一個書生既Player故事: 一九三

今日係酒吧度，有個稀客出現。
 
佢係一個可愛型既妹妹仔，細細粒，眼大大水汪汪，狗仔眼好似幾鐘意撤嬌既類型。
 
點解要特別講佢？
 
因為個女仔自己一個，著住家居頹Tee加運動長褲，踢住拖鞋拎住部電腦落黎。
 
佢入黎話：「一位。可唔可以坐果邊？」
 


佢指住一個比較自閉同陰暗既角落位。
 
我忍唔住問佢：「小姐，你夠唔夠十八歲嫁？」
 
個女仔反一反白眼，好串咁話：「緊係夠啦！」
 
「麻煩你拎張身份證黎睇睇。」我廢時有警察黎查牌。
 
佢一臉「妖，呢條友咁煩」既樣摷銀包。
 


望下張身份證，佢同我同年，即係夠十八歲，個樣咁細個，真係睇唔出。
 
「張－翠－珊」，我忍唔住讀佢個名出黎，笑咗。
 
「你屋企人肯定好鐘意睇倚天屠龍記。」我話：「呢邊請。」
 
我帶佢去咗佢想要既自閉位，拎咗個Menu俾佢就行開咗。
 
 
轉頭返去，我見到張翠珊開咗部Notebook放係枱面。


 
Wtf？我心諗。
 
佢係度做乜鳩？
 
一個人著拖鞋落黎TST既酒吧都好新奇，仲要拎住部Notebook。
 
 
「想飲咩？」我過去問佢。
 
「一Draught 1664 Blanc 」
 
「係咁多？OK」我好想撩佢講野，不過而家係咁講好似太過份。
 
咁我就唔講咁多，幫佢落單。


 
 
「1664 Balnc.」我送上去佢張枱，只見佢張枱上充斥住算草紙。
 
 
我返去水吧同Mavis討論啱啱果個張翠珊。
 
「你估老細見到會唔會趕走佢。」我話。
 
「應該唔會掛。」Mavis話。
 
「但一間咁嘈既酒吧有人係度溫書做功課，好煞風景。」
 
「但佢成功吸引到你注意力。」
 


「大佬，佢咁既樣好難唔留意佢喎。」
 
「佢做緊咩功課？派你去收下風。」
 
「好呀。」反正今日老闆唔係度，我可以放肆少少，撩下客傾計。
 
 
 
我走埋去，見張翠珊埋頭苦幹緊係度寫野。
 
我問佢：「洗唔洗拎多盞枱頭燈俾你，好似好暗咁。」
 
「好喎，我好有需要。」張翠珊毫不客氣。
 
我隨便將早已預備既燈仔由背段拎出黎。


 
「唔該。」
 
「你計緊咩數？睇下我幫唔幫到你？」
 
「讀緊補底班物理，呢份Assignment聽日Deadline。」
 
佢轉頭俾個芒我睇，睇標題原來係讀HD既工程，題目係一堆中三程度既入門Physics，仲要係MC。
 
「MC你亂撞咪得囉。」我話。
 
「我都想，要寫Steps交，邊度識姐。」
 
「我幫你計幾條啦。」雖然我讀商科出身，但初班Physics都難唔到我既。
 


「真係？咁你都識？」
 
趁無乜人留意到我，坐係佢格離，就開始計數。
 
基本力學拆下F既Component，Easy！
 
計Acceleration既Rate，Easy！
 
以下邊樣唔包括於Conservation law，又係幾秒做完既選擇題。
 
短短十分鐘已經幫佢做完剩底果十條。
 
「嘩你係學霸神童黎嫁？咁快做完！」
 
「你睇下Note。。全部有教。。」
 
「我都唔係讀書材料！」
 
我心諗，咁簡單有晒Example就咁Sub啲數落條式度都唔識，好明顯佢連啲Note睇都未睇過！激死！
 
「肯讀就識嫁啦。你住呢頭嫁？」
 
「係呀，我住係對面咋嘛。」
 
「點解唔係屋企做，要落黎既？」
 
「屋企太靜，我會訓著。」
 
「但呢度唔會太嘈咩？」
 
「嘈好過靜。」
 
「原來如此。有趣有趣。咁你加油啦。我再幫你fill啲花生。」
 
「唔該晒你。」
 
我對張翠珊露出招牌笑容。
 
 
我將啱啱既對話同Mavis講，佢都不禁嘖嘖稱奇。
 
過咗兩個幾鐘，人群開始散去，張翠珊先至斯斯然咁叫埋單。
 
「得閒多啲落黎玩。」我同佢講。
 
「好呀。拜拜。」
 
就係咁，張翠珊喺我既視線範圍消失咗。