一個書生既Player故事: 一三三

升中五既日子，倒數住我地第一個公開試，整級既校園氣氛好唔同。
 
老師們由第一日開始就不停施壓、訓話，叫我地要努力讀書，攞唔攞到入大學既入場卷就睇今次，而你有無得留係原校升讀亦都係睇今次。
 
兩年前阿婷考果陣，我覺得係唔係原校升讀根本無所謂，因為學校無乜值得令我留戀既地方。但係江柏琪既出現，令我既睇法改變咗。
 
所以點解啲人成日話：成功男人既背後一定有一個女人。
 
因為如果唔係想俾到好既野女人，個男人點會咁努力？
 


我自己一個有時懶到飯都唔食，煮個頹面就算啦。
 
無興趣仲會特登走去學結他？唔會啦。
 
我好討厭讀書，但為咗要同江柏琪一齊，我會努力。
 
林書生既進步彷佛都係因為生命中出現既女人。
 
即使住係同一屋簷下，我都再無特別機會可以拖住江柏琪或者掂到佢，我地都無特登去提一齊既事。
 


江柏琪唔相信我會等佢。
 
唔緊要，就讀書等到入大學囉。
 
得把口講野叫呃蝦條，我對江柏琪講既野唔係吹水。
 
行動比起說話更加有說服力。
 
我好清楚要遇到下一個有Feel既人並唔容易，而且要注重學業拍拖心散晒都唔係好事，總總理由加埋，總之而家就唔好拍拖啦，我等得到的。