一個書生既Player故事: 一五一

「靜宜。。」

我同Cammi跟實靜宜，驚佢做咗咩傻事。

佢行咗去一張長凳度，坐底就喊。

我真係唔知講乜去安慰靜宜。

「你地平時D O Camp真係玩咁癲？」我問Cammi。



「唔係阿。。你見我地都無咁對你地。。果個唔係我地D組爸媽黎，應該係老鬼。」

「老鬼有無惡到可以咁騎劫法呀？」我問。

「你岩岩都見啦，佢幾惡呀。又無人知佢點解會入咗黎，趕又趕唔走。」

「咁都唔係咁嫁。單野推咗出去上硬報。」

Cammi一定心諗，你而家就聲大大，正話又唔幫口？



Cammi拎咗D濕紙巾出黎，好溫柔咁幫靜宜抹頭髮：「佢正話真係過份咗。。我地身為組爸媽都無好好保護到你，好對唔住。。」

聽完覺得好假惺惺，但這就是人性。

「我想出Camp。」靜宜喊住咁話。

「。。。但而家無晒車，你夜媽媽一個女仔出Camp會好危險。」

而家係Camp入面都唔見得好安全。



「係囉。要出一係聽朝先出啦。」我俾意見靜宜。

「可能我太玻璃心，我唔Expect入Camp會受到咁既對待。。」

「報細O可能無玩得咁癲。水會出名癲嫁啦，你黎錯Camp啦。」我話。

阿東跑住過黎搵我地：「岩岩同莊員講咗，佢話果個女仔係個好Mean大把都唔鐘意既老鬼黎，唔知點解入咗黎又拎咗件Tee去換。莊員知咗之後同個老鬼嘈咗一大輪，而家同Camp site D人講咗要趕佢走Blacklist佢。件事解決咗啦。」

「靜宜話想聽日出Camp。」我重覆。

「個老鬼走咗啦。靜宜，你信我啦，我保證唔會再有咁既情形出現。」阿東語氣肯定咁講。

靜宜都知呢個時候要走係好麻煩，所以唯有應承我地唔走住。

「聽朝起身先再決定啦。」我同靜宜講。



唔知點解我要做埋組爸媽既果份。

「抖陣我地返去啦。你早D訓啦。」Cammi話。


我地三個陪佢坐咗大約半個鐘，就返房。

靜宜去浴室沖多次涼，就自己一個返房訓教。

而Fm們就好似咩事都無發生過一樣，繼續玩通頂。