一個書生既Player故事: 一三零

想錫江柏琪被拒絕既晚上，原來佢入黎我房偷影我，係因為佢想叫醒我食晚飯。

竟然要一個病人掉返轉頭買外賣俾我食，真係說來慚愧。

咁講好似有啲Mean，不過江柏琪真係好有做工人既潛質，講咗要佢煮晚飯，真係每日都好有心機去諗晚餐既菜單。

果晚佢俾我嚇到拎咗個飯盒入房自己食飯。
咩料。。

家陣我林書生係怪獸咩？明明平時D女對住我自己送上門！



受到林書生萬千寵愛既江柏琪真係唔識貨。。

然後第二日訓醒，我地就變返平時咁，彷彿乜野事都無發生過。

唔係，係真係乜野事都無發生過！

我覺得江柏琪反應誇張咗少少。

唔通呢個死毒撚無拍過拖？





今日我出咗去搵羅嘉樂同肥傑打籃球。

我既心情有少許患得患失，一方面好開心同江柏琪有少少身體上既進展，另一方面又覺得自己被拒絕好失敗。。。

不過呢D心情只可以自己一個硬食。

唔開心果陣特別想去洩慾出火，我終於有D掛住丁丁同阿婷。。



但係我又唔想對江柏琪唔住。。

唔可以再搵人地扑野嫁啦。。



神奇既事發生了。

我返屋企，一打開門，就見到丁丁同阿婷坐咗係我屋企既梳化度。

「嘩頂，點解你兩條（撚樣）友無啦啦係我屋企出現既？」我一見到佢地即刻忍唔住大叫。

「Surprise～咁耐無見，係咪好掛住我地呢！」丁丁衝過黎攬住我，講完就錫咗我一啖，我則一副受難好無奈既樣子。



我輕輕推開佢：「咪住，我未Load到咩事，你兩個點入黎嫁？」搞乜撚野阿，我屋企係可以咁隨便俾人自出自入嫁咩，我真係燥咗。

「你個女朋友開門俾我地嫁囉。」阿婷話。

「佢唔係我女朋友。。」唉講落都一扚眼淚。「江柏琪呢？」

「佢係廚房煮緊野食。」阿婷話。

「個女仔唔係你女朋友，咁又上黎幫你煮野食既？」丁丁問。

「屋企人去咗旅行，咪搵個鐘點呀姐黎幫我執屋住野。好彩屋企人唔係度姐，你兩條友無啦啦衝上黎。」

「收皮啦林書生！」江柏琪聽到我話佢鐘點呀姐即刻係廚房大叫。果然佢一直係度偷聽緊我地講野，希望佢兩個唔好亂講野Troll咗我。

「平時你呀媽呢個時候都出咗去買餸都無人啦！阿婷黎咗我屋企玩，話好耐無見你好掛住你。Msg你又成日唔應機，咪唯有衝上黎！」



「Ok… 」我抹一把汗：「我終於搞清楚發生咩事。但今晚無買你餸。你地坐陣好走啦。」

「唔係哦，你個鐘點姐姐話煮埋我地飯。」阿婷笑笑口：「做乜咁快趕人走唔俾我地一齊玩？哦！你認真追緊人！」

「肯定係！唔係點會潛晒水！」同丁丁兩個八婆Mode一唱一和，我真係好想打柒佢地。

感覺好似有兩個去咗外國好煩既家姐，突然返咗屋企係度玩弄細佬咁。

「好煩呀你兩個。警告你兩個陣間唔好亂講野！」我細細聲講。

「咩話？我咩都聽唔到！」丁丁話。

江柏琪係廚房度拎咗啲碗碟出黎。平日唔幫手既我即刻狗衝入廚房，江柏琪無出聲。



唔，今日煮白汁硯意粉，蒜蓉包，仲有羅宋湯，不錯不錯。

「你地食先啦，唔洗等我地。」江柏琪一副媽媽相。

我地都坐底咗去食呢個死亡飯局，仲緊張過我偷偷地係屋企打丁。

「你地同林書生好熟嫁？」江柏琪扮作若無並事咁問。原來你咁想了解我麼？

「邊忽熟姐！」我好誇張咁答。今日我一定係傻咗！

「不知幾熟，丁丁係書生既小學同學，我呢就係佢師姐，中一就識佢啦。」拿，係度顯示自己識咗我幾耐既地位，想俾下馬威江柏琪。

「我。。係學校好似未見過你。。」江柏琪好似無乜自信。

阿婷：「原來你都係A中學？我CE之後轉咗校去B中學啦。」



「係呢，張俊傑呢排點呀？」丁丁轉移話題，又係度俾說話人聽，曬命識得我d Frd。

「肥傑同個八婆拍緊拖囉。」

「真係嫁！佢恨咗咁耐終於有拖拍，佢一定錫到個女仔燶啦。」

「唔止錫到燶，直頭係觀音兵咁，頂佢唔順。」

「個女仔咪識揀！唔通揀你做男朋友咩！」又燒埋落我度做乜。今日呢兩條友既出現真係立心不良。

江柏琪無啦啦加把咀：「係囉！又唔錫女仔啦，又成日媾女啦，又周圍食女啦。」

「你都知佢周圍食女？！林書生，你仲瞞住我地食過咩女？！」

「唔通周圍食完女又話你知咩。」我話：「又話掛住我想見我，而家審犯咁都唔知你地想點。」

「講下笑姐。咁認真做乜。鐘點姐姐我地講下笑嫁咋，林書生唔係D咁既人，好男仔黎既。」阿婷話。

係江柏琪面前我地唔會講到好Deep既事，於是整個晚上都係一堆好無營養既對話。