一個書生既Player故事: 一三二
暑假就黎完既時候，我、羅嘉樂、肥傑都帶埋囡囡出黎沙灘Triple Dating黎作結。
一朝早就買咗一袋二袋野入石澳BBQ。
羅嘉樂、肥傑都幫囡囡拎重野，咁我份人咁Gentlemen呢，平時都習慣幫女仔拎野既。
我伸手向江柏琪袋野。
「唔洗呀，我自己拎得啦。」江柏琪拎住成袋丸同扒，又請我食檸檬。
「你女仔洗乜拎野嫁。」我話。
「你幫下羅嘉樂佢地拎咪得囉！」佢指住袋炭。其實我手度都有一包炭。
「妖，攞黎啦。」想幫你拎野都咁難！我一手搶咗佢袋丸唔俾佢再嘈。
「好煩呀你，唔俾人拎重野既！」江柏琪啤住我。
我都唔明點解永遠都要揀係大熱天時BBQ。
不過諗起有得睇到江柏琪著泳衣，就咩都抵晒啦。
佢地拍拖行路都會拖手或者攬住，相比之下，我同江柏琪兩個就有少少電燈膽既感覺。
女同學唔似得班哥哥姐姐網友，佢地唔會就咁著三點式，會著件鬆身衫係出面遮住。
江柏琪既身材正常，白白淨，走肥係令人舒服既。
不過胸就真係無乜，俾盡佢就得B。
唔緊要啦，著衫好睇嘛。女朋友Feel同SP要求係唔同。
反而姣婆Vera胸最大，而且白Tee入面又著螢光粉呢D咁搶眼既泳衣，濕咗水就見到晒。
非禮勿視呀。
陳詩詩就算啦，真係講都無興趣。
一齊BBQ、玩水射黎射去、掟下大家落水、埋沙呢D都係必做既事。
其他人都識游水，游晒去浮台。
得返我同佢仲留係岸邊游下游下，因為佢泳術一般，唔敢游過去。
「想唔想去浮台？」我問佢。
「想呀。」
「幫你願望成真。」
我捉住江柏琪隻手，拉佢游到去浮床。
我無學過拯瀝，不過感覺同救人差不多，因為我完全係拖住江柏琪個人既重量黎游，攰到想死咁。
「我走啦，拜拜。你留係度睇下風景啦。」我掉佢上浮台，扮晒野同佢講笑咁話走。
「頂你= =咁我點走呀。」佢好無奈咁話。
「你叫肥傑佢地幫你啦。」我指住係格離拍緊拖無視我地既兩對情侶。
「林書生你唔好咁衰啦！」羅嘉樂係格離笑我地。
「求我丫。」我好衰咁笑住同江柏琪講。
「收皮啦！踢你落水浸死你。」
「唔求，咁算囉。拜拜。」跟住我真係游走咗返沙灘，同佢勁揮手，抖陣先慢慢再返去浮台救佢。
就係咁樣打打鬧鬧就到咗夜晚。
「我地去小巴站排住隊住先。」江柏琪仲係女更衣室換衫沖身，陳詩詩同Vera已經搞掂出咗黎。
羅嘉樂佢地四個同我講，好兄弟真係俾晒機會我地。
林書生都唔好好利用真係愧對兄弟。
「得你既？其他人呢？」江柏琪出黎問我。
「你換衫咁慢，佢地出晒黎係小巴站排緊隊啦。」
「噢咁我地快D行過去啦。」
行去小巴站果條路程雖然好短，但係我地已經好晏，人已經唔多。
曬咗成日，疲倦放軟既身軀，聽住蟬既叫聲，山同街燈更添一層浪漫。
夏天應該係咁樣的，海邊、月光、青春、熱血。
我主動拖住江柏琪既手。
佢望一望我，無出聲亦都無反抗既意思。
由普通拖手變到十指緊扣。
我有種終於等到呢一刻既感覺。
我特登行到好慢好慢，希望可以拖住佢耐D。
無奈既係行去小巴站既距離真係好短好短，好似拖咗幾分鐘咁就完咗。
臨上車既時候，江柏琪主動甩開手。
我無開口同佢表白，我覺得佢會拒絕我，無謂做返當時溫梓柔傻傻問「我地係咪拍拖」既傻仔啦。
我地係小巴上面各自睇風景、禁電話，好尷尬。
江柏琪無令我難做，我地六個好正常無事發生過咁食埋晚飯，就各自解散返屋企。
我同佢返屋企果陣，我又主動拖住佢睇下咩反應。
佢依然無推開我，Fing開我由得我拖。
其實我唔諗住再講咩嫁啦，我知佢仲未接受到同我一齊，我只係想就咁拖住佢滿足下自己。
但係返到屋企，江柏琪係廳同我講：：「對唔住。。我真係未Ready拍拖住。。」
「我知。所以我都無講啲咩。」
「或者等我地過埋AL先諗，如果到時你仲想同我一齊既話。」
「你唔係唔鐘意我嫁。點解？」我非常冷靜，我試圖同佢溝通希望搵到頭緒。
「係我自己問題。我無安全感，我信唔到你。」
「係咪你聽得多人地講我所以先咁諗？」
「一部份係。同埋我覺得你條件好好，你應該搵個比我更好既人。」
「唉，你都唔明，我唔要咩條件更好既人，更好既女仔幾時都有，我淨係想要你姐。」同多幾個女仔交手就會明白，我真係唔需要條件好既女仔，只想要有Feel果個。
「我覺得同你一齊好大壓力，我又驚有一日會分手。見過太多人分手各此各
不相干，我會承受唔到。如果到時既關係更差，不如直頭唔好開始啦。」
「點解你係都要否定我姐？都未試過點知唔Work？」
「感性既人就係咁，要親身衰過先認命相信。用理性去諗下就知個問題！你咁好條件，咁多女仔追，好似果日見到丁丁同阿婷都咁正，你應該同果啲人一齊。你點會為咗我去放棄成個森林？」
江柏琪繼續：「我諗過好多野先拒絕你，係一個深思熟慮既決定，唔係是但嗡。再講，如果真係非我不可，你大可以等到中學畢業、甚至大學畢業之後先一齊。到時你先會玩夠想定。」
「你地啲女人真係麻系煩。鐘意就鐘意啦！諗咁多理由去阻止自己面對真實既諗法，咁樣就叫成熟咩？有無聽人講過，你到老只會後悔自己無做過啲咩，而唔會後悔自己做過啲咩。」
「就係唔想同你分手。」
咁你又俾我拖！係咪唔係拍拖都可以俾我扑呀？
如果係，我會好失望。
「。。。」我唔知點答佢。我唔可能迫佢，都無選擇既權利。
「我地冷靜下啦。」
十足十分手時會講既說話。
林書生，你都有今日啦。
或許我無咁既福氣可以同你一齊。
但同居既回憶一定係我人生最珍貴既時候，我會好好記住的。
「這都好 自小想拿到的全得到 如今我求不到才知道」
「愛若難以放進手裡 何不將這雙手放進心裡」