一個書生既Player故事: 二十二
Last day件事之後至今已經兩個禮拜，我唔敢亦都唔想搵林敏兒。我想靜思己過，反省同埋思考人生，當放個break俾大家。
我覺得自己係一個衰人，搞到佢咁傷心，我無面目去見林敏兒。
林敏兒應該搵個更好、可以令佢開心笑既男仔一齊。
嗯。
所以我都係唔好再搵佢啦。
係屋企同我一樣無所事事既媽媽撩我傾計：「仔，你last day完咁耐，就留係屋企咁耐。不如你搵D朋友出街玩下啦，或者做下運動都好，唔好日日係淨係打機。」
「哦。知嫁啦。」我一路玩跑Online，一路望住個Mon。其實我唔係唔想出，只係無乜朋友，亦無乜心情出去，打下機麻醉下自己仲好。
「見你呢排唔係幾開心咁。你個林敏兒呢？」八卦既呀媽問我。
「我無唔開心喎。我同佢唔係好熟嫁咋。」我死撐。
「哦，原來你同個女仔鬧左架。」果然無野瞞到呀媽。（其實係我將D野寫晒係塊面度太易估姐）
「關你咩事姐。」好煩呀你。
「細路仔玩泥沙，鬧下架好快就無事啦。唔洗咁放上心。」
咩好快就無事？唔好咁放上心？你知D咩？你都唔知我同佢之間發生過既事。講到自己咩都知咁。
「得啦，唔好煩我。」
「傻仔。」呀媽笑而不語，搵手敲一敲我個頭就走左。
【你有 1 個新訊息。】
係好耐都無響過既電話呀。。。
我一見到就好緊張開黎睇，到底會唔會係林敏兒send黎嫁呢？
好可惜唔係。
原來係丁丁搵我。
丁丁：【書生，你做緊咩呀？】
我：【打機】
丁丁：【同呀傑玩緊彩虹？】
我：【唔係呀，玩緊跑online】
丁丁：【我曬左last day d相呀。不如我拎上黎俾你？】
我：【唔洗啦，廢時麻煩到你啦。】下，老母係度又問長短，同你又唔係咁熟，唔好煩啦。
丁丁：【咁你而家落黎攞？】
我：【都得，你等我打埋呢舗先。】
丁丁：【OK. 唔好玩咁耐呀，我訓著左就唔理你嫁啦.】
呢個丁丁暗戀我既動機實在太明顯，成日都約我單獨見面。橫掂我都咁耐無見過人，搵佢傾下計開解下我都係好事。 我打完場跑online，衫都無換一個街坊look踢拖就落街。
「媽，我落一落街搵同學。」講完就準備動身離開。
「唔好著拖鞋啦仔。肉酸呀。」呀媽話。
「會咩？」都係見丁丁，著幾頹都無咩所謂啦。
「早啲返黎呀！」
「得啦。」說罷就開門離去。
正所謂近水樓台先得月，住咁近真係非常方便，我只要行出家門幾步，等個lift，五分鐘都唔洗就可以去到丁丁屋企，仲快過你係百寶袋搵隨意門。如果林敏兒都同我住同一座大廈就好啦。雖然同佢幾街之隔，但都好似好遙遠咁。唔特登搵，就真係唔會見到。。不過毒撚淨係留係屋企見唔到都好合理既。
好似丁丁咁，如果佢唔主動搵我，會有機會見到我咩？答案係唔會。如果當初無靠近林敏兒，都唔會有之後既故事。所以，緣份係人為的，做人真係唔可以下下等運到。緣份黎到，你唔主動去把握都係無用。
我企係丁丁屋企門口，深呼吸咗幾秒先敢禁鐘。呢啲係咪叫禁鐘仔？呵呵。
「叮噹。」清脆既門鈴聲係我耳邊響起。
「哈佬。入黎啦。」丁丁用好燦爛既笑容黎迎接我。著住一件卡通tee，一條沙灘短褲黎開門。佢俾人感覺依然好fresh好陽光。
環顧四周，佢間屋好靚，純白色裝修，地下D白色地磚令立立，俾人感覺好似佢一樣，既舒服又齊整。
我有D尷尬同緊張，好端正咁坐係大廳既米色梳化，雙手仲要放係大脾度，劇毒指數三粒星。
「喂，放鬆D啦。我屋企人都唔係度，唔洗咁驚。」仲驚。。。講笑。。。林書生你係度期待緊咩事既發生？
「無人仲驚。。」我細細聲講。
「驚咩？」丁丁好似扮貓咁，mau係我而前，由下而上咁望住我不特止，仲要哄埋黎，輕聲問我：「驚我溶左你？」
