一個書生既Player故事: 二十一
Last day不停影下相，同以前識既人吹下水咁就落幕。
就好似晒你冷，俾你睇下呢幾年係學校生涯留過既腳毛。
我、林敏兒、王家欣、肥傑、何諾軒5個一齊進行最後的放學儀式。
我開到聲話要單獨送林敏兒返屋企，撇甩左其他人，剩返我地兩個係佢屋企樓下。
「敏敏，我送份禮物俾你呀。」林敏兒瞳孔當場放大，感到既開心又期待。
我係書包拎左我張寫住「中學見」既紀念冊俾佢。
「暑假未必日日可以見到買冰紅茶俾你，但有我張紀念冊陪你，入面包含左我既心意嫁。」我真誠咁講。
林敏兒拎左張字就反轉睇我寫俾佢既野。
當佢見到只得「中學見」三隻字果陣，佢個樣有D無奈。
「下？你真係寫3隻字嫁咋？林書生，你唔好再Hea d！」
林敏兒經歷緊心理學入面「自我防衛機制」既否認狀態中，大概係唔敢相信我會俾份咁頹既禮物佢？
「我唔係Hea寫嫁，呢三隻字我諗左好耐先寫落去嫁。」我真心地解釋。
「一生人得一次小學畢業咋，你都咁頹。。。」林敏兒話。
「車，咁第日都會見到嫁啦。仲有，以我同你既成績實一齊入到A中學既。」我回答。
林敏兒個樣有D失望又有D嬲。
佢黑住面咁係袋度拎左條手帶既物體出黎，遞俾我。
「咩黎嫁？手帶？」我問。
「腳繩黎嫁。男仔呢Cool係隻腳度好好睇嫁。」條腳繩好幼，係黑色繩，中間穿住，我拎住條腳繩上下打量，我真係第一次見呢D潮流玩意。
「多謝。」我微笑住同佢講。
「我親手織嫁。。要好好保存呀。。」林敏兒沒好氣，一副俾你激死既樣咁話，同埋俾左佢既紀念冊我。
「咁。。我走啦。。」林敏兒話。
「嗯。Bye Bye。」
林敏兒有D唔捨得，好緩慢咁行入去大廈。
我繼續企係度目送林敏兒入大廈。
今日係一個特別日子，因為會係我最後一日同佢係呢間小學送佢返屋企。
我突然想見多佢幾面。唔想佢咁快走。
「喂。」我大叫：「林敏兒。」
佢停左係門口，但又唔另轉頭。
「做咩唔另轉頭呀你？」我有點不解。我走過去林敏兒面前。
林敏兒既臉上出現兩行淚痕。
原來佢係度喊緊。
我即刻有D不知所措，好溫柔咁摸住佢個頭話：「傻妹，你做咩又喊呀。。你係咪嬲我份寫張紀念冊寫得太頹呀？」
「唔係。。。」林敏兒好細聲咁講：「我。。唔捨得你。。。」
「傻妹。。。我地一定會升到同一間中學嫁嘛。。。」
「世界上既野邊有一定呢回事。。。如果。。我地升唔到同一間咁點算？」
我都明唔係必然。要升邊間中學，我都控制唔到。
「升唔到同一間我會轉校黎陪你！轉校之前，我就日日黎接你落堂，接到你嫌煩唔想見我為止。星期六日都陪晒你。」
「唔會嫁！！你唔會！！你一定會鐘意左第二個人！！」佢愈講愈喊多兩錢重。不過今日我唔覺得佢煩，我好似理解到佢既憂慮。
愈鐘意一個人，就會愈緊張佢，驚失去佢。對於唔明朗又控制唔到既未來有種無力感，見到我身邊又有幾個相熟既女性朋友，就會擔心會唔會因為理第二個人而冷落左自己。『而家既生活已經好滿足啦，亦都習慣左』既心態存在；所以，當生活模式、圈子有重大既改變，對於一個安穩性格既學生仔係好大既壓力。
