溝女的聖地──補習社: 83
人生在世，點都會MK一次。
我覺得依家就係我人生最MK嘅時候。
「估唔到我哋都咁大個，時間都過得好快。」Kitty係度感懷身世咁，但忘記此次飲酒嘅目的。
本來我都諗住避而不談，但咁樣落去佢唔似會開心返，反而會越嚟越消沉。
「係呀...」我求其應下佢。
「係呢...你同你男朋友......」我好小心好小心咁問。
見佢好似無咩反應，就接住問落去，「做咩事分手嘅？」
我見咁樣問唔得，於是改下個句子，「姐係你都感覺唔到原來佢不嬲都唔鐘意你咩？」
其實我對呢件事，所知不多。
我咁樣做，算唔算係乘人之危呢？我唔想做「仆街」。
「我覺得佢好愛架 ! 佢都好錫架。」佢本來已經愁架啦，依家愁上加舵，希望可以谷低反彈啦。
「咁都會係做戲？做卧底咩依家。」我諗住幫Kitty出氣，鬧鳩條TB。
點知俾Kitty屌返轉頭，「佢唔係做戲架 ! 佢真係好愛我 ! 」
「佢要走......都係因為我唔夠好姐...」講完，兩行眼淚就流緊出嚟。
程雪，你真係好傻。
傻到我都唔知講咩好...只好陪佢一路隊酒。
「你鐘意佢啲咩呀？」
其實我想問嘅係，點解當初唔諗住同我一齊？
我心入面係知道答案，但係都會想問清楚個究竟。
會想知道，無非都係想自己死心，方可心息。
「佢...係我最需要人安慰嘅時候陪住我。」
「係我無依無靠無人陪無朋友嘅時候，係我隔離。」
「同埋......」
Kitty係喱個時候頓一頓，然後轉個頭望住我。
喱一下動作，好熟悉，曾經好多次經歷過這一瞬間。
再一次，為佢而心跳。
「 代 替 一 個 人 。 」
Kitty望實我，我清楚地睇到佢眼睛嘅深逐，俾佢嘅瞳孔深深吸引住，不能抽離。
佢喱句嘢有兩個意思，一時之間我load唔到，估唔到係咩意思。
佢嘅一個人係指佢係嗰邊一個人，定係指某一個人？
嗰某一個人，係咪講緊我？
「代替緊邊個呀？哈哈。」我專登講笑咁，輕鬆啲，咁樣會令人覺得自己無咁著緊。
其實心入面好緊張，好想知係咪講緊自己。
「你囉！」Kitty唔知係咪飲完酒講嘅關係，講嘢都大膽咗，紅不面，氣不喘。
在此奉勸各位巴打，飲酒的確係對身體唔好，不宜多飲。但飲酒卻係一件溝女良器，令人大膽，想講咩，做咩，都會比平時放。
「……」我哋陷入一陣靜態嘅時光。
喱種靜態維持得並唔耐，好快我就問，「點解係我？」
此時，Kitty放低手上面嘅啤酒，企咗起身，徐徐地向前面嘅大海行。
天色已經昏暗一片，只需幾分鐘，天空就黑到睇唔到大海。
我望住Kitty，唔知佢想點。
然後Kitty停係前方一個位置……大嗌：
「 陸 秋 水 ！我 鐘 意 你 ！ 」
Kitty講完，回眸一笑。
儘管喱度嘅環境好黑，只有微弱，苟延殘喘嘅燈光，但都遮掩不了Kitty身上嘅光茫。
喱幾年，我嘅生活就好似依家喱個環境咁，充斥住種種黑暗。但Kitty嘅出現，就好似一團火，點亮我嘅生活。
離遠望去，Kitty笑住咁望住我，佢好似鬆咗一口氣咁。
喱一刻，我好開心。
俾自己鐘意嘅人，同你講鐘意你，有咩理由唔開心？
喱幾年嚟，最開心就係依家。我唔知點形容依家嘅感覺，守得雲開見月明？暗竊自喜？
我諗，真係單純地因為佢鐘意我，而開心。
我終於等到，Kitty親口同我講鐘意我。就算喱一切只係童話，就算好似「六弄咖啡館」咁，最後男女主角分開，男主角因此自殺，咩都好。
我都覺得有喱一刻，值得。
Kitty慢步返嚟，見佢好似好緊張咁喘曬氣，好輕鬆咁。
我見到佢就對住佢笑，可能係太開心啦，哈哈。
「你唔怕俾人聽到架？」我打趣地道。
「都無人！嗄嗄。」佢仲喘緊氣。
「你唔俾海入面有人游緊水架？」
「痴線！哈哈。」然後就係度笑。
我又跟住笑埋一份，成個畫面好幼稚，好戇鳩，但好開心。
「我想咁做好耐啦。」佢喘完氣，拎返起罐啤酒，飲咗好大啖。
「……？」我用不解嘅眼神望住佢。
「好多年前，我已經想同你講架啦。」Kitty用輕鬆嘅語氣講出嚟，彷彿喱一切都雲淡風輕。
「只不過當年，我無咁嘅勇氣。」
佢再飲多啖，佢係咪想飲多啲，等自己有多啲勇氣呢？
但我驚佢咁樣飲落去會出事。
依家換我飲，「我都無勇氣架，我連面對你嘅勇氣都無。」
機場嗰件事，我一直都放係心入面，一直無機會同人講，更加無機會同Kitty講。
有啲嘢放係心入面好耐……你以為會忘記，其實你仲記得。
當時你後悔嘅事，依家有個機會放係你面前，你會唔會選擇補救呢？
我會想試下。
「Kitty。」我輕輕呼喚佢。
「對唔住。」
今次換佢笑出聲，「噗！做咩換你同我講Sorry呀？」
「因為機場嗰件事……」
Kitty怔了一怔，然後豁達地道，「算啦，都過咗去囉！我都唔記得咗囉，哈哈。」
佢好快地飲酒，以掩飾自己內心嘅緊張。
我睇得出，佢只係扮無事，心入面好介意。
（我嘅個人感覺，好多時都要鳩估下女仔嘅心時，喱個係我同Kitty相處學返嚟。）