溝女的聖地──補習社: 結局
（結局）
「我之所以會鐘意你，全因為你嘅笑容。」Kitty一本正經咁講，完全無一絲成份係講笑。
但唔知點解……我反而好想笑。
我嘅笑容？我幾何會笑呀？我又唔係啲開朗嘅人，又點會成日笑？
你一定唔知毒撚嘅笑容有幾咁可怕！
「我就知你一定唔會信！世界上應該得我一個咁白痴……」
Kitty咁講，更令我好奇，點解會係笑容？
即使依家天氣凍到仆街，但我哋都毫不在意。因為我哋好自然咁捱埋一齊，心中自有溫暖。
「你知唔知，笑容真係會有一種力量，會令人睇上癮，久而久之會令人開心返？」
「我唔知…」第二次唔知。
「你呢…成日尷尬嘅時候，就會不自覺咁笑，雖然唔係啲咩好charm嘅笑容，仲好傻傻地添。」
Kitty頓了頓，斜斜地望住我。
「噗！」佢笑了。
我嘗試了解到佢頭先嘅講法，因為我都沈醉緊Kitty嘅笑容入面，真係好迷人。
我信了，相信笑容有種魔力。
「就係咁啦！就係咁啦！哈哈！笑到好傻。」
我尷尬一笑，又真係喎，原來自己成日都不自覺！
「但係！我好鐘意。」
「好鐘意睇到你咁樣笑，鐘意你喱份傻裡傻氣。」Kitty笑道。
我哋真係一對，我又覺得佢傻，佢又覺得我傻。
一生中，有一個傻傻嘅人陪係你身邊，係一件萬分幸福嘅事。
「仲記唔記得，我哋第一次係補習社度見面呀？」
我飲埋啤酒罐入面最後一滴啤酒，已經飲曬啦。
「當然記得啦，仲記得你一入嚟就覺得你…好靚……」
「當時我覺得你轉身嗰下好毒好傻，但你嘅笑容令我有種……安心嘅感覺。好自然就相信你，甚至依靠你。」
「夠啦，你醉啦，哈哈。」
講真，依家我都唔係幾敢Kitty講嘅嘢，我都唔知佢講嘅嘢係咪真，最主要係因為我覺得佢講嘅唔係真，似係飲醉咗然後講出嚟咁樣。
「我無醉架！」佢把聲清脆而響亮。
「我係外國飲再多都未醉過，飲少少啤酒我就醉？」
Kitty用手捉一捉頭髮，將啲頭髮摷去後腦，真係十足十成個鬼妹仔咁。
「好啦，講笑姐，我始終唔係好信自己咁樣嘅人，竟然得到你青睞。」
真係唔敢信架大佬！原來喱啲時候都會淆底。
「愛情喱樣嘢好難講，如果唔係我都唔會搞成咁啦……」
如今Kitty已經傷痕累累，如果俾著我，我都可能會唔再相信愛情。
「咁…你又知唔知點解我會鐘意你？」我反問返佢。
Kitty輕笑，「唔知喎。」
佢都清埋最後一啖酒，睇嚟佢心情好返好多。
我鐘意佢啲咩？我係心入面問咗喱個問題。
我腦海入面瞬間有好多Kitty嘅畫面，佢嘅可愛，善良，靚。
「我鐘意你平時嘅調皮，出其不意咁做啲令我覺得意外嘅嘢，因為當喱啲時候，我就會好緊張。」
「同時會覺得你好可愛。」佢可愛嘅臉蛋，真係深深刻係我心入面。
「呀！仲有！」我忽然間想起一樣嘢，「你仲有一種令人想保護嘅感覺，就好似依家咁，我唔想你再受任何傷。」
就算俾人當係兵，當係戇鳩仔，都係咁話架啦。
因為我真係好鐘意好鐘意好鐘意好鐘意Kitty。
聽完之後，Kitty又好似四年前咁，係沙灘上面喊起上嚟。
「你會唔會覺得我好港女？好似利用緊你咁？」佢留住眼淚，聲線變得吵啞。
以前嘅我，膽小怕事，好多事情都唔敢踏出第一步，驚衰，驚仆街！
從前懵懂嘅我，少不更事；依家我明白到，我無嘢好輸，咩都唔試，最後只會一無所有！
我伸出抖震嘅雙手，慢慢伸向Kitty，好慢好慢，同時要睇下Kitty嘅反應。
只見佢緩緩放下眼皮，合埋雙眼。
我先放膽幫佢，輕輕拭走臉上面嘅淚痕。
好溫柔，幫佢拭走淚痕。
此刻，我感覺到兩顆心貼得好近，近到好似聽到佢心跳咁，同時亦感覺到一種甜絲絲嘅味道。
一年前，我因為再次見返Kitty覺得我哋好似越嚟越遠，依家可以拉到咁近，心中自然湧上一股好開心嘅感覺。
