我被初戀女友瘋狂報復: 第五話

「依個係由其他學校轉過嚟既轉校生,叫羅小柔。」班主任Miss Chan介紹身邊既短髮女孩,佢有一雙大眼睛,身材瘦削(可以話係飛機場),但從佢眼神及表情卻睇唔出一絲親切,而且帶一啲倔強。
「你就坐係果度喇!」Miss Chan指住我隔離個吉位,於是新學年頭兩個月我就要照顧依個轉校生嘞,但係...
「你可唔可以借支塗改液嚟呀?」依個係佢初初嚟果時同我講野既語氣。
「有無計數機呀?攞嚟喇!」一個月後,佢就露出真面目嘞,問題係佢全班淨係對我咁咋喎,自問我個樣唔算係好蛤果隻,點解呢?
「你樣衰掛?」志豪平淡既一句,卻勾起我既怒火,但礙於身體既差距,我唔敢爆粗。
的確,佢憑著開朗及男仔頭既性格令佢係男女同學既相處非常融洽,有啲女同學仲被佢吸引...
「你同林慧勤點呀?真係無得掹?」
「唔知呀?自從果次之後,佢都無搵我...」
「你搵人唔得既咩?」
「吓?」係喎...




其實件事係咁的...話說暑假應該享受陽光玩樂,訓到晏晝三四點,拋開讀書既煩惱壓力,好好享受...岔遠左添...話說世上有一樣野叫暑期作業,乖學生會一早做晒,壞學生會就快完暑假先搵人攞嚟抄,而我...就會搵人幫我做...邊個?
「求下你啦,我唔係全部都無做嫁,有做左啲嫁,你睇!」係暑假尾二果日,我苦苦哀求慧勤幫我做暑期作業,我仲作左個大話呃佢...
「你真係要探你姨媽?」佢有少少質疑我。
「我細個時佢好鍚我嫁!佢突然急病入左院,點我都要探下佢,照顧佢既!」事實係我姨媽係入左院,不過係生痔瘡,而我亦無探佢,我果次係約志豪成班踢波...
「咁好喇!」好耶!
或者個天都睇唔過眼要懲罰我,正當我踢完波返屋企時,咁啱就撞到係自修室出嚟既慧勤,佢見到我著住套污糟既波衫波褲,粒聲唔出就係袋度攞疊作業出嚟,跟住用疊作業一野車落我度,跟住一枝箭走左。本來我返屋企後就打俾佢道歉,點知聽到我把聲佢就cut我線,係學校仲要對我面左左唔理我...就係咁,我地差唔多一個月無講過野...
「你同佢講對唔住,佢可能原諒你呢!」
於是,我決定鼓起勇氣同佢道歉,但係假如係學校講被人睇到好似好無面咁,而咁啱今日體育堂跑河(所謂跑河係指沿住學校出面條河跑,大約6km左右),於是我就藉依次機會行動。由於男仔先出發既關係,我跑(行)左無幾遠就匿埋一邊等待女仔既出現。過左陣,目標出現...
「Hi,哈哈...今日天氣幾好呵...哈哈...」佢無視我繼續跑...
然而,佢想擺脫我,雙腳漸漸加速,但我都唔係省油既燈,我仲可以跟上。




「你...平時...有跑開嫁...唔喘氣既?」
我地兩個跑下跑下,本原前面有十幾個女生,漸漸變左淨返一個,而果個係羅小柔,估唔到轉校生運動咁好(可能飛機場無負擔)。
「你...可...唔可...以...停低...聽我...講野...」我已經上氣唔接下氣,但佢依然無停下腳步...
「你...聽...我...講...先...啦...」我已經跑得好辛苦,再加上講埋野,但佢都唔理我,令我一時氣上心頭...
「你唔好咁小器得唔得呀?」講完呢句,我已知我今次仆街了...
我地三個(三個?)同時停低腳步,慧勤即刻怒目對住我,「我小器?你連道歉都無就話我小器?好!我就小器俾你睇!」
佢大力推倒本來已經腳步浮浮既我,跟住跑返學校,而羅小柔就望住跌係地上既我,露出恥笑既表情,之後跑返學校,而我就帶住後悔既心情行返去。
「叫你道歉,結果你就火上加油,唉...」食晏果時我求救志豪佢地,結論係:「今次神仙都難救啊!」
「算吧喇你!你理返陣間默書先喇,背熟未呀?」啟明揸住本書一邊食一邊背。
「書要背既咩?事前準備我已經搞掂晒啦!」我得戚咁講。




所謂事前準備,就係我將要背默既內容抄係一張紙仔上藏係筆袋度,默書果時只要揭起少少筆袋個口就可以照直抄!當我攞個筆袋出嚟時,望住個黃色有隻鴨仔圖案既筆袋,發覺好似有啲唔妥,好似...乾淨左咁多既?我望過去坐係不遠處既慧勤,我同佢四目交投,佢嘴角撓起,係奸笑,跟住佢拎起我同佢一齊買既一模一樣情侶筆袋,我發現佢手上既先係我個筆袋,而我張貓紙...係佢度。
我太大意喇,仲以為萬無一失,估唔到...而家我只有憑著我尋晚抄貓紙僅有既記憶去默...神啊!請你給我尋晚既記憶啊!
結果...我淨係記得三句...
「嗱!俾返你!」放學後,慧勤將我同佢既筆袋調返轉,「你準備留堂補默喇,哈哈...」
睇住佢嘲笑我既背影漸漸走遠,雖然心有不甘,但我始終都無佢辦法,唯有盼望佢消左氣,遲啲可能會原諒我掛?
但係依啲只係我一廂情願既想法,而且事情先啱啱開始...