一個書生既Player故事: 二六三

Wade奮勇自薦拎兩罐啤酒俾我同Parsons。
 
條友仔呀，玩人果陣就大大聲。
 
「準備，三、二、一。開始。」Hailey話。
 
「Wow~~」其他人睇住我地起哄。
 
我同Parsons都唔想喺人地面前柒，用盡吃努既力氣鬥快飲酒，幾乎同時飲完。
 


「邊個快啲邊個快啲？」「好似係同時。」「睇唔到喎。」
 
「Step，你話事啦，你話邊個快啲？」疑似CK莊員話。
 
Step望一望我，搵手指指住我，莫非佢係因為幫我先指住我？
 
「咁就書生啦。」Hailey話。
 
Parsons笑笑口拍我膊頭：「你做消防好，我上莊都唔得閒做～」
 


「屌你啦。」
 
然後我都即刻拎返兩罐酒大返Wade同Felix：「到你地啦！」
 
Felix俾我既印象都係比較健康同正氣，可以話係運動版既羅嘉樂，唔知係咪未熟絡既錯覺呢？
 
佢睜開大大既眼睛，有肌肉既手臀。
 
「開始！」CK大叫。
 


個場俾我地炒熱咗，加上酒意漸濃，氣氛極好。
 
Felix默默咁灌啤酒落肚，而Wade則係好有架勢抬頭望向天，大大啖咁樣鯨吞啤酒。
 
Felix動作看似無殺傷力，人人都以為Wade會嬴既時候，Felix一把拎起罐啤酒舉起，大叫：「完！」
 
咁樣就KO咗阿Wade。
 
「好廢阿Wade！呢D咪叫有姿勢無實際囉！」
 
阿Wade有點不爽咁望住我。
 

而喺呢個氣氛高漲既時候，我卻見到飲完糖水既Stephanie唔聲唔聲咁向Lift口移動。
 


「去邊阿Step？」疑似七樓莊員狗公問Step去邊，Step拋下一句：「廁所。」
 
就走咗了。
 
而且佢唔係等Lift落樓下，而係好麻煩咁推開防煙門，行樓梯走。
 
睇黎Stephanie真係好趕急。。
 
唔係真係急住去廁所，佢不過係借尿遁。
 
我鐘意玩，鐘意熱鬧，難得住Hall，應該要感受一下熱鬧既宿舍生活，用生命值去燃燒青春先至會無悔無遺憾。

一班人飲酒好辛苦留多一陣都唔得咩？點解Stephanie要咁堅持走？係因為拍拖避忌？定係純粹自己唔鐘意玩呢？
  
然後，就再沒有然後了。



其實我地真係做錯咗D咩令到佢無辦法投入呢度既氣氛呢？

好多人都會走，換咗係溫梓柔式者靜宜覺得唔啱玩都會好快走，只不過係走咗返房呢個舉動，何足掛齒，有去深究既需要咩？

明顯地，我鑽咗牛角尖去諗D無關痛癢既事。

直至我地成層咁多人都battle晒，完成咗八樓職位競選大賽，最後現莊CK嬴得第一位既寶座，而我就第二，做咗「班長」。

新手上路既一晚酒局，大部份人都好廢，只係飲啤酒同埋少少Shots，兩點未夠就收皮。

「我地唔得啦，返房先。」笑眼姣Mandy同MK Carmen腳步浮浮咁返腳。

「好啦。抖下。」Hailey都唔迫佢地，佢肯定心諗，遲下有排你地飲。



全場就剩返Hall Tut Hailey、現莊CK、Parsons、Wade、Felix同埋我。

「你地幾飲得呀。」CK 讚我地。呢一年玩既團隊都大概定咗。

我地仲好清醒喺Common食住薯片，開咗套電影一齊睇，睇到五點先施施然咁執埋野訓教。

當然，Stephanie去廁所之後，最後都係無返過黎。