[誤墜]係獅隧口落車 就出左事: ６３

電子錶顯示搭正六點半！距離我燒掉白花之後大概兩個鐘……

眼前五個黑目人面上既口罩、突然間好似乾涸既泥土被敲破般、逐片逐片剝落，然後散碎成沙粒、隨風飄走。

果然成功左！

當佢地發現有異樣既時候，已經太遲、口罩已經整個消失，五人同時發出窒息既咽喉聲、痛苦顫動。

我快步經過佢地，身後既五人朝向住我、作出辛苦得扭曲既動作、表現出恐懼既表情……然後一個個倒在地上、癲癱幾下然後成為一具具慢慢冰冷既肉身。





節哀，同樣為左生存，只係你地為左擺脫白家枷鎖自由生活、我為左我既女人可以平安回來過活，角度不同、我別無他選。

其實一切都係我既猜測，雖然我已經有兩手準備打算係『燒白花』唔成功後實行其他方案。

但已經係最唔冒險既方法，而『燒白花』唯一風險係－－我唔知小白會唔會都有事……

忐忑不安既我，快步走過去開眼前黑家肥佬既宅門……

仆街！果然鎖左，無鎖匙開唔到！





繞去屋側旁既我，見到兩個又伏屍係地下既黑目人、牆上面有個窗……

我諗都唔就側身撞爛個窗，爬左入屋內！

入到去大概係廚房左右既位置，我探頭出去走廊、確定左右都冇人、就跑向大廳出去。

屋唔算大，跑到另一個角落就見到一間開住門既房……

入面有一個被綁手、腳、口既白裙女仔坐左係床上面……





「小白！」－－我不禁大叫！

眼前女孩頭髮有點凌厲、身上四周都係血痕、原本雪白既連身裙亦附上不少血斑、好似仲有被撕爛既部份，嘴上用來綁住她的白布亦被染成血啡色。

總算平安無事－－起碼無生命危險！

但唔知點解、小白不停皺眉，雙眼以及頭部不停向我左手面眨動、仰望，並發出著急既『晤晤』聲。

身體猛地掙扎既小白好似非常焦急，但眼見小白平安無事、放鬆落黎既我，完全唔明解佢點做緊乜。

－－有一刻，就係我搞清楚小白意思果一刻，我倒抽一口氣……

就是說，門後……我身邊有人！

『溫－－！』黑影閃過，我腦內傳來奇怪既聲音、就像揚聲器傳出麥克風掉地時的聲音，大概係因為我被人用鈍器扑頭……





「仆你個街－－」一把唔咸唔淡既廣東話。

下一秒，我已經被放倒係地上面，見到一個手持花瓶既肥佬、踩住緊我個頭……