就算佢當我係水泡，我都願意，就俾做個傻仔做成世啦。
Kitty睜開雙眼，水汪汪嘅眼睛，似乎藏著種種嘅濃事蜜意。
Kitty好快咁蜻蜓點水咁錫咗我一下，我同樣地因為太快，而反應唔過嚟。
曾經經歷過，似層相識，卻有點遙遠而陌生。
「你仲未答我喎！」佢含羞滴滴咁講。
啱啱錫完，我仲回味緊喱個久違嘅吻，反應唔過嚟。
我知道，佢喱個Kiss，係因為氣氛，感動而形成嘅一股衝動。
「坦白講，係有少少架，但我放心唔落，我始終會擔心你。」
「就好似你話唔返屋企，要去住酒店，我就已經好擔心你！我驚你會出啲咩事呀…」
「因為我真係好想搵個信得過，令我安心嘅人陪住我。」
「除咗你，我搵唔到第二個……」
「咁你依家有無鐘意我？」我講出喱句，無咗年輕時嘅緊張，講得好輕描淡寫。
「我都唔知呀，慢慢咪會知囉！」佢笑道。
咁…都唔算拒絕我呀？
我寧願為咗佢，重新追求佢一次！
好多人，想重新追多次，卻苦無機會，依家機會落係我面前，我點可以唔珍惜？
係咪？
「走未呀？」Kitty問。
「咁快？你心情好返啦？！」
「有你係度，好返得七七八八啦！」Kitty伸個懶腰，「我已經一晚無返屋企，再唔返去佢哋會擔心。」
Kitty同以前一樣，都係咁顧家，無變過。
佢一定係一個好好嘅老婆。
「而且我依家心情都好返好多，因為有你。」
Kitty笑住咁望住我，我哋就咁對視咗5秒，大約啦。最後係我忍唔住笑咗出嚟，因為佢嘅表情好滑稽，好可愛。
「好啦，咁返去啦！」
我哋收埋啲嘢，打算出去截的士。
我哋行緊昏黃色嘅街道上面，感覺我哋，好似差咁啲嘢咁！
真係，我覺得差咁啲嘢，喱個畫面先完美。
我停係度，但Kitty繼續向行前，無打算停落嚟嘅意思。
周邊一個人都無，Kitty行咗一段路，先察覺我唔係隔離，便擰轉頭望下我。
「搞咩呀你！？」佢大聲喊道。
我股足勇氣，放手一博。
「你信唔信我讓你一段路，都追到你呀哪！？」
我希望我追到佢嘅時候，佢真係俾我追到啦。
喱個畫面，只係差我同Kitty係埋一齊。頭先嘅我哋，好似隔咗一道牆咁。
Kitty笑了笑，「你真係好白痴呀！」但語氣唔係鬧我。
（好呀！）佢用口形做俾我睇，做到好誇張。
跟住Kitty就轉頭繼續向前行，無跑嘅意思，擺明係俾我追上去姐。
嘻嘻！
我深呼吸一下，然後大嗌：
「 我 鐘 意 你 ！ 」
清晰而響亮，一字一字咁講，佢一定聽得清楚。
真係！停咗係度。
我心入面好興奮，好緊張，亦好開心，等咗咁多年嘅嘢，好似即將成功，發生係我面前。
Kitty回眸牽笑，爽朗嘅短髮向後一撥，美麗度，我俾十分。
「 你 追 到 啦 ！」佢大聲回應我。
我唔知我係咪聽錯，處於一種半信半疑嘅開心狀態，立即跑上去問多次。
「你講多次，你頭先講咩呀？我聽唔清楚。」我半開玩笑咁講。
Kitty一副無我咁好氣嘅樣，然後係我隔離墊高隻腳，係我耳邊輕輕咁講多次。
「你追到啦！」
佢講嘅時候，有氣。搞到我耳仔有種麻麻嘅感覺，幾high下。
「真係！？」我真係好開心架！等咁多嘅答案終於等到，我已經開心到諗唔到咁多嘢，個腦一片空白咁。
「係呀！不過要幫下我架。」Kitty甜甜地笑。
「幫咩幫咩！？」咩事都會幫呀大佬！
「幫我放低以前嘅嘢，重新再走一次。」
「係你，我先相信你可以陪我走到最後……」
「如果唔係你嘅話，換著其他男仔，我諗我唔會願意俾喱個機會佢，我唔想再跌多次啦。」
Kitty嘅傷口，只有我先知道，所以我更加唔可以令佢受傷。
「我明白。」我好嚴肅咁講。
「應承我喎！」佢伸出隻手指尾出嚟。
「好！」我勾起佢隻手指尾。
昏黃色嘅街道上，有兩個人嘅影子慢慢向前行，互相牽著。