《長洲天黑黑，孩子請閉眼》: 第十六章

《第十六章》

【1】
「唔駛咁喎，我唔係嚟插你一刀！」張日強雙手舉起，因為他看見我已經亮出一把鋒利的菜刀。

短短數天，我就知道這裡有種「失驚無神插人一刀」的殺人文化，想好好活命是唔可能無武器在身，所以腰間一定要繫上一把刀。

「你以為你舉起雙手，我就會覺得你唔係危險人物？」我從容地笑。

張日強放低雙手，不徐不疾地走到床舖邊坐下，然後說：「你知唔知道，有時我會覺得你喺惡劣環境下露出嘅自信，真係相當恐怖。」





「所以恐怖到想殺死我？」我瞇起眼睛，嘴角維持張日強所說的恐怖笑容。

對，面對惡劣環境，我會不自覺地笑。
變態？不……
我只係覺得，笑可以掩蓋很多不安。

「我只係想同你傾傾，我哋嘅處境。」張日強一副直話直說的樣子。
「我哋？」我質疑：「從你插我一刀開始，已經再無『我哋』。」
「事實我無插中你要害，我根本唔想你死。」張日強委屈地說。




「咁唔該你同我好好解釋。」我坐回椅子上洗耳恭聽，盼望這次我會聽到一個真實的故事。

「你信又好，唔信又好，我唔想你死。全世界人我都唔介意佢哋可以去死一死，唯獨你，我當你係一世嘅朋友。」張日強以真情的眼神說，我差一點就雙目失明了。

「廢話唔好講咁多，入正題啦，不過你先話我知，你點知我喺度？」我不耐煩。

張日強嘆了一口意義不明的氣，接著說：「係思思話俾我知，話你出咗去要查探真相，所以我估你喺度。」
「你同思思好熟架？」我即刻問。
「我哋係有聯絡。」張日強直言：「只不過因為一啲無可避免嘅管理問題，我不得不表面與佢為敵。」
「你……你唔係追殺思思咩？」我難以置信，因為：「而且嗰日你仲想用割腹之刑對佢！」





「呢個都係逼不得已，當日我並唔係想殺佢，亦無諗過對佢用割腹刑，只係一定要殺死程sir。」他說。

「點解要殺死程sir？」我問，想不出程sir有什麼非死不可的理由。
「呢個容後再講。」他卻說。
「咁咩係逼切要講？」我身子微微向前傾。

「事實上，我哋而家係玩緊一場狼人遊戲。」張日強說出一直存於我心裡的答案，但我卻沒有中樂透的開心快樂。

張日強，果然知道更多，
而知道的，亦不只張日強一人。

「呢一場狼人遊戲，就只有十一個人知道，包括我、你、白痴仔、阿奇、陳天南、陸心儀、肥波、神婆琳、肥婆喬、基佬傑，仲有思思。」

「你係想講，我哋呢十一個人唔小心開啟咗魔法遊戲，然後捲入咗一場不可思議嘅殺人遊戲？」我說得很匪夷所思，但即使現在有外星人打開門跟我們唱i have a pen，你都不得不相信。





「魔法遊戲？我都唔知可唔可以話係魔法，或者都可以咁講。」張日強這樣說，意昧我所說的都有九成相似。

「可唔可以講清楚啲？」我禮貌地。

「與其話係魔法，我覺得我哋更似生化科研下嘅實驗物。」張日強無奈地說：「其實對成件事嘅來龍去脈，仲有好多我哋唔知道嘅野。」

我站起來，用刀指住張日強，威嚇著說：「如果你所講嘅說話，有半句虛言，我保證要你死得好慘。唔好講廢話，講你知嘅野！」

張日強搖搖頭，說：「我哋而家所面對嘅狀況已經夠慘。」

「……」

「當日我哋只係打開咗狼人遊戲嘅盒，喺我哋未開始玩之前，嗰個人就出現……」
「咩人？」




「我問你，玩狼人遊戲，最重要有咩角色？」張日強故作高深。
「狼人？」我想了想，再說：「同埋主持？」
「無錯，主持。
當晚有一個我哋唔認識嘅低Form同學撞咗入嚟我哋間房，原來佢係入嚟想問我哋借底褲(吓？)，我哋當然笑住嚟串佢(實會啦！) ，串串吓先知原來佢係輸咗遊戲所以被懲罰嚟借底褲嘅陰公豬(哦，唔怪得啦。)，之後我哋開始混熟(有無咁快？)
，佢仲主動話想我哋一齊玩一舖狼人遊戲(佢唔駛返去交待懲罰咩？)……我哋無乜所謂所以就(咁就瀨野了。) ……」張日強憶述一切，瞳孔彷彿映照出當日一幕幕的情境。

