一個書生既Player故事: 一一七

「呀仔，我地有啲野要同你講呀。」係一個悠閒睡到中午既早上，阿媽同阿爸無啦啦好認真咁叫我開家庭會議。 

「做咩？」
 
「你老豆咪係XX首飾公司既GM，最近法國總部有意係意大利Expand開第一間分店，就想你老豆去意大利幫手做兩年。」呀媽解釋。
 
「點解法國佬去意大利開分店要搵你呢？咁老豆你應承咗未呀？」
 
「話想搞D中國風既Project，所以想要華人。我未應承呀，想聽下你意見。」老豆話。
 


「你老豆過到去會升做法國部既管理層，講緊由香港六萬蚊人工加到十二萬一個月，連當地津貼、同埋公司花紅。比起係香港足足多一倍。」
 
「人工差咁遠。。」
 
「係香港人工低或者物價相對低姐。我老死個仔Fresh Grad係矽谷做都四萬蚊人工啦。當你去澳洲Working holiday做農夫，呢啲門檻咁低既工作都80蚊港紙一粒鐘。」
 
「咁我無理由唔支持你去啦。」我話。
 
「呀媽想跟埋老豆去意大利度生活，如果Ok會考慮移民去歐洲果邊。你會唔會想大學去歐洲度讀？」
 


「我。。就無乜興趣。。我鐘意留係香港多啲。」
 
「你諗下大學條路點行啦。唉，諗落都唔係好放心你一個人留係香港。我都係留返係度睇住你，無我煮飯食點得。」呀媽話。
 
「我下年升中五都要狂咪書準備考CE唔得閒理你，可能會嫌你煩添。你想飛去陪老豆咪一齊囉。」
 
「你真係OK？」呀媽好開心。一睇就知佢好想過下歐洲退休師奶生活啦，我都咁大個人唔洗呀媽咁貼身照顧啦。
 
「係呀。我叫你去呀。」我都唔想屋企人為左照顧我而放棄做佢想做既野。
​



「過埋個新年，應該三月倒就去嫁啦。。。」
 
「咁快。。」
 
「而家樓價仲算affordable，我地打算去之前買樓層收租代供。你呢個月同我地一齊去睇樓啦，如果唔移民歐洲，我地返香港就搬去新樓住。」呀爸話。
 
「哦。」
 
所以，是次家庭會議既重點係：呀爸同呀媽三月開始會去意大利兩年、我地要去買樓、屋企可能要移民歐洲、大學可能去外國讀。。
 
咁咪無得見江柏琪囉。。。