我被初戀女友瘋狂報復: 第二話

「劉家雄,點解你仲唔搵女友?你無鍾意既人咩?」係中二果時,志華曾經問過我依條問題。係果時佢已經有第三個女朋友,佢話頭兩個因為自己唔識分咩係鍾意同唔識做人男朋友先散,仲話今次先算係初戀同認真,但事實係佢既依個「初戀」只維持三個月就散左,而佢去搵第二個時,就話今次先算係初戀...所以佢係有無限次初戀既...
「點解一定要搵女朋友呢?」我鬥氣咁反問。
「咁你有無鍾意既人啫?」
「都算有既...」
「咁你鍾意佢,無諗過擁有佢咩?」
「咪鍾意就要擁有既咩?鍾意同擁有唔係兩樣野嚟咩?」志華即時露出難以置信既表情,好似我既問題太深奧佢理解唔到。
「你...你好野...」佢個腦應該hang緊機...
其實我算係比較遲熟既人,當其他同學係中一話鍾意邊個女同學或老師,我都不已為意,直至中二既聖誕節...
「送俾你丫!」係一張聖誕卡同一排朱古力,送既係一個女同學,佢叫陳家恩,自小五開始佢同我同班,仲升埋同一間中學編埋同一班,但我地係中一下學年分組做壁佈先真正認識大家。
「多謝!」我打開張信封拎張卡睇,綠紅既低色中間有一棵由三個三角形組成既聖誕樹(好典型既聖誕卡),一打開,電子聲既Jungle Bell就會響起,裡面除左金色字既「Merry Christmas & Happy New Year」之外,佢仲寫左「Forever friend」係啲金字下面。




「你聖誕會去邊度玩?」佢問。
「如無意外應該同陸志豪佢地出旺角玩既...你呢?」
「我會同屋企過25號...我...我想約你26號出街,得唔得呀?」
「26號呀?應該得既...同佢地玩完...晏晝三四點應該起到身既...」
「咁我約你四點尖沙咀地鐵站等丫...」
「哦...好丫...」我果時係未去過尖沙咀,同埋唔知科學館原來係尖沙咀...
「不見不散...」
「不見不散...」點解聽落去咁似鬼片對白既?
佢講完就轉頭繼續派聖誕卡同朱古力。之後先知道全班每個人都收到依兩樣野,而我同其他人分別在於我收到一排,佢地收到一粒金沙...老實講,我想要金沙多啲,一來我比較鍾意食金沙,二來果排朱古力食落有啲苦...仲有個包裝啲字我查左成個鐘字典都搵唔到,唯一睇得明既係75%依個數目字...
到左26號,我費事陳家恩等,所以我比原本約定早十五分鐘到,點知佢一早就到左,今日佢著左件白色T-shirt加條牛仔短裙,加件牛仔褸,襯上佢原本既短髮,雖然係冬天卻有種爽朗既感覺。




對當時既我嚟講尖沙咀係墶大人玩既地方,唔係我嚟既,所以果日我都係跟住陳家恩周圍去,而佢又帶左相機,所以我地大部份時間都係九龍公園影相。食完飯後,我地去左海旁傾計散步。
「記得晒返啲相俾我喎...」
「嗯...係呢...你有無鍾意既女仔?」佢怕醜咁問我...
「吓?無呀!我都無打算拍拖!」可能受電視電影影響,當時既我拍拖意味著結婚,咁順理成章就生埋仔,而且仲要係一年內發生,對於只有十四歲既我嚟講依啲都太遙遠同太沉重,基本上諗都未諗過...
「吓?咁...你鍾意咩女仔嫁?」
「其實我個人嚟講無話特別鍾意咩類型既女仔,都係長頭髮,瓜子面咁囉...啊!仲有唔好太肥...唔...都係咁多到...」講下講下,我好似描述緊班上某人咁...
「嗯...咁性格呢?」
「斯文囉...至少似返個女仔先啦!你問咁多做咩?你唔係幫人相睇嘛?」
「唔係...其實我下個月走,我全家移民去加拿大...」
「哦...咁祝你一路順風!」睇佢個樣,好似有啲心事咁,唔通佢唔想走?




「至少...我臨走前,都可以同鍾意既人約會出街,雖然...」
「吓?」依刻我唔識點反應...
「嗯...都夜喇...我地返屋企喇...」
「哦...好啊...咁你幾號走呀?」
「十號晏晝三點半機...其實你唔嚟都無所謂...」
其實我唔問係唔係仲好呢?十號果日,我個心係度掙扎去唔去,慢慢時間一直流走,結果最後我都無去送機,到而家我都問自己係唔係唔夠大方?
依次事件之後,我好似開竅咁,開始留意身邊既異性,就連一向唔太鍾意情歌愛情片既我都開始去聽去睇,慢慢我對愛情既感覺開始萌芽生長,而係依個時候卻遇上佢,一切就好似整定咁...