[誤墜]係獅隧口落車 就出左事: １７

因為把刀都好遠掟過黎，傷口唔算深。 

我今次醒喇，收起把刀擺左落褲袋先算。 

但，宜加有機會既梗係匿得就匿。 

其實本來係獅隧公路轆落黎之後，我去求其一個家人到拍門都可以搵人幫到手。 

但一來原先我個情況又唔係咁壞，二來果陣已經係那夜凌晨、無謂擾人清夢， 
需知圍村人不嬲早訓，仲要惹到佢地真係唔係人咁品、鬧都算喇，可能放狗追我一兩條巷嚇下我都唔出奇。 





所以本來真係唔想，但而加最快既得救方法唯有求救於岩岩開燈果一戶人。 



我勉強企穩個人，走過去叫門。 

「有冇人阿？可唔可以開開門幫幫手，我仆街整親、行唔到阿！」 

我唔敢講有個痴線佬追緊我，正常人聽到都唔會開門啦。 





過左陣，沒有回答。 

雖然佢對鐵閘上面寫住『請溫柔細力叩門』，但我真係越黎越等唔住。 

個心真係跳得好快，眼角流緊落下巴既唔知係眼淚定冷汗，如果旁人望過黎、應該見到我污污糟糟、成身泥巴，滿頭大汗，成臉濕哂，十分不堪既樣子。 

我好大力咁拍門，係咁拍佢道鐵閘。 

「有冇人阿！救命阿！」我真係就黎崩潰喇！ 





突然，我聽到屋入面傳來由遠而近既腳步聲。 

噠、噠、噠、噠、噠…… 

聽住佢慢慢行過黎，屋外既我嘗試從防盜眼同屋主有視線接觸。 

咩接觸都好，我想盡快同『正常人』有任何互動，我就痴喇！ 

腳步聲停左，我一直從鐵閘罅望住個防盜眼。 

原本透明既玻璃，變左做純黑色…… 

我倒抽一口氣，因為我知道、『屋主』正從防盜眼窺視緊我…… 





我完全停止思考，企左係到、額角猛流汗、眼睛開始失焦，開始有啲耳鳴。 

直到聽到屋入面既腳步聲又再傳出，由近至遠，慢慢、逐步逐步，直到消失聽唔到。 

同時，屋外另一個人既腳步聲開始慢慢從不遠處傳過來。 

ＳＨＩＴ！追到黎……