[誤墜]係獅隧口落車 就出左事: ６４
「點解……你會無事？」
智障，天真既我以為已經完全解決哂入面所有人、但意外地有人可以免疫、真是我對未知的事物過份大意？！
唔通真係啲奇幻小說設定，家主身為幕後黑手、就有異能？
唔係……事實一定唔係咁。
『啪！』佢起勢對我小腹又是一腳踢過黎，「死靚仔－－」又一腳，「太歲頭上－－」再一腳，「動土？！」
我已經痛到成個人好似蝦米咁縮埋一舊，依稀聽到小白不停咁『晤晤』聲。
黑家肥佬洩忿後，喘住氣後退幾步、小心地將手上白花瓶放回應該是原來位置的檯上，
然後係佢檯既抽屜拎左啲野出黎……
我終於留意到……薑是老的辣！人原來真係需要兩手準備－－原來個肥佬屋企入面都有一朵白花！
死火！視線開始模糊……
如果每人既人生都係一個故事、每人都係自己故事既主角－－
我算唔算係最廢既主角？
想撐起身既我，又再比個死肥佬踢左腳、後滾左個筋斗……
終於總算知道佢拎左咩出黎，係一把形狀有點特殊既匕首。
一把有三邊刃面、發著異樣啞鐵色光茫、手握部似是烏鴉尾這樣的刀。
又或者係咩都無所謂、躺在地上的我只看到一把殺人利器，估唔到我人生既旅途就咁係到完結。
「一下就埋你單、唔會太麻煩架咋細路。」佢把聲真係好難頂－－唉算啦真到臨頭唔講喇。
佢一步步行近我，係我生命即將走到盡頭前、我唯一既不滿係就咁比個連廣東話都講唔正既肥佬了結。
人生就好似無安全措施既過山車咁，可以安全上斜、但落斜既時候已經唔到你話唔玩。
同樣地、捱得過既話，過山車都會有落完斜、返回原位既時候……
「喵！」
https://www.facebook.com/wrongstationinshatin/posts/10152215684407300
一隻唔知係啡底白紋、定白底啡紋既貓跳左出黎，對住肥佬頭部胡亂貓爪一通！
黑色既一雙大眼，仲有頸前既銀牌……竟然係之前我遇過既該隻貓！
https://www.shikoto.com/i/dmh
小白突然由『晤晤』聲，轉左做『晤晤』聲。（「依貓！」小白說。）
該陣既我的確係聽得出小白講緊其他野，但聽起上黎都係『晤晤』聲、分唔出有咩分別。
但、隻貓咁有靈性既？彷彿一直等待最重要的時機、為我破解厄局。
籍住空檔時間，我終於可以企返起個人。
趁住隻貓仲貼係驚慌失措既肥佬面上、我一把將個肥佬推落地，搶去佢手頭上把奇狀的刀去幫小白鬆綁。
「依貓！」正當我解開小白手口繩結，再想幫佢解開腳上既結既時候、佢已經手身同驅、指住隻貓已經大叫出黎。
「Ｅ－ＭＡＩＬ？」
「係『依貓』，我阿爸早幾年前帶返黎養架！」原來隻貓竟然係有人養既，仲要係小白一家。
我解開埋小白最後腳既繩結，發現幾乎每寸純白肌膚被綁既之後都勒到呈瘀血般的深紫色……
不難看到，小白臉上一圓一圓紅印、仍可依稀分辨出肥大手掌的手指輪廓。
我怒目回視身後既肥佬－－你個仆街！
正當我想轉身過去打獲金個肥佬既時候，他奮然執起頭上的『依貓』恨恨地向我們一擲、好彩我一手接住。
『依貓』頸上銀牌反了一下光，果然牌上面真係寫住『ＥＭＡＩＬ』一詞、只係小白唔識讀。
「小白，睇住你隻貓。」我轉身。
「死靚仔－－！」眼前肥佬又再抓狂般衝過黎，揮拳而至我面上。
來得正好！－－手上匕首一揮，碰巧削去其手腕……
『嗚呀！』鮮血馬上有如湧泉，激射至我面上。
掌摑別人很有趣嗎？這是你應得的。
我無再理會佢滾在係地上、痛苦翻騰的肥佬情況變成點，我拖起小白就離開房間。
忽然，一把穩實既男人聲：「件事竟然會演化成咁……」
從房間外大廳走過來的竟然係白大叔？！
本來我想『的起』白大叔，質問佢究竟發生咩事、點解『禁后』同黑白兩家唔係佢所講咁既一回事。
但佢一臉嚴肅地斥喝一句：「細路，快啲走、帶我個女由你原本黎既地方離開『界』！」
「我探過路，從這裡出門口轉右有條小水路，直去就係你轆落黎既地方、至於實際係邊一個點先係出口，要靠你認路！走！快啲！」
「阿女係你身邊應該無問題……細路、記得照顧好我個女。」不知為何、這道別方法，聽上來有點令人難過。