一個書生既Player故事: 一一六

「本來我買咗香氛蠟燭諗住點，結果掛住食炸雞都無點到。」

「炸雞既香味吸引過香薰啦。」佢講出吃貨既心聲，比起港女既林敏兒好太多！

「夜啦，不如今日我送你返去啦。」

「唔。。洗啦。。」江柏琪一臉尷尬。

「危險呀！我放心唔落俾你自己一個女仔返去，有咩事我點負責？」



我諗佢都好少出到咁夜，佢終於應承咗俾我送返去。

「我走先啦。多謝你咁遠送我返黎。」

我諗我知佢點解一直唔想我知佢住邊。

佢住係廢校附近一棟好殘舊、樓齡應該更六十既公屋。

即係你見到個外牆，已經覺得好污糟，唔會想入去。



我諗佢唔想人地知道佢窮。

學校有啲住唐樓、公屋既同學都唔係好想俾人知。

其實住公屋又有咩好自卑？

至少我唔會因爲佢無錢而唔鐘意佢。

江柏琪就係江柏琪，而唔係有錢既江柏琪或者無錢既江柏琪。



大佬，中四啦，識諗野嫁嘛，因為人地無錢而唔同佢玩，仲細咩！

更何況，而家我地有既錢都係痴屋企，並唔係靠我自己，只係一隻蛀米蟲（我唔會形容自己為二世祖既，我屋企都未有錢到咁既程度），啲人又有咩咁值得自豪去睇唔起人？

咁樣睇低人令自己有優越感係一樣幾咁幼稚而自卑既行為。不如攞你既身家同Bill Gates比，咪又係近乎零。

我一撚定唔會同呢啲人做朋友。

「拜拜。再約啦。Merry Christmas！」

我係樓下同江柏琪講。