[誤墜]係獅隧口落車 就出左事: １８

究竟咩事……做咩會變成咁。 

好地地行行下山，做咩會搞到咁恐怖？ 

聽住逐步行近我既步伐聲，我已經毫無退路。 

果個防盜眼，即使屋主或者已經行開左，但我已經係連望都唔敢再望。 

走，一定要走，唔可以留係到等死！ 





我走入去旁邊既小巷，一路不停咁跑…… 

其實都講唔上係跑，因為我已經係跛下跛下、扶住牆咁拖步行。 

望住前面唔知係咩地方、寂靜無光既小巷，我完感到無助同絕望…… 

但我都要試下跑，我唔甘心我人生既句號無啦啦就比條痴線佬加左上去。 

差唔多跑到小巷既盡頭，一條路直去、只有左轉。 





我開始聽到個痴線佬把聲：「你走唔甩架喇，出黎啦～」 

「我要你地班睇唔起我個仆街，一個個係我面前收皮！」佢把聲異常亢奮。 

唔可以係到停低諗其他野，只可以繼續跑、繼續跑…… 

但，原來頭先未算係無助同絕望。 

而加先係真正既無助與絕望……  





我走左入掘頭路…… 


前面除左一大叢片片好似荷咁既植物之外，乜都冇、更加無路可逃。 

噠、噠、噠…… 

追黎既腳步聲交替響起，我已經唔容許多幾秒思考既時間。 

我茫然失措咁望住黑壓壓既植物叢，根本毫無辦法！ 

噠、噠、噠…… 

步聲一再接近，大概差唔多行到頭先條小巷既盡頭。 





即係話，佢轉個環我就比佢捉到…… 

根本我連猶都唔可以，我向前一跳、跳左入植物叢。 

完全冇心思理會果到污唔污糟、會唔會有咩蛇蟲鼠蟻，我只係不顧一切咁爬、爬、爬，爬到最入縮起個人。 

恐懼既感覺蔓延我全身，只係識不由自主、係咁係咁係咁震…… 

我發誓咁大個仔以黎從未試過咁驚悚，即使睇邊齣恐怖片都好。 

但，即使我跳左入去，絕路一條既小巷唔會有其他路可以選擇。 

個痴線佬仍然步步進迫，走近我身處既位置。 

「後悔已經太遲喇，一早！就唔應該笑我！」講完，佢就不停咁笑、笑、笑，笑到令我心寒、寒到入心底。 





我係植物叢入面，透過零亂碎落既視野望出去，見到佢就係我前面唔遠既地方！ 

佢逐步行過黎，我屏住呼吸，連少少聲都唔敢發出黎。 

就係佢行到黎既時候，我身處植物叢既上面條小路傳來幾下植物搖擺既聲音。 

果種聲就好似有人從我位置爬上去，經過左幾棵植物而發出既聲咁。 

「竟然爬左上去？無用架！你唔識路、點走都走唔甩！」講完佢就跑返轉頭，聽聲應該係沿住條小巷跑返出去。 
我抒一口氣，但連抒大口少少都唔敢，好驚佢聽到返轉頭。 

即使聽到佢應該越跑越遠，但我都唔敢行出黎、真係好驚…… 

過左唔知幾耐，我想爬返出去，但我郁一郁、開始覺得成身都劇痛。 





我先注意到身上既傷各處都血流不止，到我再想提起力氣既時候、發現自己已經成身都冇哂氣力。 

而且意識都慢慢開始模糊…… 

睇黎，今晚都要脆脆地係到訓返晚喇。果下好奇怪，我自己真係笑左下出黎。 

臨合埋眼前一刻，我見到個白紗又再出現。 

原來唔係夢？又係你……？