一個書生既Player故事: 四十一

「今晚去打波囉。」琴晚打完個靚丁就訓教。見放學無野做，我又邀請班兄弟一齊去打波。
「實好嫁。」羅嘉樂好快就應承左。

我：【BB 我今日留底響學校打波。陣間黎接你？】
敏敏：【唔洗啦。我係自修室溫書，都唔知會溫到幾點。】
我：【咁好啦。你加油啦。】

最近係林敏兒口中聽到「唔洗黎接我啦」好似已經係常態。我自己都習慣左，無預計過佢會答好。

都好既，少一分期待，就少一分失望。我地都要學習下將幻想同現實既距離拉近，要認知自己選擇既就係一個咁既人。




或者佢係唔想麻煩到我先咁講？

其實我問得你就代表我唔覺得黎搵你好麻煩啦，係咪？

同大半年前（或者兩個禮拜前糖痴豆）既林敏兒好唔同。

原來佢就係咁堅強唔需要我既女仔？



我想佢答好呀，你黎接我啦，我好攰好辛苦好掛住你呀，咁我會覺得有被需要既感覺，我係你面前就有存在既價值。

我同佢既關係總係一個極端既位置，要不Sweet到漏，要不就好似各不相干既普通朋友咁，忽冷忽熱。

咁樣係咪正常呢？其他人拍拖會唔會咁嫁呢？

定係佢係暑假已經俾我傷害到唔敢再放咁多心思落去呢？

我已經錯失左得到佢最熱烈既愛既時間？而我仲好似個傻仔咁後知後覺，默默等待付出更多。




今日既我打波打得特別落力，野野入波穿針。

蝴蝶效應係，就算幾微小既習慣，佢都可以為你帶來實實在在既影響。

就好似我既球技因練習而有所進步，身高都因為跳踴得多而增長左少許，琴日係更衣室度高，我就黎有170啦，都高左好幾cm。

而最近見林敏兒見得少，負能量有點多，撐唔住了。。。

蝴蝶效應底下，我為你悉心灌溉既熱情，又好似俾你既冷淡而扣減返，一切歸零，或者變負嗎？



「聽日林敏兒測驗Last day，我諗我又會潛水一排啦。」我預告定俾兄弟知。



「唉，有異性無人性。」羅嘉樂話：「又留返我同肥傑兩條棍係度格劍。」

「哈哈，我唔陪佢既話，會俾佢煩多兩錢重。」 以前既佢一定會好煩。。。

「睇佢個樣乖乖女女好純咁，估唔到又幾食得住你喎。」

佢補充：「對人好Ｄ啦。上次見完，我羅嘉樂鑒定左佢係好女仔。」

「我幾時有對佢唔好？」

「你成日都係嫁喎，人地一痴身就嫌人煩唔理人。」肥傑加把咀。「我有聽王家欣版本嫁，講你暑假點樣對林敏兒嫁。人地咁求你成個暑假都唔理人真係幫唔落。」你條粉腸手指拗出唔拗入。林敏兒D閪脾氣你又唔講下，換你試下俾條女咁Chur法啊。。。

我一Check 電話，就收到林敏兒既SMS。

敏敏：【我聽日約左家欣一齊行街><後日先見你好無？】


我：【好囉:( 】車，我有得揀唔好咩。唔通成個女人咁發脾氣叫你推左王家欣？

「而家佢唔得閒理我就真。考完聽日約王家欣行街都唔約我。」

「正啦屌，聽日又可以一齊打波。」

「日日打波有D悶。不如聽日落網吧打機。」

「Go lor.」

我並無出聲，默認咗聽日加入呢個網吧局。

我企返起身，好用力咁擲個籃球去球場既另一邊。

個籃球響亮地呯一聲，反彈落地下，「達。達。達。」，由上下跳動直至靜止，全場鴉雀無聲。



是日心情欠佳，無事勿擾。

其實，今日既我，比大半年前既我上心好多啦，我有改變到嫁，只係唔知你睇到幾多。

我都係掛住佢，想見下佢。

「夜啦，我去自修室搵下林敏兒。走先。」我拎起個背囊，留底肥傑同羅嘉樂就走咗。

咁諗可能會開心D－－世上既女仔都係口是心非，把口話唔好，但當佢見到你黎左搵佢，一定會笑逐顏開，洋溢住快樂甜蜜既表情既。我想見到佢開心既樣子，幫辛苦讀書既佢打打氣。