《長洲天黑黑，孩子請閉眼》: 第十五章

《第十五章》

【1】
到我醒來的時候，我已經躺在思思的帳蓬裡。

「我話你！你留喺帳蓬就留喺帳蓬啦！做乜鬼周圍走呀！搞到我差啲俾狼人抓到都唔知發生咩事！」學弟無故地向我兇神惡煞，我卻睡眼惺忪，對他的惱怒渾然不解。

「乜我尋晚見到嘅係你咩？」我猜測究竟發生什麼事，但心裡卻想不明白。

「我唔知，係卦，我都唔肯定，不過你失去意識時我又失去意識，失去意識之前究竟係見到邊個係唔會記得架！不過好大機會係你囉！我失去意識之後走咗落山，而你竟然走咗去岸邊，好在我朝早返嚟時剛好見到你，先揹你返嚟呢度。」學弟埋怨。





「你真係我嘅好朋友。」我無知地搔搔頭。

奇怪，我原以為自己已經解除病毒，理應不受夜晚見人就暈的限制，但為何昨晚我同某人影對望後會失去意識，連我都一樣？

「林天仁？你尋日又話你自己唔受限制嘅？」學妹都為我感到奇怪。

「我都覺得奇怪，明明前晚我見到人嘅時候，我都無事架，點解尋晚會咁？」我沉思。

「前晚見到人？」學弟問。




「係，喺觀音廟裡面，我望住嗰啲被捆綁作誘利嘅人時，都無失去意識，又無暈低，又無感覺咩唔舒服。」我滿腦子問號。
「哇！咩被捆綁嘅人？你前晚做咩嚟？」學妹吃驚。

對，他們並不知道前晚我用過去六日被留下抓痕的人作誘利，讓我與狼人相見。

在我和學弟學妹的對話期間，思思若無其事地整理帳蓬裡的衣物，好像沒有聽見什麼大不了的事情。

「我唔知！總之你唔好連累我地，如果唔咪，我話之你知道解除病毒方法，我一定踢你走！殺咗你！」學弟惡狠狠地說。

但現在問題是，




如果我真的解除病毒了，
我昨晚又怎會失去意識？

一定有什麼出錯？

細心想一想，前晚和昨晚有何分別？

難道……
是殺人夜和血痕夜的分別？
為何？為何有此不同？

【2】
雖然我不願意接受令我同思思之間出現萬丈深淵之隔的過去，但我必須決心尋回。如果我不能掌握更多的脈絡，我會在這小島上死得好慘。

樹林裡原始的草葉之香，還有小溪潺潺的流水聲。




帳蓬外，只有我和思思。

「點解？你仲要去邊？張日強雖然放你一條生路，但唔代表下次會留情。」思思嚴肅地說。

「我無辦法唔搞清楚件事。」我簡單地回答。

「你嘅傷根本未好，而且你得一個，鬥唔過張日強佢哋咁多人。」思思情急地說。

我認真地望向思思，試探與孤惑地問：「思思，尋日插我一刀嘅人就只有張日強，妳點知其他人都一樣想害我？」我行前一步，逼問：「除咗張日強之外，佢哋全部都有古怪，妳都知道？」

「咁有咩咁出奇？佢哋全部都係一黨，好可能就係佢哋原本就要殺你，但唯獨張日強選擇放你一馬。」思思淡然地說，一點沒有被我套到。

「我已經有計劃，而且我要去嘅地方唔係山下。」我說。
「你想去邊？」思思緊張。
「妳就留喺度等我返嚟。」我微笑，撫摸她的髮絲。





「如果你有咩計劃，我可以幫你。」思思輕輕地攬住我，讓我感到久違了的幸褔。

這使我忘記應有的詫異，忍不住在這幽幽的林中跟她接吻。
但，不是現在。

我輕輕推開她，說：「我會搵返以前失去嘅幸褔俾妳。」

【3】
如果硬將所有脈絡加上我的想像和推測串連一起，
這會是一個極度可怕的真相。
而我幾乎可以篤定，這是一場真實版的狼人遊戲。

我昨日受傷昏迷時，依稀記得造了一個夢，夢裡正正就是入Camp的第一晚，我與張日強以及白痴仔、阿奇、陳天南、陸心儀、肥波、神婆琳、肥婆喬、基佬傑、還有思思，正圍坐地上進行一場紙牌遊戲，遊戲的名稱正是狼人。
但那晚是如何玩、何人玩、過程如何，我通通都忘記……




然而，強烈的直覺令我肯定那晚所發生的事正是所有事情的原點。

所以我決定回去原點，營地。

營地裡的設施並沒有走樣，只是因為長久被冷落而變得氣氛寂廖。我在一所所渡假屋中間的路上漫步而行，終於回到原本的營舍，我們的營舍。於我而言，這房間是世界變化扭曲的起始。

打開門，一檯一木都依舊，是我第一日入Camp的模樣，也是我第一朝醒來的模樣。我隨便找了張椅子坐下，環視房間裡的一切，希望留意到有什麼線索，但腦中卻不禁思憶大伙兒第一日入Camp的快樂情景。

忽然，聽見背後開門的聲音。

是誰？

我警戒地迅速回頭。

張、日、強？