一個書生既Player故事: 三五七

「媽。我有野想同你講阿。」一齊無耐，我就同阿媽講。

「嘩，仔，你講到咁，到底係咩事？好凝重喎。」阿媽話。

「我想搬出去住。」

佢聽到之後表情由玩笑變得認真：「自己一個？」

「唔係，同女朋友一齊。」



「邊度識嫁？」

「中學同學。」

「哦，係咪以前住喺我地屋企果個？」阿媽不以為然。

「乜你知道嫁？」

「本身唔知嫁。返到黎見到我房既櫃咁乾淨，無塵，都覺得奇怪。後來隔離屋陳師奶同埋樓下看更同我講，你同個靚女女朋友出雙入對，成日煮飯仔，我咪知囉。」



「哈哈，我估唔到你知。」

「知咗無出聲姐。我以為你地分咗手，原來仲一直一齊緊？」

「Er....果陣佢有家庭問題先住喺我度。經過多年既認識，我地最近先決定一齊。」

「你係認真？想同佢結婚？」

「係阿。無人比佢更加適合我。」



「玩夠先好結婚。結婚唔係你地想像中咁浪漫既。」阿媽寄語。

「我知道好多生活上既事要處理。」

「你有錢搬出去咩？」

「我人工二萬蚊，佢有三萬蚊，首期俾唔到，但租樓係可以。」

「有咁急切需要一齊住咩？」

「佢婆婆有事，想搬去同媽媽一齊住，但屋企唔夠大，無房可以讓俾老人家。」呢個理由好強大，駁唔到！

「佢搬入黎一齊住咪得？我地有房多。」

「唔好既，寄人籬下感覺唔好。我地有能力咪搬出去。」



「你都俾得起租，點解唔諗住買？」

「除非你肯幫我。。」我呢個二家祖有點厚面皮提出。

阿媽諗咗一陣，話要同老豆商量下。

阿媽試圖唔出聲扮無咗件事，所以我過咗一個禮拜再次追問佢既意見。

「我同阿爸傾過，唔會無條件就俾層樓你。我地想你自力更新，將來有能力照顧自己。如果你出去租樓，不如俾錢我地賺。你地揀一間450萬樓下既樓，我地睇過都同意既話就落訂。我資助你地首期同埋十萬蚊簡單裝修，你地以市價既租金每月交俾我。」

「咁層樓個名？」

「你而家都未有能力借到錢。無理由要個女朋友借，寫佢個名？分咗手咁點算？」阿媽話：「所以層樓個名寫我，到你地過多幾年有能力結婚，供夠二百五十萬，我再轉名俾你。」



「都係一個好提議。」我明白父母一定會企喺自己既立場諗野，驚我俾人呃。我地收入加埋有五萬蚊，唔計加人工，就算月供兩萬都仲好輕鬆，都係供十年姐。

「咁樣做都係保障你。相見好，同住難。我同爸爸都認同結婚前同居係好事，可以試下大家適唔適合。一但牽涉到金錢就好敏感。同埋我希望你女朋友係一個會付出既人，而唔係當你係樓宇供應商，要感受下社會帶俾你既壓力，感受下拍拖同結婚有乜野唔同。」

「我洗唔洗帶你見下佢？」我問。或者，佢見過江柏琪之後會改觀。

「唔洗啦，你地再一齊耐D先。」看來媽媽對我地既關係好無信心。覺得我地會有好多磨擦或分手：「每個月準時交租就得。」