一個書生既Player故事: 一三四

呢兩年裡面，屋企人返過黎兩次。
 
兩次都係短短既一個星期。
 
為免麻煩，係知道屋企人返黎之前，我同江柏琪好大陣象執走晒佢房D女人野入櫃。
 
我仲搵咗貓貓幫手，叫江柏琪暫住係佢屋企。
 
先至發現佢放咗咁多無謂野係我屋企，東一樣、西一樣。
 


呢兩次搬屋之後，江柏琪無再將佢D周圍周圍擺。
 
佢將同類既野放晒係同一個地方，要執走係極方便。
 
彷彿隨時都可以搬離我屋企。
 
就好似上網D人話，第一份工你會擺好多野係Office；但隨住你轉工次數愈多，你唔知自己會留係度幾耐，通常只會擺隻杯呀、少少文具咁就算，方便你走既時候唔洗執一大餐。
 
唔知江柏琪係咪都係咁既心態呢？
 


就咁睇，又睇唔到跡象，因為佢同平時都無咩分別。
 
 
 
認真溫書既話，CE都唔係好難，係我可以Carry到既程度。
 
學校篩走咗近一半學生，好彩既係我地C班中中挺挺既學生肯爆下Seed都仲可以留係學校。
 
今次我再無好似小學咁，為咗個女仔而改變自己既選擇。
 


我入咗想入既商科班。江柏琪同羅嘉樂成績好過我，入咗理科班。陳詩詩同肥傑入咗文科班。
 
成績較差既王家欣同Vera已經唔夠分原校升讀。
 
 
 
Btw，Vera同肥傑自從轉咗校就真.分手。
 
理由係溫書忙碌，我就覺得佢係搵到新仔先會咁決絕同肥傑分手。
 
玩到成年貨仔都比我想像中耐啦。肥傑好傷心，我同佢講，傷心總會過去的，出而大好世界，咩人都有，你會搵到比佢更好的。
 
 
 
我地同班咗四年既好朋友都經歷第一次分離。


 
無咗班好朋友一齊上堂，經歷同一堆事，都唔係幾習慣。
 
不過都令我地多咗話題，我地Lunch都會分享自己班既大小事。
 
 
 
轉班後，認識咗好多以前唔同班既同學。
 
因為圈子已固定，新認識通常都係點頭之交，但會發現揀商科人既性格同風格同理科既人確係有少許唔同。
 
佢地普遍比較世界仔，快熟（唔慢熱），講野好得體，無論去到邊，好快就同人打成一片。
 
 
 


當同類人集合埋一齊，個分別就好突出。
 
以為自己同朋友們係同一類人，先至發現自己同朋友都可以好大分別。
 
分別係中性，無話好話好定唔好。
 
人類總係異中求同，又係同中求異。
 
好奇怪既生物。