我。。。。。。。。
個心卜卜、卜卜咁跳，好緊張。。。。。。
我吞一吞口水：「唔好玩啦。係都我溶左你啦。」
我知我既表情已經出賣左我既緊張。
「都岩。」丁丁企起身R頭，去左枱面拎左本相簿。
「你睇下我果日影既相。」
大多數都係MK自拍，嘟晒咀又伸埋V 咁，無乜特別。佢皮膚都幾好，部相機咁近都影唔到毛孔或者暗瘡。望到係我同佢既自拍。。。。見到自己同女仔影咁親密既合照，感覺好奇怪。
「呢幾張曬多左俾你嫁。我係咪好好人呢？記得貼係間房度喎。」丁丁俾左張相我。
「嗯。」對住佢，真係有D唔知講咩好。。
「嗯？講完嫁啦？」
「係呀。唔係仲以為要講D咩？」
我見到仲有一本相簿係度，諗住拎黎睇。
點知丁丁好快速咁禁住我隻手，話唔俾我睇。
「你真係要睇？」佢咁講令我好好奇，更加想睇。
「唔見得光又擺出黎，玩野呀。」我話。
我輕輕移開佢隻手，就打開本野黎睇。入面全部都係丁丁既相，好日系，有啲o靚模寫真feel，部份相都幾性感。有著住吊帶裙碌大對眼卡哇伊呢既相，有戴住cap帽係公園影既相。
雖然丁丁個樣好清純好細個，但同同齡既人比，佢有種成熟老練，做既野同講野都唔似呢個年齡。
「唔，呢張你個笑容好僵硬。。」
「呢張個角度攞得幾好，可以記住。」
我扮晒專家咁鑑賞啲相鳩俾評語，丁丁就一路好怕醜咁遮住塊面，好得意。
我睇完啲相，丁丁問我：「你飲唔飲果汁？」
我：「唔洗啦。。」
無論我點r野講，氣氛都仲係好尷尬。。。
我諗我都係唔適合上人地屋企玩。。。
屌，我好想返屋企打機。。。
正當我諗住走既時候，丁丁無啦啦提議話：「林書生，不如你幫我影相呀？」
我：「下？幾時？」
丁丁：「而家。我入去換衫先。」
？？？？？？？
講完，丁丁就入房換衫。我有少少驚訝，佢呢個人既行動力真係非常之高，講完就即刻要做。
丁丁入咗房接近十五分鐘都未出黎。
想點呀，換件衫姐洗唔洗咁耐。
佢想係邊度影相？我應該要點影先靚？
事實上我只係間中見老豆影相，自己根本就唔識影。唔識又扮識，陣間咪拎黎柒囉。
丁丁終於出黎啦。女仔真係呢，點解換件衫都要換咁耐？
佢換咗件黑白間條背心，帶住條星星鏈，加條紅色格仔短裙，少少rock都幾young。係著得靚既。
我唔知俾咩反應佢。
「Er... 丁丁，咁你想係邊度影？」
「屋企囉！」
「。。屋企影靚咩？」
「咁要考下攝影師同model既功力啦。」
講完，丁丁就坐係大廳張白色飯枱前，托住頭繞晒腳chok晒樣咁叫我影。
我想講！以我正常人既審美觀睇，係呢度影真係唔靚囉！
丁丁要求好多，每張相既角度佢都心裡有數，無論我點擺部機佢都唔滿意，再重新指導我點擺。我都照聽住佢講咁影。都好，咁唔洗俾佢覺得我唔識影相。佢好似個client，我就好似個員工咁，係咁俾佢點。
「你啲手手腳試下自然啲，呢個Pose有啲假。」我都有提醒佢，希望佢可以改進一下。
佢轉pose跪起個地下度，扮住個無辜樣。。好吸引人。。
唔知點解我一路都好緊張，好辛苦，好不知所措。。。
「哈哈，書生你影相影得幾好～你睇下。都話係屋企都可以影到靚相嫁啦。」丁丁話。
我對住佢露出一個滿意既微笑。
「我夠鐘返屋企食飯啦。」我同丁丁講，都起身著鞋準備離開。
「好啦。咁。。。下次你再幫我影啦？」
「。。。好呀。」
丁丁送到我出Lift口，揮住手同我講：「拜拜。再傾啦。」
「拜拜。」
Lift關上門，我隨即放鬆，抖左啖大氣。
好緊張。。。
腦入面不停回想剛剛影相既時刻。。。
我唔鐘意呢種感覺，但又覺得好想繼續落去，唔想離開好誘人既佢。。。
呢種感覺應該點形容？。。。。
令人小鹿亂撞，個心好混亂。。。