一個書生既Player故事: 四十二

去到自修室門口，我掃視全場一週。根據以往經驗，林敏兒都會係大約七點鬆就走，返屋企食飯。

我想俾個驚喜佢，點知佢又俾咗個驚喜我。

我見到林敏兒一路執書包，一路同隔離既男仔講野，有講有笑！

又係你呀何生？何諾軒條契弟！

點解你總係要係林敏兒身旁擾讓？你覺唔覺自己好似一隻（生得靚仔既）小強咁？即係有驚人頑強既生命力，無限血量打不死，而且無處不在，一俾我見到就神憎鬼厭，好撚想一個拖鞋掟埋去，殺撚死你呢條仆街，斷你後代，等你絕子絕孫，唔好再係我視線範圍入面出現。。。



但埋藏住心入面，有個都市恐懼，就係打唔死佢，然後扁左既佢彈返起身，帶住N隻小強大軍返黎搵我尋仇。以小強既驚人繁植能力，單靠N隻小強就可以將我嚇死，或者Phyiscally令我窒息而死。。。

往後見到何諾軒，可能會自動聯想埋小強既畫面。。。。

Sor9，好似重口味左。



林書生，你重點好似錯左！



重點係，點撚解你條仆街又同我個林敏兒一齊？

我沉住氣，上去同佢地正面挑機。

我走到林敏兒背後，一野攬住佢宣示主權，帶點霸氣咁話：「敏，你走未？」

佢嚇到成個人彈起，差D叫出聲：「書生。。你。。你係度既？」

佢尷尬咁望左我同何諾軒一眼：「我執緊野，準備走嫁啦。」



何諾軒一副失敗者既石像表情望住我地，講不出聲。

無錯，我就係想你難受。

睇住你想追既林敏兒俾我攬住，有咩感覺？

佢係屬於我既野，唔該你隻死狗公唔好打我條女既主意，過主啦你。

「我。。同書生走先啦。。Bye bye。」林敏兒同何諾軒道別，而我就拖住佢隻手離開自修室。



出到大街，我終於忍唔住Seed佢。

「你咁樣算係咩意思？明知我唔鐘意何諾軒仲成日同佢一齊？佢擺明車馬想追你啦，好心你做人女朋友就檢點下。」



「我邊有唔檢點姐！我地係自修室溫書咋嘛。」好彩唔係Study Bio，由乜易溫溫下溫到上張床度。

「係你約佢定佢約你？」我只想搞清楚件事係點。

「都無約。。但自修室撞到嫁咋。。」佢愈來愈激動同燥底，一定係講緊大話！又撞到？邊有咁容易係咁撞到？你搵既藉口可唔可以新鮮少少？已經唔係第一次。

「你俾部電話我睇。」

「唔要！點解要俾你睇？」

「佢一定有SMS約你。」

「無。」



「如果無野點解唔敢俾我睇？」

「如果你信我點解要睇我電話？知唔知咩係私穩？你唔俾我睇下？」林敏兒反駁我。

「你想既可以隨時拎黎睇。」我電話根本就無咩唔見得光。雖然去丁丁屋企既事我無同林敏兒講，但就算佢睇到都無問題，因為我地根本就無野，只得普通既對話，行得正企得正。

「拿黎。」我伸出手，好憤怒咁同林敏兒講。

應該係自派位之後，我第二次咁嬲。

佢怕左我，死死地氣將部電話交左俾我。

軒：【敏，你今日放學去唔去自修室溫書？】
敏：【去呀。】
軒：【想食咩？我買埋俾你。】


敏：【想食樂天熊仔餅^^】
軒：【好啦，老地方等。】
敏：【我就到啦，幫你霸埋位啦=p】
軒：【唔該晒】
軒：【林書生會唔會嬲嫁？】
敏：【我無話佢知。所以唔會。】

你呃竟然我。

仲要呃得咁理所當然。

上次你都係呃我嫁啦？

點解你可以咁樣？



女人既心係用咩造？

我好嬲。

亦都好失望。

原來我唔瞭解既林敏兒就係D咁既人。

知道一D我唔應該去知道既事，係要承受果種痛。

但係我對林敏兒係認真，我唔想咁易放棄。

所以，我一定要接受。



我深呼吸一口氣，將我準備發狂既心情壓下去。

「你竟然呃我。我對你好失望。」

「。。。」林敏兒雙眼望住地下，陷入一片靜寂。

「我唔要再見到你同佢聯絡或者見面。後果自負。」

「。。。」林敏兒黑面，亦無諗住道歉。行前幾步，好怨恨咁望住我：「我聽日測驗。我唔想同你嘈。你好幼稚。再見。」

講完，佢就頭也不回，好嬲咁走左。

明明就係佢唔岩，點解而家好似我做錯咁？

佢係咪傻撚左？

呢條女真係痴撚線。