一個書生既Player故事: 三五八

我有一刻諗過，江柏琪會唔會好港女，一蚊都唔願意出。

但要維持一段長久既關係，錢係不可避免討論既話題。

最壞既情況係江柏琪要我一個人出晒錢，而我一個人未有足夠能力去供，係咪可以拉倒唔搬？

以結婚為前題？真係結婚？我係咪已經準備好？我係咪想像得太簡單？

結婚有乜野考慮？經濟、性格、相處、兩個家庭既考慮。。



隔咗幾年無一齊住，大家會唔會改變咗太多，唔可以好似之前咁？到底我同江柏琪係咪真係相處到？係咪對多十年、廿年，都仲想見佢？

呢個係一個有幾瞭解自己既問題。

「係咪真係搬出去？」某一日放工，我問江柏琪。

「真係可以咩？」

我將屋企既方案講俾江柏琪知：「無話可唔可以，只有你想同唔想。我同屋企人傾過，我地揀一層四百五十萬以下既樓，佢地可以幫我地墊首期同埋裝修，我地每個月俾返市價既租金佢地。直到供到二百五十萬同埋結咗婚，再轉我個名。唔知你點睇？」



江柏琪聽到後，話：「呢個方案，無退路嫁啦喎。」

「我諗，你都係以結婚為前題。愈早開始儲錢，第時就愈輕鬆。」

「分手點算？」

「當係交租俾出面，無分別。」

「好，咁我地每人交一半租。」



「你唔需要即刻答我。你可以返去認真考慮下。」

「有你屋企人強大既Back up，仲考慮啲乜野。咁樣我地已經解決咗香港情侶最大既難題。」江柏琪鬆一口氣：「況且就算一人夾一萬蚊都仲好輕鬆。」

江柏琪俾我既感覺落呢個決定好簡單隨心。

得唔到又要接受、或攞盡著數唔想負責任既我總係話「關係」好無謂。如果佢會對你好，唔洗「關係」都可以。

我突然間明白「關係」既用途。

除咗法律、道德上既責任，某程度上佢對關係無信心既心打既強心針。

我承認自己好心急，比起想江柏琪讓間房俾婆婆，我更想用外在既野去綁實江柏琪，唔俾任何機會佢走，係好懦夫既行為。

我地沉默咗一陣。



我發出邀請：「下個月，你黎唔黎我畢業禮做攝影師呀？」

「緊係黎啦，我唔黎，邊個幫你影？」我都唔知呀，有咩人會肯幫手影？Stephanie？Michelle ？丁丁？其實唔會所有人都帶私家攝影師去畢業禮姐？同Parsons一齊影咪得，除非佢都帶條女黎做攝影師。仲有一個Option，佢叫毒撚的腳架。

我心裡諗咗好多野，口上卻只說：「搵阿媽。」

「我唔黎你搵第二個女仔影點算。要監視住你，嘿嘿。」

「阿媽都叫第二個女仔？」我無語。

「肯定唔係搵阿媽啦！」

「哎呀，詭計俾人發現咗啦。」



江柏琪一野打落我膊頭：「死野，你真係諗住搵。」

「講下笑姐。琪姐，我點敢搵？你唔幫我影，咪叫單身既Frd幫手影。」

「咁就啱聽。」