我被初戀女友瘋狂報復: 第六話

「劉家雄,你既作業呢?」Miss Lee係小息叫左我去教員室,原來佢無收到我既作業。
「唔係呀,我交左喎...我記得我有做既...」我真係記得,因為依樣係我唯一親手做既。
「嗱!而家全班既作業都交齊喇,唯獨唔見你既啫!」
「吓?我真係有做喎...而且而家本作業都唔係我度...」
「今日留堂做返!」Miss Lee完全唔俾我反駁...
「聽講你今日要留堂喎。」羅小柔幸災樂禍咁同我講野,「但我記得你有交嫁,你仲問我個字點解既!」
「你係唔係被人整估呀?」前面家儀八卦地插嘴,「聽講你得罪左人喎,而家差唔多全級甚至全校都知...」
「應該都係你傳開去啫!」唔係誇張,之前話說有個中二生暗戀左我地班一位女同學,被家儀知道左,結果個中二生被家儀起晒底,而且成個中二三都知道,最終暗戀變明戀,不過最後都好似拒絕左...就係咁,我地全班,甚至全校一致認定家儀散播緋聞既速度絕對比喪屍病毒更快!
聽到家儀咁講,我個心不禁寒一寒,望過去慧勤果邊,咁啱佢又望過嚟,嘴角又撓起,又係奸笑,心頭又氾起一陣不祥預感...
「坐低喇,Miss Lee有啲事要遲啲到,今日我陪你留堂教你功課!」果然...其實我應該估到,慧勤係英文科科長,我欠交英文功課應該同佢有關,「嗱!你既作業啊!」




「吓?你做得咁絕既?竟然收埋佢?」講真我真係估唔到佢會收埋我本作業令我被人罰留堂,令我見識女人小器既一面...
「你仲好講?你睇!完全做錯晒,第三身單數又錯,依度係過去式你又...」佢一路揭開本作業,一路指住我有邊度錯,一輪嘴咁講,一時間我都應付唔嚟...
「係既Miss Lam,既然我有咁多地方錯,我會好好檢討喇,唔阻你喇,我返屋企面壁思過啦!拜拜!」我希望胡混過骨,但係...
「坐低!」佢拉開隔離張櫈仲好大力挫落地下,好似命令我一定要坐,「今日你唔做啱返晒本作業既話,都唔使指意出到依個門口!唔係既話我就話俾Miss聽你唔嚟留堂,記你缺點!」
「係!」為左唔好整花個底,我只好屈服。不過,當初唔係想同佢道歉咩?而家孤男寡女獨處一室,仲唔係好機會?
「嗱!依度應該用...」望住佢好認真咁教我功課,我個心跳得好急,同係自修室唔同,佢而家好似散發緊一種成熟既韻味,依一刻我就好似發緊夢咁...
「你既志願係唔係做老師呀?」佢望住我,表情有些微起伏,「做補習老師都好丫,就算唔係依兩樣,你都應該會係一個好媽媽...」
佢咬住下唇,強迫自己唔去笑,但佢雙眼已流露出甜蜜既表情。然而,佢好快又回復返嚴肅既表情...
「正經啲喇!」
「我正經緊啦!」




「我叫你正經啲做功課,唔係叫你正經咁摸我啊!」
「其實你有無興趣做家庭教師啫?」
「咩家庭教師呀?」
「無野啊...我睇太多愛情動作片啫...」
「咩愛情動作...咦...你個...」佢舉起手想打我,我及時捉住佢隻手,而我地兩個塊面差唔多零距離,雙唇快要接上...
「唔好意思...有啲事遲左...咦?」Miss Lee開門而入,我地已回復正常既坐姿...
「依度要加s...」
「係...」
「無特別事發生嘛?」Miss Lee問。
「無!」我地異口同聲講,我就加多句:「Miss Lee,你想有咩事發生?」




「無就得喇!做完你地走得嫁嘞!」
「哦!」其實我有啲想留係度...
「你仲原唔原諒我呀?」功課做完,我同慧勤一齊走,行到公園,我正式向佢道歉。
「都咁耐咯,咪我真係咁...小器咩?」明顯地「小器」兩字特別細聲...
「唔係...邊係呢...」我見過鬼仲唔怕黑咩?「係我發脾氣啫...而且係我呃你在先,係我既錯嚟既...對唔住...我以後唔會再呃你...」
佢用雙手圍住我條頸,再行前一步,我地既雙唇終於接上,雙手及雙唇傳來既溫暖好舒服,如果可以將時間停止,我希望係依一刻!
「喂...喂!又諗咩呀?」慧勤既聲音將我拉回現實。
「無...回憶返我地既初吻啫...」佢低頭無出聲,「回憶總是美好的!」
我人生最美好既時光...就係同你一齊...