《人類基因篩選計劃》: 第三章：Pellet 張風蒔

———————————
如果覺得故事寫得正就去Facebook比個讚啦！
你的支持是我繼續寫下去的原動力！
Facebook：https://www.facebook.com/woodensunn/
———————————

#高牆與雞蛋，你，決定站在哪邊？#

滴答滴答⋯滴答滴答⋯





我輾轉反側了一整晚，腦海中只有無數的疑問。呆望著床邊的時鐘，距離上班時間還剩數小時，感覺卻極其漫長。

到底張風蒔跟我有甚麼關係？我記憶中她從沒出現過。但在她虛空中閃過的，確實是我⋯她「虛空」風格轉變的原因又是甚麼？

———

「CRIB公司。」

「CRIB公司，參考現時交通情況，預計19分鐘內會到達目的地。」





我的思緒混亂到極點，決定回到公司後就直接找華叔問清楚。車子在閘口前就被人群堵住，有警衛示意我在這下車。我走到行人路上，視線被擋住了，在公司門口圍了一大堆看似是記者的人。

「林柏月！」有人使勁地拍拍我的肩膀。「仲記唔記得我？」

「森麻，早晨。」這出眾的「柏豪頭」加上陽光的笑容，怎麼可能會忘記？「點解咁多人圍著公司門口嘅？」

「吓！你唔知道咩？琴日你地部門有人墮樓呀。好似係叫咩⋯華叔?」

可能是見我愣住了，森麻皺起眉頭端詳著我的表情。





「你識佢架？」經過一陣子的沉默後，森麻忍不住問。

「嗯，我啱啱接手咗佢啲Pellet，仲有啲事諗住問清楚佢。」

「佢好似喺醫院深切治療部。情況都幾嚴重⋯係呢，你有咩想問佢？」

我猶豫了一下。「都係一啲執行上嘅問題，我諗問Calvin都一樣。」我並非不相信森麻，只是尚未查出任何線索前，好像不應太張揚，以免打草驚蛇。

「咁好啦，呢個係我電話，如果你有野要幫手或者想搵人一齊食飯，都歡迎你call我。」森麻露出了他的招牌笑容，遞給我一張紙條後便走了。我順手把紙條塞進衣袋中，便回到工作室中沉思著。

華叔墮樓⋯怎會這麼湊巧？他墮樓跟我或張風蒔有沒有關係？為了防止我那該死的9.5分creativity作祟，我決定要找他問個明白。

叩叩

「入嚟。」





「Calvin，我啲野想問吓你。你知唔知華叔⋯」

「知道。」他打斷了我的話。「無其他事，就翻去做野。」他托著頭，眼睛緊閉，露出一臉愁容。

「我仲有野想知，我睇一個叫張風蒔嘅虛空果陣，見到我自己，點解會咁⋯」

「張風蒔？」Calvin 猛然張開眼。「佢係華叔其中一個Pellet？」

「嗯⋯不過佢個虛空好怪⋯好似⋯」我不禁想起了那怪異的風格轉變，和不斷閃過的林中小屋。

「你唔駛理，以後張風蒔就交比第二個負責。」他雙手揉著太陽穴。

「不過⋯我見到⋯」





「依家翻去做野啦。」

再追問下去好像也不會獲得答案，於是我又回到工作室，戴起腦影像處理器繼續工作。

滴答滴答⋯滴答滴答⋯

根本無法專注，思緒中只是不停縈迴著張風蒔的虛空。我決定要去看看她的檔案。

叮！二樓，second floor。

公司認為數碼記錄過於危險，所以將重要的檔案和資料復印成實體檔案，存放在二樓的資料庫中。但資料庫的保安丁點也不嚴密，就像我這樣的見習員工也可以自由進出。

「張風蒔⋯張⋯風⋯蒔⋯張！搵到你啦！」

我掀開了一份泛黃的文件。個人資料⋯綜合評估⋯負責導航師⋯咦⋯怎麼有兩頁附錄被撕走了？





我把現有的文件拍攝下來，一方面以便日後再查閱，另外是因為我暗暗有不詳的預感，生怕之後文件又再次被撕毀。

好不容易等到下班，我急忙離開公司，希望能趕上深切治療部的探病時間。

———

「華叔，你感覺點呀？」

「哈⋯後⋯生仔⋯華叔仲好⋯硬淨⋯未死得⋯」全身綁滿繃帶和固定器的華叔強行躋出笑容，話語中帶點顫抖。看著平躺的他，我覺得諷刺極了。他身上插滿了各個用途的喉管，全身僵硬，看上去就跟實驗室中的pellet一模一樣。

