一個書生既Player故事: 二四二

「你唔覺得，人生點都要睇到一次北極光咩？」Michelle喺Skype同我講。
 
「都係既。無理由黎到歐洲咁近，都唔去一轉睇北極光。」
 
就係咁，我同Michelle就決定咗返香港之前，一定要去呢個咁浪漫既地方，做D浪漫既活動。

要講我喺荷蘭Exchange既生活有乜野遺憾，可能係去得太少地方旅行。

但我就係鐘意外國既果種悠閒生活，Hea下Hea下唔洗點用腦，就過咗Exchange既時光，我一直都享受緊，又不能稱得上係遺憾。



Exchange得果半年，如果你份人摺乜都無去接觸，什麼學野，體驗風土民情，通通都唔會關自己事，去完外國都唔代表D乜。

比起個人既進步，我更加似係逃離香港放咗一個較長既假期，識到D會上網傾計既Hi Bye Friend，同埋學識咗煮少少野食而已。

咁算唔算一種浪費？

我都唔知。

但我知道，將來返咗香港既我，會掛住呢度既悠閒。



喺度住半年卻沒有很多雜物，基本上都係生活必須品，我通通都放晒喺宿舍既Common俾有需要既人去接收。一個大o急，就足以支撐我一個月既旅遊所需。

喺我同Wade同埋其他旅途中喺Hostel識既朋友遊歷完30日既長途旅程後，我就將旅程最重要既最後一站留咗俾Michelle，同佢來個十二日既歐遊燒錢團，目標係燒晒所有錢就返香港。