我被初戀女友瘋狂報復: 第四話

「我都係後尾睇返「假如愛有天意」先知有段類似既落雨戲...」返到現實,我地已坐係火車度,窗外既風景急速後退,就好似回憶咁一閃即逝...
「哈哈,我都以為拍緊戲...」成晚,我第一見到佢笑得咁純真,好似返左去以前咁...
「哈哈...由果套戲開始,我就由迷全智賢變左鍾意孫藝珍嘞...」
「哦!你咁就變心嘞!」佢表情帶點淘氣,真係令人個心都軟埋...
「咁套戲真係拍得佢好靚嘛...而且...佢仲好似...你呢...」我特登擰埋一面博佢聽唔到...
「邊係呢...佢靚好多...」我見到佢有少少面紅...
「其實果日我地都唔趕時間,點解我地要濕身走呢?」
「唔知呢?整定掛?不過唔係咁,你又點樣同我表白呢?」
「哈哈...可能真係假如愛有天意...」
「其實...同我一齊係唔係好辛苦?點解果時咁對我?」




「唔係...點會呢?同你一齊係我最開心既時間!」呢句真心既...
其實同慧勤一齊最大既壓力係因為佢成績太好(或者係我太差),如果用而家英超排行旁去比喻既話,佢同志華就屬於阿仙奴同車路士,而我同志豪就係新特蘭同侯城,基本上我係年年避免留班而奮鬥。就係咁,我同佢一齊去得最多既地方就係自修室嘞!
「起身喇...」好溫柔既聲音...
「起身喇...」好似天使一樣,我而家係天堂嗎?
「起身啊!」
「啊...」慧勤好大力咁扭我耳仔,我即刻痛醒,「甩喇...甩喇...嘩!估唔到你咁大力既,嗚...耳仔紅晒...」
「成日掛住訓!溫書喇,你想留班呀?」佢雖然壓低左音量,但從語氣仍感到佢既忿怒...
「係...唔想...」被佢篤中死穴添...
大家要明白,當一個平時唔努力溫書既人,面對自修室咁寧靜既環境,訓覺係無可避免既事,而我就有一個特別既提神方法...
「喂!你隻手點呀?想斬左佢呀?」我將手攬住佢條腰,不過隻手係上下移動咁啫。




「我想提神嘛,嚟啦...」我借啲依將個頭哄埋佢面度,結果被佢一手推開。
「自修室嚟嫁!有人睇住啊!仲有...」佢東張西望,真係驚有人睇到我地咁,「邊個俾你錫呀?」
我地雖然一齊左就快兩個月,但我地仲未咀對咀咁錫,極其量都係錫面同額頭。溫完書後,我地手拖手係公園散步順道送佢返屋企。
「林慧勤!」背後傳來一把男聲。
我地擰轉身一望,係一對著住我地校服既男女,根據身高,應該大我地兩三年...
「宏哥!」慧勤突然甩開我手,同個男既打朝呼,直覺話我知佢就係慧勤講果個高年級學長...
「咁啱呀?咦!依個係...哦!」學長望住我地,好似心領神會咁,可能佢地都做緊我地做緊既野...
「依個我同班同學,叫劉家雄呀!」慧勤轉向我講,「依個宏哥,平時佢好照顧我,教我做功課嫁!」
「叫我阿宏得嘞,我都係大你地三年咋...」佢隔個女仔蚊一蚊佢衫尾,「好嘞,唔阻你地散步喇,走先,拜拜!」
「你同佢好熟嫁?」




「果時中一,高年級會幫啲低年級補習,佢就係其中一個幫手既,咁啱佢又係我媽媽做果間老人院做義工,於是咁就識左同熟絡左囉,佢都識我媽媽。」
「哦...」唔知點解,自從佢甩開我隻手同佢講點同阿宏識果時,個心好似有啲唔舒服,噏住噏住,唔通依啲叫呷唶?
「你做咩呀?」佢睩大對眼,哄塊面過嚟,假如我行前一步就可以錫到佢咀...
「無野呀!」結果我反而退後左一步...
「咁行喇!」雖然手再次拖上,但個心仲未平伏...
就係咁樣,由於多得佢每日陪我溫書,雖然成績無突飛猛進,但總算離開左個留班區,而佢就繼續做阿仙奴(攞第四),於是我地就一齊升上中三,而係依一年亦發生左好多事影響到我地既關係...