[誤墜]係獅隧口落車 就出左事: １９

昏昏沈沈間，我感覺得自己既身體比人移動緊。

期間，我零碎咁聽到有人係到對話……

「小心啲，如果佢有咩事、打後就會好麻煩。」

「嗯！知道。」

「扶好未，我地抬佢返屋企先。」





前後既對話我聽唔太清楚、定係果陣未有知覺，我唔太知。

但，聽得到既、又明佢地意思既只係得伊三句，而且大概係一個男人同一個女仔係到講緊野。

行緊既中途，我感覺到我係咁比人搬起又放低、搬起又放低，好似有人唔夠力咁。

如果有做過相關訓練既你應該知道，要抬起一個無知覺既成年人身體、無足夠既體能唔係咁容易。

雖但如此，你咁樣又上又落我真係好辛苦架，暈左姐、唔係死左阿大佬。





浮沉無數次，終於有個地方比我安定落黎、直至第朝。

＊

清晨既陽光開始射入屋內、伸延至我塊面，我慢慢咁擘開對眼。

望到既係一個有古舊味道既屋頂、一條橫樑，掛住唔知係咩、好似古裝片啲『蓑』咁既條狀物體。

望落少少，發現牆身係由藍磚砌成，旁邊有道圓拱形既入口落住一道竹簾。
而我身處既應該係屋入面既內堂，即係類似客房咁既野。





清新既空氣同寧靜既感覺真係好……

唔係好對路喎……仆街，原來我轆撚左落黎條村之後已經過左一晚、即係話我已經失蹤左一日一夜！

我心急如焚咁跳落床，打算大步行出去。

一行先知出事，原來我身上唔同位置都比人包紮過。

唔適應既我，一野就仆左係地下到。