一個書生既Player故事: 二九六

之後既日子，無論班女仔幾八掛，又或者我地幾個男仔想套Felix料問下有咩Update，Felix都封晒口對女朋友同第二個男人開房既事件絕口不提。
 
撬唔開金口，睇黎佢想將呢件事完完全全咁當無事發生過。
 
不過心入面果份懷疑真係可以好似粉筆字咁輕易抹掉？係人都知無可能。
 
『只要我扮咩都唔知，Janice就會繼續留喺我身邊。』呢個係Felix心入面既諗法嗎？
 
好似Felix咁好條件既男仔，都會無安全感到被人情緒勒索既地步嗎？
 


對林敏兒，我唔可以接受佢對我既不忠，但Felix可以。
 
Felix係一個比我更值得託付既對象，林敏兒你執到應該喊三聲感恩，仲要咁對佢，真係好仆街。
 
我地大家都有咗共識，當唔知呢件事情既發生。
 
 
好快就考完試到Sem Break，到咗聖誕節。
 
回顧返以前既聖誕節，都有好多節目。


 
同林敏兒溫書、同羅嘉樂佢地去唱K、同阿婷喺尖沙咀某殘廁扑野、同江柏琪喺廢校度過、同水會既人落Club、自己喺外國過。。
 
每一年既人事都變遷緊，你永遠唔知道幾時係最後一年一齊過。
 
今年同你共渡佳節既人，他日仲可唔可以keep到呢段關係？
 
今年既聖誕我選擇自己一個人過。
 
Hall我地層已經無晒人，除咗Common有D陌生少見既情侶面孔喺度玩煮飯仔，拍拖既拍拖，單身既又有佢既節目。


 
媽呀我真係好毒。
 
都唔怕返Hall撞到人俾人笑，因為如果撞到，你都同我一樣咁毒姐。
 
我換返件厚身Hoodies，踢住對鞋街、笠住頂帽，樣子好毒咁樣落去AC2食晚飯。
 
 
 聽住胡琳既畢加索，用輕快一點也不浪漫既心情去渡過聖誕。
 
偶爾俾自己獨處既時間，都唔差。
 
「摘哪顆星星　唸哪篇新詩
從來沒答案　只想證實另有風光
用右耳聽知更　用左眼觀初雪


若然未試過　只因壓力沒法釋放
畢加索在催我　不需要受束縛　只需要用感覺」

 https://www.youtube.com/watch?v=X2Nwtm6V2Sc
 
 
一路行，發現Stephanie喺我前面大約十步距離。
 
原來佢都係一個人過聖誕。
 
Stephanie同我一樣著得好頹，灰色既綿外套加條長褲。
 
 
我地往同一個目的地出發。
 


我同Stephanie喺AC2搭埋同一部Lift去Canteen。
 
佢似乎認得我，望咗我一眼，就將視線移開，禁電話。
 
本來我想同佢打招呼，因為佢無望我，似乎對我係零興趣，我就收起我一句你好。
 
早有打算一個人過既節日，就該一個人。