[誤墜]係獅隧口落車 就出左事: ６２

雖然白大叔講既野唔係全部真，但部份資訊仍然係有用！ 

『禁后』儀式，需要我同紫逅個女－－八千代。 

假如佢剪左我一撮頭髮然後食埋就係儀式所需，咁佢個女應該都係要同樣被剪去一撮！ 

帶住八千代係身，就等於儀式無辦法順利進行、等於我仲有時間去救小白！ 

唔知小白走甩左未、定係仲維持住個僵局？如果走甩左、我就唔洗大費周張…… 





跟據黑家肥佬家主既反應、如果小白一死，佢地所有人都活唔到落去、所以小白應該唔會有性命危險…… 

咪住！雖然唔可以攞命、但如果比佢地捉到、佢地唔知會對小白點！ 

－－亦怕會有嚴刑迫供既情況，所以白家再設一個『界』、令黑家既人睇唔到其他人、其他人亦睇唔到黑家既人。 

諗起紫逅既說話令我冷汗直冒、緊握拳頭，不其然腳程再次加速。 

但我唔係直接去黑家肥佬既屋企、反而係該處附近左穿右梭、行左兩個圈…… 





「哥哥？」我將八千代綁係一個比較偏僻既位置。 

「你乖乖地，留係到唔好走開、知無？」雖然佢想走都走唔到。 

「你去搵白色姊姊？」 

「係阿，搵完佢返黎接你。」 

「咁你快啲去、快啲返啦，我會乖乖地等你、之後一齊返去搵媽媽。」八千代微笑。 





嗯，希望我能回來吧。 

＊ 

大概過左一個鐘，我藏身附近植物叢、接近黑家大屋、見到幾個係門口既黑眼守衛站崗。 

再無對峙僵局、亦無肥佬係到……睇黎小白已經被佢地捉左入去！ 

眼前五人、頭戴烏鴉口罩郁都唔郁企係門口放哨。 

雖然我唔理解係咩原理、佢地可以戴住烏鴉口罩係『界』外活動。 

但如果『烏鴉口罩』可以完全取代『界』提供比黑家生存既功能，咁黑家根本唔需要咁依賴白家。 

換句話講，口罩必定有其限制、我諗到既－－例如可維持活動時間有限、制作所需時間、材料等等限制。 





假如、第一點成立既話…… 

潛伏附近既我望住手錶，一直計住距離我燒哂附近既『白花』過左幾耐。 

無錯，我行左幾個圈，已經將附近作為『界』基礎既白色小花全部燒哂！ 

 

「同埋，你有冇見到我地村入面、路上面有好多白色小花？果啲就係『界』既基礎，有佢我地先係可以界入面生活。」 

兩家之間、積下既仇怨已經唔止幾代，今次我打開道鐵門令到黑白家再次碰頭、佢地絕對唔會輕易放過小白。 

無理解錯既話，白色小花就好似無線網絡既發射站去維持『界』既覆蓋網、雖然唔知每個『站』可以覆蓋到幾遠，但我已經將見到既全部燒清光！