一個書生既Player故事: 一四八
「夜行D Game有咩要準備？首先。。你地要Pair up一男一女。」組爸Eric同我地講。
我秒速Pair up咗企係我格離既靜香：「靜香，我地一組好無？」
其實同邊個Pair我都無乜所謂，重點係唔好做毒撚單丁，哈哈。
「好呀。」靜香好爽快咁接受咗。而Parsons則搵咗佢格離既Nancy。
我地既手圈上紙圈。「記得唔好整爛紙圈，要入最恐怖鬼屋嫁！」OC話。
成個Dorm去唔同既Check point解謎，等待OC既指示，分批等做Task。
見到一對對Fm分批上山，漸漸消失於我地既眼前，唔知Task既內容有咩玩呢？
係等待既期間，組爸Eric分享佢既故事：「一年前我做水會Fm既時候，個Camp都係喺長洲搞。你知啦長洲出名猛鬼，我地果陣食完飯唔係Camp site入面，而係出返去最猛既東堤做Task。」
「下。」Fm同我一齊抖大氣，繼續聽佢講落去：「我同個女仔一齊行入去窄巷做Task攞野，照道理呢個時間清晒場，只得OC係到嫁嘛。我一路講鬼故，一路就見到有著住紅衣既女人行過。我地以為係OC仲叫佢OC、OC。」
「個OC無理我地，直行直過。我地以為係OC扮野。事後同組爸媽講起，咁岩有莊員行過，佢地話無紅衣女既裝束，暗示我地見到既野唔係OC。嚇到我地組唔敢再講鬼故。完咗個O Camp，我同個女仔都發燒，病足一個禮拜。你話驚唔驚？」
「係真唔係呀。」Parsons質疑Eric講既野係吹水。其實我都覺得係假。
「話咗真人真事！」
「丫！！」突然就聽到山上面有個女仔尖叫，應該係我地既組員。
「書生，靜宜，到你地啦。」OC揮手叫我地。
我地行前大約20步，去到轉角見唔到組員既地方。
果度有個女OC俾Task我地做，佢用好恐怖既阿婆聲俾Task我地：「你拎住呢個碗，一路行上山一路敲，話：『返黎啦。返黎啦。』，全程大約五分鐘，中間見到有紅色螢光棒就係放置提示物件既地方，要拎住行到頂俾OC。」
我心諗，係長洲敲碗，玩咁大？
靜宜聽完之後好驚咁。
「夠鐘出發啦，你地記住，無論有咩事，都千祈唔好望返轉頭。」
「行啦。」我叫靜宜行，佢一副驚青又唔情願既樣子。
我地行上山，佢驚到粒聲都唔出，無人講野個感覺更加恐怖。
「做咩呀？你好驚阿？」我問佢。
「係。。係呀。。我最怕呢D。。仲要敲碗。。」
其實我都有少少驚。不過係女仔面前唔可以表現出黎咁樣衰。
「不如拖住行啦，我廢時條紙圈爛咗，陣間要入房打大佬。」
「嗯。」我就拖住靜宜。禮儀手黎，中間夾住個紙圈，唔係十指緊扣。
「OC話要敲碗，你拎隻碗過黎啦。」見佢咁驚，無理由唔玩嫁嘛。無事既。
「都無OC係度，唔敲都唔知啦。」
「係咪嫁，你試下另轉頭望下。」我同佢講。
「我唔敢望。」
「等我望啦。」我都有D驚，佢咁講得，應該有野嚇我地。
我另轉頭，見到有個OC係比較近既地方，長頭髮，佢摟住白色布，塊面化到白晒，我睇唔清楚佢個樣，但穩約見到佢口Up up唔知講D乜，但起度用好怨恨既眼神望住我，做出敲碗既動作，而我卻聽唔到任何敲碗既聲音。睇到我內心發毛。
「有D恐怖。。我建議你都係唔好望。。我地快快手行完，聽佢地講做Task啦。」
「我開始啦。」
「咯、咯、咯。。」我一路敲一路陰聲講：「返黎啦。。返黎啦。。」
「我地做緊Task嫁咋，有怪莫怪。。」靜宜講。
「咯、咯、咯。。」我繼續：「返黎啦。。返黎啦。。」
咁樣行咗大約兩分鐘。
「你覺唔覺得D咯咯聲，好似今日係船度Eric講個揭尾故咁？」
「咯、咯、咯。。」
「咯、咯、咯。。」
「唔知長洲呢個Camp site有無真係死過人呢？」
「夠啦。。唔好再講。。我真係好驚。。」
「哈哈，唔驚啦。」終於望到紅色螢光棒。
深夜咁既氣氛底下望到紅色螢光棒格外陰森。
不過想快D完就要快手去拎，陣間又要玩多次咪gg。
我拖住靜宜行過去，一望竟然係一把紅傘。大佬玩埋呢D野，好邪門。
「有怪莫怪。」我拎住把紅傘，繼續行上山。
「行快D啦書生。。」靜宜話。
我突然好認真咁望住靜宜後面，「靜宜。。你後面。。」
「做。。咩呀。。」靜宜驚到就黎喊咁：「你唔好再嚇我啦。求下你。」
「嘩！」我勁大聲嚇佢。
「丫！！」佢嚇到真係標咗眼淚水出黎。
「喂。。你真係喊嫁？。。Sor阿無諗過你真係會咁驚。。」好似玩得過份咗，我即刻道歉。
突然內心發毛，覺得有野望住自己。
我另轉一眼望，又見到果隻白衣OC係度面。佢依然係口Up up做緊敲碗既動作。
真係令人心寒。。
「唔玩啦，我地都係快D行啦。我諗前面個轉角就係終於，行多半分鐘就到啦。」
我就同靜宜行去做完呢個Task。
「點呀，正話驚唔驚？」Cammi組媽係終點等我地。
「驚呀。果隻白色野好得人驚。我都廢時同靜香講。」
「咩白色野？」
「另轉頭見到果隻喎。」
「下？我地見唔到既？」Parsons話。
「你地見唔到？咁你地尖叫D乜？」我問。
「有個著住迷彩衫既OC跟住我地，我地停底拎紅傘，佢就嚇到我地尖叫。」
「下。。我地無喎。。」
「會唔會係有幾個OC係度？」
「唔係啦，呢個Task應該得一個OC。」Cammi講。「你玩緊果斛，我見到佢上咗黎去廁所。。」
「屌。。好撚驚。。」
岩岩得我一個見到，靜宜又無去睇，到底係人定係。。？
真係無人知。。
唔怪得D人話，夜行唔好另轉頭。。