「華叔我有好多問題想問你，點解張風⋯」

「後生仔⋯你要對我啲Pellet好啲⋯佢地全部⋯都係好人嚟㗎⋯」





「嗯，我知道。但我想知點解喺⋯」

「佢地可能⋯某啲能力上有不足⋯不過⋯骨子裏都係⋯好人⋯」再次被華叔打斷，我開始感到有點不耐煩。

「華叔，你可唔可以答我幾個問題先？」

「柏月⋯我知道你⋯一定有好多疑問⋯原諒我實在⋯唔能夠答到你⋯不過⋯華叔比個忠告你⋯」他停了好一會兒，吸了一大口氣道。

「呢間公司⋯唔係你想像中咁簡單⋯好奇累死貓⋯做好自己本分就算啦⋯」

「我都覺得公司好奇怪，我有好多嘢都諗唔通。」我仍然死心不息，想要從華叔口中問出什麼。

「世界上每樣野都有個價⋯你想知道嘅野⋯代價好大好大⋯大到⋯你無辦法想像到⋯」

「先-生，探-病-時-間-過-咗-啦，探-病-時-間-過-咗-啦，病-人-需-要-休-息。」華叔病床前的智能機械人示意我離開。

見我一臉不甘，華叔最後再給了我一個忠告。「柏月⋯做事唔好咁出位⋯小心由高牆變成雞蛋⋯」
見華叔雙目緩緩閉起，不打算再跟我作任何糾纏，我也只好就此作罷。

———

柏月並不知道，在他趕到深切治療病房前，在這裡進行過另一場對話。

「華叔，你同我都清楚知道係邊個攪成你咁。」男人說。

「博士⋯我知我唔剩好多時間⋯所以唔轉彎抹角⋯我有個兩請求⋯希望博士你可以幫我⋯」華叔強忍著渾身上下傳來的痛楚，直視著男人毫無神氣的雙眼。

「請講。」

「我希望你可以保護Subject A0⋯佢係我地拼命救翻嚟嘅⋯我唔想⋯佢再成為強權下嘅犧牲品⋯」

「A0佢份人好倔強⋯如果我無辦法令佢離開呢一潭渾水。我唯有將佢拉入黎，最危險嘅地方係最安全。」

「嘻嘻⋯哎喲痛⋯⋯博士你都係叫翻佢做柏月啦⋯A0咁難聽⋯仲有⋯希望你可以盡量避免後者⋯你都知道無論邊個落水⋯都唔會有好下場⋯」

「咁嘅情況下，虧你仲笑得出。好，我應承你。第二個請求呢？」

華叔收起臉上的笑容，一本正經的說：「希望博士你⋯可以以自己嘅安危為先⋯佢地仲未知你身份⋯你暫時都仲安全⋯唔好急於為我報仇⋯要知道革命並唔係一朝一夕嘅事⋯你仲有漫長嘅仗要打。」

「咁長氣嘅，你顧好自己先啦。」男人邁步預備離開病房。

「博士⋯祝你好運⋯」

「唔好死。」他回頭瞥一瞥華叔。

———

時間回到現在。

「高牆變成雞蛋？佢應該係指村上春樹嘅高牆與雞蛋？唉⋯香港人幾時唔係喺高牆之下？都慣架啦⋯」我在街上喃喃自語地走著。「呢個華叔，講到咁玄，答完好似無答過咁。」

跟華叔交談後，雖然並沒有解決到我任何的疑問，但至少有一件事是確定的——公司的背後有一個不為人知的陰謀。到底這所公司蘊藏著什麼的秘密？尋找真相的代價又有多大？重要的是⋯真相，我承受得了嗎？

回家途中，我走進了一家玻璃品店，打算買個玻璃杯以取代昨晚被打破的那一隻。拿著玻璃杯，站在自助收銀機前，我摸摸口袋，想拿出電話來付款。

「咦！」取而代之，我從口袋裏拿出一張皺巴巴的紙條。呀！差點兒就把它忘了，這應該是森麻今早的電話紙條吧。我快速掃視著紙上的內容。

奇怪，怎麼在電話號碼下，還有一行細字？

「我有你想知道的答案！」

（待續）