溝女的聖地──補習社: 77

當然佢係聽唔明啦，喱啲都係我嘅內心戲嚟。
 
「咩為止普通嘅愛情先？」Kitty一本正經地道。
 
哈哈！喱個學識嘅討論真係要係連登學術台度開post問啦，開係感情台嘅話就難啲認真討論啦。
 
我對於普通嘅愛情定義，兩隻字：「簡單！」

Kitty愁容滿臉，一瞬間跌咗落沉思嘅深淵。
 


「我哋之前，都好簡單。」
 
然後Kitty毫無目的咁用叉搞佢碟乾炒牛河，眼神好空洞無力。
 
係呀，之前我哋真係好簡單。
 
每次諗起長洲嗰次，我都會由心度甜笑出嚟。
 
勾手指尾，輕輕咁錫唎，都好正。
 


「依家唔簡單咩？」我問。
 
Kitty毫無反應，依舊自顧自地搞佢啲嘢食。
 
「依家……」
 
Kitty終於反應過嚟。
 
「嗯？」
 


「依家唔簡單咩？」
 
只見佢思索一會，「喱幾年，有咩可能唔長大先得架？」
 
「大個咗，又點會簡單？」
 
「點解先？」我溫柔咁講，因為我想引導佢講出自己心聲。
 
「要面對好多問題，要面對將來……我同佢，都唔知有無將來……」Kitty特意將後面嘅句子講到好細聲。
 
我諗Kitty講緊嘅「佢」，係指個TB男朋友。
 
雖然香港地睇嚟好開放咁，但其實入面存在住唔少舊有嘅封建思想。
 
至少同性戀對上一輩人嚟講，佢哋係唔接受啦。


 
「咁你打算點先？」我講咗出嚟都覺得好似俾咗壓力佢咁。
 
但我心底裡有一絲希望，想Kitty返嚟我身邊。
 
「唉…」Kitty輕輕一嘆，「我都唔知。」
 
其實越大個，就越知道時間越嚟越少，但係面對嘅嘢又越嚟越多。
 
「豆腐火腩飯邊位？」喱個伙計服務態度幾好，值得加許！
 
我哋都避開咗尷尬嘅話題，任由我哋自然咁發展。

其實大個咗，好多嘢都睇得開咗，無以前咁執著。



順其自然啦，我依家咩都做唔到，就算依家我算係有能力，但我哋總係遇唔啱時間。

當我無能力俾幸福Kitty嘅時候，我哋最適合係埋一齊。當我有能力啦，卻無辨法再做更多嘅嘢。

喱餐飯，我哋食得好輕鬆，傾下佢係嗰邊生活呀，同啲鬼佬嘅趣事。

我又講下我係大學嘅事。

「睇你都變咗好多呀......」Kitty開懷咁講，睇得出佢眼入面嗰份真誠。

「哈哈，係咩？」

我自己都唔覺有咩變咗。

「哈哈，你梗係唔覺啦。」



「咁耐無見，一見就知真面目。你平時當然唔覺架，因為...你自己都慣咗。」

「咁我有咩變咗？」

我都有啲怕，怕我變得唔好，又或者變到好似唔係佢心入面希望咁......

「變得成熟咗啦，感覺大個咗。」

雖然係幾廢話(試問有邊個經歷過咁多嘢會唔成熟架？)，但都令我蹦緊嘅臉容放鬆落嚟。
 
「邊度成熟咗呀？」我笑問。

「以前嘅你呀，邊有膽去做咁多嘢？」



「你身邊嘅朋友，咪又係得呀楊佢哋。」Kitty一幅好似好了解我咁嘅樣，搞到我笑咗出嚟。

無奈地笑...

我中學唔係無朋友嘅，但好多都係泛泛之交，真正陪係我身邊嘅，真係得呀楊。

「果然了解我呀，哈哈。」

「梗係，我以前鐘意過你架嘛。」

Kitty面不紅，氣不喘，好似唔當一回事咁講出嚟，在我耳中聽落，更似一個玩笑。

但我好唔鐘意個「過」字﹗

因為代表「曾經」，我心底裡係希望Kitty「仲」鐘意我，依家連一絲希望都無埋。

依家我勁呀，換著係以前，我一定好唔開心，然後Kitty就會關心我，問我咩事。

但面具帶多咗，好多反應就自然出曬嚟。

「係呀？」我自己講出嚟都覺得假。

「太耐唔記得咗呀？」Kitty苦笑。

「點會，咁我仲有咩唔同咗？」我暗罵自己一句：戇鳩!!!
 
「變得靚仔咗，型仔咗囉。」

「仲有呢仲有呢？」我想知多啲，聽落感覺好爽皮架。

「哼哼!!!」除之傳嚟一陣笑聲。

「仲有變得幽默咗囉...哈哈」Kitty笑起上嚟，仍然咁好睇。

但整體俾我嘅感覺都唔同咗，係成個look唔同咗。

「但係我鐘意以前嘅你多啲。」

Kitty飲埋最後一啖凍奶茶，而我都一早食完，杯奶茶都一早飲完。

我哋陷入寂靜入面，因為...我哋以前太美好。

美好嘅嘢，總係以前。

「其實我都鐘意以前嘅你多啲。」喱句充滿好多無奈、心酸同埋不甘心......

「係呀，以前幾好。」Kitty低頭講。

還記得當時的勾手指尾嗎？

當時就已經把我的心，給勾走了......