一個書生既Player故事: 三五五

我同江柏琪一路由屋企去到搭完Lift靜咗無講野。

個腦仍然喺剛才火藥味濃既江家。

我地去咗樓下公園散步傾計。
 
「你同屋企人既相處既模式都幾特別。」 我評論。

「佢地係咁，幾十年都改唔到。我都慣。」



「你地都係把口鬧對方，實情係好緊張大家。」

「始終都係血脈相連既一家人，唔會想大家衰既。」

我拖住江柏琪。

「點呀，啱啱你媽都叫你同男朋友我搬出去住。」

「唔好玩啦，租樓又唔抵。唔講供樓，邊夠錢俾首期。」江柏琪無視咗我句男朋友。



 「即係你都想同你男朋友我一齊搬出去？」我再次提問。

「。。。」江柏琪話：「咁緊係想，一齊住咁開心。」

「拿，唔反對即係默認。」

江柏琪引用返剛才未講完既《那些年》劇場：「你想知道答案嗎？」

我用右手做出撩耳屎既動作，用普通話講：「洗耳恭聽。」



「好。」佢話。

「嗯？」我問。

「講完。」

「其實問題係乜野？」我問：「你要回心轉意同我表白嗎？」

「係阿。」江柏琪笑笑口。

「下？」我拖住江柏琪，俾佢突如其來既說話嚇親。

「你真係要做我女朋友？」

「係阿。」



「咁快要搵人埋單？你玩夠啦？」我問佢。

「哦。咁唔願意。你未玩夠想縮沙！」江柏琪話。

「真係唔等多幾年？開始咗，就無得退貨嫁啦喎。」我話。

「咁煩嫁你，我收返句野。」

「咁又唔好，你都講到出口。不過，你唔覺得呢個Timing同心情表白好奇怪？」啱啱身處江家既世界大戰，轉頭又黎情深深雨濛濛表白，好難觸摸阿。

「少少。咁啱啱返屋企之前係準備講緊呢樣野。」

 「你份人可唔可以浪漫少少？」



「識咗你幾多年，你知我係咁嫁，直腸直肚，諗到咩就講咩。」呢個都係江柏琪既優點，唔洗估估下。

「我淨係知你鐘意D mk野。」我喺花園既地下度執咗條草，圍住佢隻無名指扮戒指。

「頂住先，你個MK妹應該啱。」我話。

「頂你，乜野MK妹阿。」

「佢話要全世界都知邊個係佢女友、這樣開車會慢一點。」我引用佢Instagram公佈出Pool既MK語錄。

江柏琪一臉被調戲又柒咗講不出聲既樣子。

「唔柒過點先算係青春？我發誓，今次唔會再咁打。」

「哈哈。MK妹，聽住先。」





我諗起江媽媽明明係一位美人神情卻如斯憔悴，應該有好多野煩惱。

例如家計、家庭之間既關係、事業或者個人成長、朋友既關係。

舊時既年代唔興結婚，同一個差既人結婚咁就一世。

我想像唔到自己既另一半係咁大脾氣、成日鬧架、有賭錢既不良惡習、無家庭責任感、無上進心。

唔係一個人出生有無錢既問題，而係整個人格、品德既問題。





我覺得，一個女人既美係要由男人寵出黎。

就好似我既媽媽咁，爸爸錫老婆多過錫我，處處都會讓老婆，聽老婆話。

甚至聽過有親戚話佢係老婆奴。

我覺得爸爸唔係老婆奴，佢只係錫老婆。

每次爸爸都會好自豪咁話：「女人娶返黎係要寵。唔寵佢，寵邊個？」

我希望，自己將來都可以好似爸爸咁，係一個好既另一半，每日都寵到老婆開開心心，將最好既野俾晒佢。

而令到我有咁既衝動去付出既人選只有一個，就係我眼前既江柏琪。