一個書生既Player故事: 三六二

我帶住四方帽，同Parsons、靜宜喺前排既地方坐底。
 
等主禮嘉賓9 up下廢話。
 
「College of Business. Bachelor of Business Administration (Honours) in Finance.」
 
「Chan Dai Man」大家輪流上台鞠躬。
 
「Lam Scholar, First Class Honours.」到上台既一刻，見到自己既爸爸媽媽望實自己，滿面自豪幫我影相，我先至明白， 畢業禮既意義在於俾自己既父母高興下。
 


畢業禮完結後，我尋找父母及江柏琪既身影，只見到媽媽同江柏琪談得起勁，有講有笑，已經無視咗主角阿仔我。
 
估唔到江柏琪哄長輩都有一手（除咗佢自己既父母）。
 
可以省卻婆媳問題真係謝天謝地，起碼有事我唔需要夾喺兩個女人中間。
 
 
我帶父母同埋江柏琪去飲茶。
 
江柏琪主動劃點心紙，問下我父母想食D乜野，「幫你劃咗你最愛既胡椒豬肚湯。」就交俾侍應。


 
有心理學家話人類都有戀父／戀母情意結，鐘意既另一半一定會有自己父母既特質。
 
睇黎我都適用。
 
呢一下，我覺得江柏琪好似做咗我阿媽咁，As always。
 
江柏琪真係好老婆型既女仔，重要事由我決定，而佢既角色則可以幫我處理好生活上既鎖碎事。
 
阿媽Comment我：「阿仔，你真係衰，又唔多D帶女朋友返屋企俾我地見下。」


 
「遲下帶多D。」我心諗，有咩好見丫。
 
「阿仔，我問你阿，柏琪同阿媽跌咗落海救，你會救邊個先？」
 
我阿媽又喺度派膠，我真係唔知點答。
 
「我唔回答假設性問題。」會搞到氣氛下降。
 
「救江柏琪／阿媽先。」無論答邊個，都會俾人感到涼薄無心肝。
 
用一個理智認真既方法去答係最無伏但又好無情趣：「要視乎當時情況，例如睇下救到邊個既機會大D。」
 
我最後咁樣答：「傻既，我係唔會俾你地兩個有機會跌落海！」
 


Perfect！呢個答案好！只要扮傻仔就可以令大家開心，何樂而不為？
 
「車，你呢個答案咁Hea！」阿媽話：「我問如果真係跌咗落海。」
 
「你有阿爸救嫁嘛！」我拖埋阿爸落水。
 
「你阿媽識得游水，我喺沙灘蓆等你返來，順便幫我買個菠蘿冰丫唔該。」老豆心諗，你燒唔到我既。
 
「係囉，咁我去救柏琪就啱，佢唔識得游水。」我話。
 
「哎呀，乜柏琪你唔識得游水，咁叫書生教下你。呢個求生技能好重要～」阿媽話。
 
「我想嫁，佢肯同我去游水先算。」
 
「今個星期日去囉。」江柏琪下戰書。


 
「實得嫁，就咁話。」
 
呢餐飯樂也融融。
 
我同父母喺City既校舍周圍影相，向佢地介紹呢個就係我既死基友Parsons，又介紹下好同學靜宜。
 
轉頭就送咗佢地離開學校，留返江柏琪做我既私人攝影師。