只係，我係佢眼中對佢係咁吊兒郎噹唔認真咩？明明我既生活都係圍繞住佢轉，得佢一個，我都會幻想以後一齊生活落去既畫面，好實在，我亦好期待。偶爾會覺得佢好煩，不過都只係把口講下呻下姐，話完你煩，轉個頭咪又係會搵返你。係我對佢愈來愈有信心既同時，佢就掉返轉，佢唔信任我既態度都令我有D失望。。
「我唔會鐘意第二個。點解你要對我咁無信心姐？」
「我都唔知。同你調位之後傾少左，你又理少左我。電視劇入面D男人個個都會變心。」又黎，搞到我個人都燥燥地。我想講，我咩都無做過俾你咁講好無辜，D電視劇睇壞腦嫁，好心你D女仔唔好睇咁多當真，咁同D女仔發夢見到男仔出軌就鬧佢唔岩有乜分別？
「我唔會囉，我唔同佢地。我一個禮拜七日由朝到黑都俾晒你，咁多時間，都仲會假？」
「可能你自己都唔知呢。世事既野，好多時都唔到我地控制。」佢若有所思咁講。
突然，身體不受控制咁。
我好有衝動攬住佢。
好想好想。
無思考既時間，我對手仲快過我個腦，已經將佢攬住係我懷裡面。
佢個頭到我肩膀既高度。
我感覺到佢好緊張，全身都硬晒唔夠膽郁。
時間好似靜左落黎咁。
「。。。」
佢好怕醜咁dub低個頭唔出聲。
其實我都有D怕醜，唔夠膽望佢。
「你諗得太複雜。」
「你真係feel唔到我對你係點咩？你俾D信心自己就得。」我同佢講。
「嗯。」佢無郁都無俾咩反應我。
我靜靜攬多佢一陣就放開左手。
佢唔敢望我，頭也不回一野跑入去大廈度。
我望住佢行入大廈，直頭背影都消失再見唔到先離開。
我望住林敏兒寫既紀念冊，佢用唔同顏色既筆寫到張紙滿晒，密密麻麻。
仲畫左D心心係側邊做裝飾。
【喜歡的顏色－－－－－－粉紅色】
【喜歡的卡通人物－－－－唐老鴨】呢D野，我從來都唔知，亦都無留意過。。
【喜歡的人－－－－－－－林書生】
留言：
『多謝你這一年來對我的照顧！雖然我經常嘴硬，口裡說著討厭你，不想理你了，又常常哭，脾氣很壞。但事實是我不是這樣想的，一切關於你的大小事我都看在眼內，我喜歡你在我身邊出現，我喜歡你每天都買冰紅茶給我，要知道女生都愛口不對心阿。你令我在平凡又日復一日的學生生活中找到動力，讓我每天都好期待也好想上學，因為上學就能夠見到你。希望畢業後我們仍然像從前一樣，每天上學都黏在一起，晚上回家又聊電話，這樣就足夠了。你是一個很聰慧的男生，相信你進了中學也能發揮到所長，有很好的成就。祝你前程似錦。」
佢就係寫左咁多野俾我。
收到親手整既腳繩，入面帶住既係佢既努力，同埋想令我開心既心意，好感動。。
其實林敏兒都幾錫我，仲會親手整禮物俾我。。。
相比之下我寫返俾佢張頹紀念冊，有D失色，真係唔好意思。。。
同之前玩整喊佢唔同，之前我會覺得佢喊但係滿足既，今次既佢係發自心底，而令佢唔開心既原因係我。
作為男仔既粗心大意我，完全無考慮過last day既意義，無好好準備過禮物同心意俾自己鐘意既女仔，帶唔到一個好既結尾俾佢，仲搞到佢唔開心到喊，真係好無用。
我答應我自己，以後一定要企起佢角度諗多D，令佢開心D。
因為無經驗，做咩都好生疏。
初戀，總係會帶點遺憾。
這就是我們小學的Last day，但這不會是我們的Last，因為我們還要一起走到很遠的地方。