一個書生既Player故事: 三五四

「請坐。」江媽媽話。

客廳無梳化，我坐咗喺客廳飯枱既圓凳上面。

江媽媽五官端正，江柏琪既美貌的確有幾分係遺傳自佢。

江媽媽既臉容有點憔悴，眼神總係帶有一點愁容。


江柏琪一返到屋企就入房問候婆婆：「婆婆，你見點呀？頭先跌親邊度？」



「我對拖鞋反轉咗，烏低身想執返，起身就見暈。」婆婆緩慢地說。

「我落街買一買餸，返到黎就見到佢坐咗喺地下。」江媽媽話：「媽，我心血少，你可唔可以唔好嚇我？」

「咁我搬過黎同你住，等你日日睇住我。」江婆婆話。

江柏琪：「啱呀，你唔好自己住啦。我換過張碌架床，同你瞓上下格。」

睇黎公公過咗身，江婆婆係一位獨居老人。



 「講下咋。我唔想搬過黎，一個人住慣咗。」

「一個人住慣咗，又好難同人分享空間。佢租果度一人單位點都大過呢度個房仔啦。」江媽媽講出看起來合理既解釋婉拒。

「你望住我講做咩？又想我搬走？我唔會嫁喎。」江柏琪開始上火，講野無咩禮貌。我從來唔會用咁既語氣去同長輩講野。

「我同緊你講野，唔望住你望邊個？望耶穌？」江媽媽都不遑多讓。

『望天打掛？』我心入面諗起呢個爛Gag，不過忍住咗無亂講出口。



睇來佢地屋企平時都係咁樣溝通，我感覺自幼家庭融洽既我不能逗留喺呢度太耐，會吸收到負能量。

唔怪得中學識江柏琪果陣講野咁臭串，原來同家庭環境有關。

自從同我一齊住，加埋佢大學住Hall三年，脾氣、行為各樣都女人咗好多。

諗落江柏琪畢業後都係返咗屋企住咗大約三個月，必然會出現好多磨擦。


「你中學已經搬咗出去住，有毛有翼，識飛啦。」江媽媽串江柏琪：「屋企既野，你幾時會理嫁？當屋企係酒店嫁姐。呀媽病咗你有返黎睇過咩？一個禮拜都唔知有無見到你一次。」

「係因為老豆打我先嬲到離家出走，我而家咪返咗黎住囉。當屋企係酒店？我真係未住過咁細咁殘既酒店，咁貴租仲要做工人幫手做家務，放工咁攰都仲要去買餸、煮飯、洗衫。仲有，我返學真係好忙，果一個禮拜已經係我特登抽時間返黎。」好Hurt呀。我係呀媽，聽到個女咁講野真係嘔血。
 
「真係多謝你啦講到返屋企都咁委屈你，你有本事咪唔好返，同男朋友一齊住囉。」江媽媽向我講：「江柏琪真係好拿煩，呀男朋友你同佢出去租間屋住。我唔想日日見住呢條頂心杉。」



「。。。」我諗佢都係一時意氣用事，都唔知講咩好。

「好呀，我出去租樓住，咁咪可以讓成間房俾婆婆？」江柏琪話。

「早住早享受，遲住貴幾舊。」江媽媽話：「我同我老公都係粗人，無本事照顧好個女。你有能力就好好照顧阿琪，等佢住好D，食好D，唔好咁辛苦。」

「係既Auntie。你放心將柏琪交俾我，我一定會令佢過得幸福。」我彬彬有禮地回應。

江柏琪即刻啤住我，示意我又亂Up野，好可愛。

我個心即刻笑咗出來。

好似有點痴漢。



「夠鐘開機洗衫。」江柏琪起身，準備入廚房。

「你老豆放工差唔多返到。你快D帶埋男朋友仔走，出去食飯啦。」江媽媽向我解釋：「佢老豆脾氣唔係太好，唔鐘意阿琪身邊既男仔，陣間家變佢攞刀斬人嚇親你。」

「我地頭先食完飯了。」我回答。

「咁阿。。下次再見。阿琪你送人落去啦。」

江柏琪拎起鎖匙包，我起身就同佢離開。

「再見。」我有禮貌地同江氏家族道別。