。 

我倒左盤水，就爬左上床、攬住小白，慢慢、慢慢就訓著左…… 

＊ 

「阿壯！起身喇！懶訓豬！」嗯……？好攰阿、比我訓多陣啦…… 





微微撐開一條眼縫，見到自己間房已經被陽光充斥、一切如常，不同的是 

－－搖住我，叫我起身既係活力充沛既小白！ 

「小白！你無哂事喇？」我彈起左個人。 

小白笑住咁擰頭。 

訓我隔離既依貓都好似岩岩起身，露出兩隻顯眼既貓牙在大打呵欠、伸伸懶腰。 





「阿壯－－我好似呼吸唔到……」小白做出誇張既窒息動作。 

奇怪在，小白面色依然紅潤。 

二話不說、我就吻了下去，舌尖相互觸碰、然後交纏在一起，唇上傳來火熱軟棉既觸感。 

又奇怪在，小白今次並沒有大口吸吮我腔內空氣…… 

「哇！」小白又試推開我。 

「原來真係會突然間心…跳加速架！」 

「哦！你個白素妮，搵我做『白』老鼠！」 

「嘻嘻。」 





正當我再想去幫佢『呼吸』既時候，小白擋住自己個嘴「你快啲去刷牙先，唔係我就搵依貓幫我呼吸算嚕～」講完，就轉頭去摸依貓。 

好，等陣你就知味道！ 

我打開櫃拎牙刷出黎，邊洗面、邊擠牙膏。 

當我刷緊牙，無咩做緊既時候、留意到櫃入面多左支白色牙刷。 

我定左定神，諗緊幾時多左枝牙刷係到既時候，有人伸左隻手拎左支牙刷出黎。 

「嘻，你刷咁慢架！」跟手，小白就擠牙膏、然後企係我前面遮住我望鏡，我輕輕用肩推開小白又搶返個位、跟住我地就不停爭住望塊鏡刷牙。 

「喵喵！」（我又玩！） 





依貓跳左幾下，最後跳到我頭上面、好似想幫佢主人爭取機會照到塊鏡咁。 

兩人一貓，就係個豆潤咁大既廁所嬉戲。 

＊ 

「我肚餓阿。」小白摸住個肚。 

「我落你買早餐你食？想食咩？」 

「唔洗喇，我想你陪我煮麵、我唔熟你廚房阿，入黎陪我丫？」都未講完，小白就入左我廚房左摷右摷。 

行到入去，見到佢間不時擰頭過黎向我吐吐舌，真係好窩心。 

結果，我地每人一個餐蛋麵就走返出黎。 





其實成程都係我整我煮，小白話未見過我落廚、想見識下。

明明只係打幾隻蛋同煎少少午餐肉，佢就係咁係我身邊話『好犀利阿！』仲拍哂手掌咁，真係比佢笑死。 

當然，午餐肉唔少得依貓份，不過唔知佢食唔食得慣。 

＊ 

冬天下午既陽光好舒服，我同小白食完野、洗完碗之後，攤左係梳化睇碟。 

好多野佢都未見過，非常好奇。 

有幾次仲差啲拎左我隻『鄭和下西洋』入碟機播，當然我唔會比小白打開入面黎睇、因為入面真係有鄭和下緊『洋西』。 





「點解個咁樣衰既黑超肥佬跳啲咁難睇既舞，個女仔又肯同佢一齊跳既？」小白一路睇韓國當紅ＭＶ一路問。 

「上天係公平架，當你又樣衰、又無錢、跳舞又唔好睇既時候，佢就會彌補你心理上既不足、係第方面滿足返你。」 

「哦？係咁架？」小白似懂非懂咁點點頭。