一個書生既Player故事: 三五六

果晚返到屋企之後，我Send咗個心心俾江柏琪。
 
我：【<3】
琪：【媽阿，好噁心。我接受唔到。】
我：【我都係HAHA】
琪：【<3】
我：【你有新相Post...Caption係：我要話俾全世界知，我男朋友有幾噁心】
琪：【唔好，俾我冷靜下。。】
我：【無得反口啦】
琪：【都無話要反口。。bb】


我：【Fuck..我都毛管戙】
琪：【T_T 噁心is strictly forbidden.】
我：【Yep】

因為識得太耐既關係，我地習慣唔到用咁既Sweet語氣同對方講野。
 
我地比較少痴纏情侶既對話，而係朋友或者歡喜冤家串黎串去既路線。

你問我同江柏琪一齊咗之後，關係有無變到？



可以話變返以前一齊住既果種親密感，同埋多咗少少拍拖會做既拖攬錫。

拍過幾次拖既我地，對於呢D種種都會唔再有好新奇既感覺，只覺得係正常情侶會做既事，就好似食飯一樣咁自然。
 
見面既頻率，同早排一樣，一星期大約見一兩次。

都係咁啦，生活無乜太大分別。





對我黎講，呢一件並唔壞事。

返咗工之後，只求生活安穩，放工只想第一時間返屋企休息。

有個大我幾年既Senior同我講，初入職場身體未能適應早起既生活，同時由大學無限玩樂、毫無負擔既揮霍歲月變成困喺一個辦工室少少既空間裡面，好容易會抑鬱。

我成日唔知自己將一日最多既時間擺喺返工係為乜，人生既意義就係為咗每個月出糧打簿果幾秒快樂。

放工已經好攰，你一定明白，返到屋企攤喺梳化衫都未換就昏睡既感覺。

我無力氣去處理太復雜既人際關係。

以前會覺得Flirt下人就食到女，好簡單，方便快捷。

現在覺得，如果我將時間花喺唔重要、無法令自己放鬆既人身上，仲慘過打兩份工，浪費時間。





同江柏琪拍拖真係好幸福。

唔係以前熱情如火，只用下體諗野，三分鐘熱度，好似追溫梓柔、Michelle咁衝動任意妄為。

而係平淡而持續既幸福感。

我地熟悉對方，無需要再額外花時間去了解一個人既過去、猜疑同埋擔心佢會唔會搵第二個。

大家有著無比既信任，可以給予適度既自由，唔會Check住check住，On call。就算幾個鐘唔覆Whatsapp，都唔會覺得有乜野問題。

了解對方既性格，長久既默契就好似對方肚入面果條蟲。好多時候你未講，我已經知你諗乜，例如佢食唔到太辣既野。不過江柏琪好仆街，明知道我好憎食洋蔥，有親洋蔥都要夾俾我，迫我食晒。好，你嬴，我食。



朋友圈有重疊，唔洗每個圈子重新介紹見面，同D我唔Care既三姑六婆Social，俾人評頭論足。
 
有朋友話覺得同另一半唔夠交流，放唔開傾計，因為生活重覆無聊，都無野好講，其實另一半每餐食咩佢真係無興趣知。

而我同江柏琪唔洗驚交流Dead air點處理，無野講咪唔講囉。我地明白生活並唔係小說，唔會每一日都咁精彩。我地係樂於分享，傾計唔係例行工事。即使每日都係講「遲到啦」「今日早咗起身」「放工啦」咁無聊既事，都覺得好幸福，因為你知道有個人永遠支持你，幾無聊都聽。

如果而家既女朋友係一個任性又好影響我生活既人，例如同我講，青春係無悔，你今晚放工陪我通頂直落送佢返屋企再返工；讀緊書好得閒要求我秒回Whatsapp、每日都見面；同女仔單獨食飯都要嘈分手；好似個公仔咁一個人睇Google都會盪失路要我擔心；小小事就發脾氣，當我呀四咁，我人工唔高仲要我成日買名牌俾佢；仲要我擔心佢未玩夠會出去Flirt仔俾帽我戴，我會想死。聽得身邊有太多同類既故事，呢種女仔好似七仔一樣，總有一個喺左近，表面正常，一齊後就會發現中伏。

所以我好滿意同江柏琪既關係。

呢個世上唔會再搵到比江柏琪更合拍既人。

愛情變成感情係必然既過程，但我不認為咁樣係愛情既終結，反而係一段關係成熟同埋昇華。

阿，仲要一樣野，江柏琪係一個獨立有能力既女人，唔止可以財政獨立，我地仲可以有分擔生活既金錢任務。需知道，我屋企有錢喺讀書時期各方支援你有幫助，唔代表我都會咁有錢。