真實的狼人遊戲。

【2】
我是張日強，
立志將來要成為有錢佬嘅中六生。

最好的朋友是全世界最自以為是的林天仁，
但他係我最配服的人，全身都散發不同凡響的自信和魅力。





生活營的第一晚，我們同一班好Friend的同學在房間裡圍坐地上玩Card Game，狼人遊戲。

正當我們正要打開狼人遊戲的盒子時，突然有人敲門，打開門原來是一個笑容可掬的卷髮少年，看他的樣子正正常常，怎估到他是進來問我們借底褲。

「吓？你無底褲著呀？」我大聲說。
「除嚟睇下係咪真係無先啦！」肥波陰陰地笑。
「你借個Bra俾我哋咪借條底俾你囉！哈哈哈！」陳天南笑得爽朗。

笑完了，這位同學仔先自爆自己在隔離房玩遊戲輸了，所以正接受大懲罰，懲罰就是問隔離房借底褲！

「你哋點先肯借俾我呀？」卷髮小子靦腆地問。
「跳集舞嚟睇下先啦！」神婆琳隨便說。
「跳舞我唔識喎，不如咁啦，我見你哋玩緊狼人遊戲，我幫你哋做主持啦，玩完一場你哋就要借我底褲，等我返去同我啲friends交差啦。」卷髮小子傻傻地搔頭。

咁ok啦，咁就由佢充當主持了。




但，
當時我們怎意會到這位主持，這位外表傻氣的卷髮少年，他笑嘻嘻所派出的卡牌，卻帶著深藏的惡意，將為我們的明天帶來血色的命運。

如果我們一開始無玩這個遊戲，
如果我們一開始沒有遇上他，

一切會否不一樣？
可能不會，因為事情總要發生。

派牌後，每個人都看了自己牌上的角色，我們透過盒子的封面也知道其他牌的圖案。不過很奇怪，角色比我認識的狼人遊戲還要少。

「大家都知道自己係咩角色啦，不過我要講一次規則同角色功能，因為呢個係一個改良版嘅狼人遊戲」卷髮小子說。
「改良版？」我皺眉。
「係，大家聽清楚。」卷髮小子微笑點頭。
「等等……點解咁多紫色嘅霧嘅？喺邊度嚟架？」阿仁首先站起警戒周圍。

對了？我也看到。
這些紫色的霧是什麼一回事？
我們恐慌，還以為外面有人玩什麼危險的化學遊戲，心裡祈求霧中沒含劇毒。

卷髮小子異常冷靜，彷彿掌握一切。
這令我們更感事情怪異。

當我們疑惑到想奪門而出，門卻忽地大開，十個大漢如貫進入房間，迅速把我們包圍。

我們不敢妄動，因為大漢手執利刀。

「坐低。」一個大漢嚴厲說。
「遊戲都未玩完，大家要去邊度呢？」卷髮小子若無其事地說。
「你想我哋玩咩？」林天仁沉著問。

「就係狼人遊戲囉，繼續講返遊戲規則先啦。」他眼睛凝望雙手拿著的說明紙，然後像宣旨一樣講出以下內容：

平民：
1. 當在夜晚看見任何一個人類時，都會失去意識，昏迷原處。
2. 平民所看見的煙霧是紫色。

狼人
1. 於黑夜強制化身為狼人。
2. 狼人每晚只可任意抓傷一個人，令對方留下血痕印記。抓傷對象可以重覆，也可抓傷自己。
3. 第七晚只可任意殺死一個於過去六日內留下血痕印記的人，並且能感應血痕印記之人的藏身位置。
4. 若血痕印記者於第七晚前全部死去，狼人則只可任意殺死一個人。
5. 狼人可於夜間殺死「小女孩」，且不受2-4的限制。
6. 若夜晚沒有人被狼人襲擊，狼人第二早上會死。
7. 狼人所看見的煙霧是紅色。

預言家
1. 殺人夜的翌日，可查看一個人在遊戲裡的身份，方法是於查看對象面前集中精神，周圍便會散發對象所看到的煙霧。
2. 只有兩次確認身份機會，當第二次確認為紫色煙霧時，將即時導致腦死亡。
3. 預言家所看見的煙霧是藍色。

小女孩
1. 在第七晚的狼人殺人夜，看見任何人都不會被失去意識。透過功能，可偷看狼人化身過程。
2. 小女孩因為十分脆弱，狼人在夜間不受任何制約下都可殺死小女孩。
3. 小女孩看不見任何煙霧。

丘比特
1. 在遊戲之前指定任意兩個人是戀人。
2. 戀人之間永遠不能互指互殺。
3. 丘比特不能公開戀人關係，否則會死。
4. 若丘比特死了，戀人關係會解除。
5. 丘比特所看見的煙霧是紫色，與平民一樣。

附加規則
1. 當狼人殺死滿一百人，遊戲結束，狼人身體會釋出殺毒元素，為全人解除病毒。
2. 當狼人死去，遊戲結束，狼人屍體會釋出殺毒元素，為全人解除病毒。

當時，我完全不明白卷髮小子所講是什麼顛三倒四的玩法，什麼毒什麼夜晚什麼和什麼……
雖然好像是狼人遊戲的角色，但裡面的規則卻不是「紙牌」上可玩的遊戲。

直到繼後的事情發生了，我才知道，這是地獄門前的規則。

卷髮小子揮一揮手，示意那些大漢把我們強壓在地，然後卷髮小子從不知何處取出一個皮製大箱，劈拍打開扣子後，全部都是一枝枝排列整齊的針筒。

這時候，卷髮小子向我們漾開燦爛的笑容。