溝女的聖地──補習社: 後記

後續
 
自從當日同Kitty一齊咗之後，我好開心！成個人都有種好飄飄然嘅感覺。
 
我第一時間同我老死呀楊講，「喂！呀楊，我店咗啦！」
 
「你店乜柒呀？」佢啲語氣一如既往咁仆街。
 
「我同Kitty一齊咗！」嗰種開心，興奮，比我考上大學更嚟得深刻。
 


「吓？係呀？恭喜曬喎。」佢反應好冷淡，完全唔係我預期嘅反應。
 
「咁架！」我埋怨佢。
 
「咁係呀嘛，一係就一齊，一係就唔一齊，50%機會，有幾難估？」
 
屌你老味，真係燥！對住佢，真係jer jer吹喇叭。
 
「死啦仆街！」
 


我就咁結束咗喱段兄弟嘅對話。
 
隨後佢有whatsapp返我，話俾我知佢登我開心，但同時叫我自己小心，唔好受傷。
 
我明白嘅，男人就係咁，一啲感性說話無辦法對住人講，但唔代表心入面無。
 
我開始識得，點樣做一個男人。
 
關晴都有搵我，佢都知我同Kitty一齊咗，咁睇嚟Kitty有同關晴講喱件事。
 


關晴就唔同呀楊，呀楊呢，就企係我喱邊，而關晴就企係Kitty嗰邊。
 
關晴叫我要好好錫住Kitty，唔好俾佢再受一次傷。
 
無論點都好啦，有佢兩個支持我，我都感覺到好幸福架啦。
 
我啱啱同Kitty一齊嘅時候，好唔習慣，真係架！
 
由朋友轉做戀人，一時三刻轉唔切。
 
一出嚟拍拖，都唔知應唔應該拖手好，突然間拖手又好似……好唔自然。
 
我記得，我哋係行咗一陣，過馬路嘅時候，Kitty差啲俾車撞，情急之下我先拖住佢隻手。
 
喱一次拖手，就再無放開過。


 
到依家，我都仍然拖住佢隻手，與此皆老。
 
間唔中Kitty會sad起上嚟，因為係嗰個環境，Kitty曾經同個TB一齊嚟過，做過某啲事。
 
而佢記返起嘅時候，就好似𠝹手咁，始終會留低疤痕。
 
依個時候，就需要我陪係佢身邊，攬住佢。
 
同Kitty拍拖，真係好開心。因為佢性格唔港女之餘，出街啲錢有時都係佢俾，因為我窮，俾唔起……
 
我唯一可以做嘅，就係陪住佢。
 
佢唯一唔好嘅，可能就係太痴身啦，成日都想要我陪佢，Kitty真係Kitty，Hallo Kitty係一隻貓，Kitty都係一隻貓，好痴人。
 


不過久而久之我都無咩所謂，畢竟我哋一齊，有好多快樂嘅時光。
 
喱兩年，我哋經歷咗好多嘢，至少我哋做到一開始應承對方嘅嘢。
 
──不輕易講分手！
 
到依家，無論嗌交嗌得幾勁，都無講過喱兩個字。
 
因為我哋都知道喱兩個字嘅嚴重性，一但分手，我哋辛辛苦苦建立嘅嘢，就會咩都無。
 
嗰段時間，就好似空白一片咁。
 
雖然過程要忍，可能會好辛苦，你話有無諗過分手，我可以答你：有！
 
但係只要一諗到失去Kitty，眼前喱個女仔，我會俾以上嘅辛苦，更嚟得痛苦。


 
以前啲人講得啱架，以前嘅感情，壞咗咪整囉，依家係壞咗就換。
 
我唔想換。
 
經過四年嘅遊蕩，漂流。我都搵唔到一個真係啱自己嘅人，唯獨Kitty，我先覺得最自然，最自在。
 
我唔敢想像無咗Kitty嘅日子，會係點……
 
所以老土講句，我會好好珍惜。
 
講出嚟好易，幾秒就夠，但要做到「珍惜」兩字，好難！你可能要花上一輩子嘅時間。
 
今日，我大佬呀楊結婚，簡單而隆重。只係去註冊簽紙，因為佢哋未有錢擺酒，但係係佢哋眼中，已經認定對方係一世嘅人。
 


我哋只係坐埋一邊，見證住喱個重要嘅時刻，都覺得幸福。
 
係佢哋眼入面，洋溢住滿滿嘅幸福。我唔知佢哋將來點，現實係點樣殘酷，喱啲嘢先通通唔理，單純地享受現在僅有嘅快樂，先係最重要。
 
我真心祝福佢哋，可以白頭到老。
 
我拖住Kitty嘅手，中間我哋如一般情侶，有嗌交，但喱隻手，從來無鬆開過。
 
佢身邊的確一堆狗公，而且都係好高質素，都係啲二世祖，有錢仔。
 
甚至MK都有，但以Kitty嘅性格，人哋真係變做隻蚊，想插入嚟都難。
 
每次嗌交，我都會主動氹返佢，你寧願自己氹返條女，定係俾其他狗公氹？自己揀啦。
 
拍拖好花時間，心機同精神，所以你話，我仲邊有精力去搞三搞四？淨係應付一個就夠。
 
我好感恩上天俾我識到Kitty，仲經歷咁多事先係埋一齊，喱一切都得來不易。
 
我哋唔會令大家失望！真係會努力行落去，希望你哋都一樣！