一個書生既Player故事: 二四三

因為一句北極光，我地決定去全球最北既地方，即係冰島。

位於極光帶既冰島，有最多既機會可以睇到冰極光，對比起芬蘭挪威，都算係平靚正，如果咁高機會都睇唔到，咁唯有買張六合彩啦。
 
歐洲既廉航值得一讚，座位闊落，唔會好似香港廉航咁頂腳。
 
我同Michelle約咗喺冰島既凱夫拉維克機場碰面，再一齊坐巴士去距離機場只有十五分鐘車程既藍湖（Blue Lagoon），我地第一晚住喺呢度既酒店。
 
一眼望出公路都係平地，乜都無，地方廣闊，周圍既草地都係岩石類好暗啞既顏色，感覺又去咗另一個世界。
 


「北極光既最佳觀賞月份係九月至三月，好彩我地仲趕得切三月前黎冰島。」我話。
 
「希望今次既旅程可以成功睇到北極光啦。」Michelle話。
 
「不過就算客觀條件有幾好，極光都唔一定會出現，都係睇好無彩。」
 
「有我喺度，一定會好好彩！」哪來既自信？
 
的確，生出黎有佢咁既外形同學識已經係一種幸運。
 


「係既幸運女神。」
 
唔知係因為衣著既關係，定真係心理作用，我覺得Michelle對比起我半年月前啱啱識佢果陣肥咗少少，V臉變包包面，著住絲襪既佢話唔怕凍，但都睇到佢小腿長肉，依然係一個靚女。
 
「話說，無見你一排，你好似肥咗咁既？」我好誠實咁講咗心入面果句說話。
 
「咩野肥呀！」我好似講中咗Michelle既死穴，佢即刻燥燥地。
 
「塊臉由好尖既性感V面變咗可愛包包面，等哥哥Meet下。」咁真係肥咗阿嘛，我都係講真心果句。果然女人都係小氣。。
 


「唔要呀！」Michelle好嫌棄咁話：「你咪一樣肥咗！」
 
「邊有，我毒撚係荷蘭成日都做運動，啲肌肉勁咗就真。唔信你摸下啦。」我伸出手臂，9up咁講。
 
Michelle望住我既手臂一臉不屑：「我唔理呀，你要同我道歉。」
 
我都係講事實姐，咁都要人道歉，傻的嗎，道歉既係傻仔。
 
跟住佢真係黑晒面唔理我。
 
頂，講兩句都嬲，一句話佢肥啲港女格又現形，已經好少見去緊旅行都仲要咁樣，發脾氣返屋企啦八婆。
 
我Feel到呢個Trip有排受Michelle既脾氣，好彩既係，只係需要受多十二日姐，返到香港，你睇下我理唔理你。
 
「我有啲眼訓，休息下先。」我係唔會道歉的。


 
 呢個故事教訓我地，唔好隨便話D女仔肥，由其係D好有自尊心好顧形象既女仔，佢地面皮簿過紙，會嬲的。。
 
『喂！』我差D慣性咁喂咗Michelle一下，好彩忍住咗，唔係佢又嬲。
 
「Michelle，呢個站落車啦。」我同Michelle喺藍湖酒店落車。
 
周圍被一堆西蘭花形狀又綠又啡既石頭包圍。唔知因為寒冷既天氣，定係周圍既顏色都比較乾枯，冰島俾我既感覺，有一種無法形容既霸氣。望係不遠處有一座好矮既小山丘，溫泉既煙飄到周圍都係。

呢度唔係溫泉區，人影都唔見一個，我同Michelle去咗個仙境咁唔實在。
 
地面都係碎石，所以我就抬起兩個o急抬行去幾分鐘距離既酒店。
 
黑色工廠風石屎外牆既正方形屋仔，再配以木製既傢俬同埋歐美風格既簡單裝修，望住落地玻璃窗外既美景，好Chill。
 


體感溫度大約零度，而且室內都有暖氣，其實冰島都唔係想像中咁凍。
 
每去一個國家，都會被佢既風格所吸引同驚嘆，人類係貪新忘舊既動物，之前覺得荷蘭有幾正，通通都拋在腦後。