我被初戀女友瘋狂報復: 第一話

而家好多人都話科技進步,其本上係無私隱,一旦放左資料上社交網站,想收埋自己隱藏身份就好難。其實,想收埋自己有幾難,唔使駭入政府資料系統刪晒你個人資料,唔使易容改指模,只要唔出去交際應酬,淨係返工放工,大時大節留係屋企,慢慢啲人就會唔約你,甚至唔記得你,漸漸係人群中消失。
今晚係出嚟做野後七年來第一次中學班聚,而搞手係我。畢業之後,初初兩三年仲會大家約出來,但慢慢大家開始工作關係,聚會越來越少,甚至唔見...而比較內向既我就好似被佢地遺忘咁,漸漸淡出佢地既生活。
今晚我地約出嚟打邊爐,香港人鍾意打邊爐,原因唔係食物,係一班人既氣氛,好彩今晚都有十二三人出席,至少知道佢地無忘記我。望住佢地,總係覺得我好似錯過左好多野咁。
「阿雄!你身為搞手食咁少?嚟!清左佢!」志豪仍然係咁豪既性格,當年既技安而家已經成為貨車司機,自己做自己既老闆。
「唔舒服呀?」係中學果時已被譽為金童玉女既啟明同志玲亦都已經結左婚,但...結婚三年有個四歲既仔?你地無聽政府講要有安全性行為咩?志玲都西利,生左先結婚,唔使大住肚著婚紗...
「你瘦左喎,有病嗎?」志華係我地全班成就最高既一個,雖然身為醫生,但仍不改當年花花公子既性格,做隻無腳既雀仔...
「無野呀...只係尋晚唔夠訓,胃口唔係咁好啫...」我苦笑解釋,同時眼尾留意坐係我對面既慧勤,一個係我心裡面有特別位置既女仔,我仲以為今生今世唔會再見到佢...
「唔好意思,我去個廁所先。」
當我係廁所出返嚟時,咁啱慧勤都係女廁出嚟。
「Hi...咦?你面色唔係咁好喎,你真係無事嘛?」佢憂心忡忡咁望住我,我頓時暖在心頭。而家佢電左把微曲既長髮,相比以前更有女人味,再配上蔚藍色既露肩連身裙,更有一份成熟既韻味。




蔚藍...係我最鍾意既顏色。
「都話我尋晚唔夠訓咯...」費事佢擔心,我裝著無野,「估唔到你會出現,仲以為你...仲嬲我...唔想見到我添!」
「吓...都咁多年...過左去啦!我都唔係咁小氣...」佢支吾以對,跟住急急步返到我地張檯度。我係唔係講錯野呢?我原本既意思唔係咁嫁,又一次因為咁搞禍左!
返到埋位,原來佢地已經傾緊我地畢業後學校老師既事。我地班主任Miss Chan係我地畢業後兩年,生左對龍鳳胎,兩三年後正式做全職湊仔婆。而人稱黑面神既黃sir亦終於升左做訓導主任,但估唔到既係原來既訓導主任李sir卻因為身體健康關係辭職退休,但聽人講真正原因係副校長迫佢退休...但最震驚既係,當年已經結左婚體育老師梁sir竟然同女學生搞師生戀,當然最後被人揭發連老師都無得做喇!
「仲有教英文個Miss Lee,聽講佢轉左第二間教。」以前全班最八既家儀好似新聞咁報導晒而家老師既去向(佢而家好似係電視台做緊新聞部...)。
「哦!係唔係阿雄暗戀果個呀?」志豪插嘴講。
「喂!邊個講嫁?邊有...」事實係...有,始終果時Miss Lee係學校唯一既後生女Miss,試問正值血氣方剛既男仔,有邊個唔心動?
「你啲野差唔多全班都知啦,包括你同...」志豪講既同時,我瞄一瞄慧勤,同時佢亦瞄一瞄我,四目交投,頓時空氣彷彿凝結一樣...
「食野喇,仲有咁多野食...」我打破依個尷尬氣氛,偷瞄一下慧勤,佢正同隔離交頭接耳,或者...我地一切已成過去...
飯局結束,有部分人意猶未盡去食糖水,而我就無同佢地一齊,準備獨自返歸。




「我都係唔去喇,你地去啦!」突然身後傳來一把女聲,「你仲係住以前果度喎?咁一齊搭火車返去丫!」
於是我同慧勤就兩個人一齊搭火車。
「點解妳唔同佢地一齊食糖水既?」係去火車站途中,我好奇咁問慧勤。
「我...減肥呀...」減肥?我目測佢條腰去到盡都係25吋左右,假如再減既話...
「哦...係咩...」為免再出現頭先既情況,我決定唔講太多野,「你近排點呀?做緊咩野呀?」
「之前係物流公司做接待員,而家搵緊工。你呢?」
「船務文員,人工唔算好高,但至少餓唔死先...」
「咁你...有左新女友未?」佢講完,低一低頭,之後擰埋一面...
「吓...未呀...邊有人鍾意丫...你呢?」
「吓?我都無呀...不過呢排硬係覺得被人跟蹤咁,所以先轉工...」




「哦...你咁正,梗係多人追嫁喇!」
「係咩...咁當日你又分手...」佢又將塊面擰埋一邊...
係囉...點解我地會分手?
時間撥返去大約十年前...